ദുബൈ: തൊഴിൽ വിസ തട്ടിപ്പുകൾക്കെതിരെ മുന്നറിയിപ്പുമായി ദുബൈ പൊലിസ്. രാജ്യത്ത് തൊഴിൽ വിസ തട്ടിപ്പുകൾ കൂടിക്കൊണ്ടിരിക്കുന്ന സാഹചര്യത്തിലാണ് പൊലിസ് മുന്നറിയിപ്പ്.

നിയമപരമായ യാതൊരു തരത്തിലുള്ള അടിസ്ഥാനവുമില്ലാത്ത വ്യജ തൊഴിൽ, വിസ സ്‌പോൺസർഷിപ്പ് തട്ടിപ്പുകാരെ സൂക്ഷിക്കണമെന്ന് ദുബൈ പൊലിസ് അഭ്യർത്ഥിച്ചു. 

ജനറൽ ഡിപ്പാർട്‌മെന്റ് ഓഫ് ക്രിമിനൽ ഇൻവെസ്റ്റിഗേഷനിലെ ആന്റി-ഫ്രോഡ് സെന്റർ ആണ് മുന്നറിയിപ്പുമായി രംഗത്തെത്തിയത്. തട്ടിപ്പുകാർ പലപ്പോഴും ആദ്യം പണം വാങ്ങിയാണ് ഇരകളെ കബളിപ്പിക്കാറുള്ളതെന്ന് അധികൃതർ വ്യക്തമാക്കി. 

സർക്കാരിന്റെ ഔദ്യോഗിക പ്ലാറ്റ്‌ഫോമുകളിലൂടെയോ നിയമപരമായി ലൈസൻസ് ഉള്ള ഏജൻസികളിലൂടെയോ മാത്രമേ തൊഴിൽ വിസകൾ ലഭിക്കൂവെന്ന് അധികൃതർ വ്യക്തമാക്കി. വമ്പൻ ഓഫറിൽ വിസ പ്രദാനം ചെയ്യുന്ന ഏതൊരു വാഗ്ദാനവും തട്ടിപ്പാകാൻ സാധ്യതയുണ്ടെന്നും അധികൃതർ ചൂണ്ടിക്കാട്ടി.

ALSO READ: ഇ സ്കൂട്ടർ റൈഡിങ് പെർമിറ്റ് ആപ്പ് സർവിസ് ഇപ്പോൾ എല്ലാ ഔദ്യോഗിക ചാനലുകളിലും 

സമൂഹ മാധ്യമങ്ങൾ, മെസ്സേജിംഗ് ആപ്പുകൾ, അനൗപചാരികമായ മറ്റ് ഓൺലൈൻ പ്ലാറ്റ്‌ഫോമുകൾ എന്നിവയിലൂടെയാണ് മിക്കപ്പോഴും തട്ടിപ്പുകാർ തങ്ങളുടെ ഇരകളെ വലയിലാക്കുന്നത്. ഏജന്റുമാരായും കമ്പനി പ്രതിനിധികളായും വേഷമിടുന്ന തട്ടിപ്പുകാർ തൊഴിലന്വേഷകരുടെ സാഹചര്യം ചൂഷണം ചെയ്യുകയാണ്.

തട്ടിപ്പിൽ നിന്ന് എങ്ങനെ അകലം പാലിക്കാം?

തൊഴിലന്വേഷകർ താഴെപ്പറയുന്ന മുൻകരുതലുകൾ സ്വീകരിക്കണമെന്ന് ദുബൈ പൊലിസ് നിർദ്ദേശിച്ചു.

ഏതെങ്കിലും പേയ്‌മെന്റ് നടത്തുന്നതിന് മുമ്പ് ബന്ധപ്പെട്ട അധികാരികളുമായി വിസ ഓഫറുകളുടെ ആധികാരികത പരിശോധിച്ച് ഉറപ്പാക്കുക.

അംഗീകൃത റിക്രൂട്ട്‌മെന്റ് ഓഫീസുകളും സർക്കാർ പ്ലാറ്റ്‌ഫോമുകളും ഉൾപ്പെടെ അംഗീകൃത വഴികൾ മാത്രം ഉപയോഗിക്കുക.

"ഗ്യാരണ്ടീഡ്" വിസകളോ സാധാരണ നിയമ നടപടിക്രമങ്ങൾക്ക് പുറത്തുള്ള കുറുക്കുവഴികളോ വാഗ്ദാനം ചെയ്യുന്ന വ്യക്തികളോ ഗ്രൂപ്പുകളോ സംബന്ധിച്ച് ജാഗ്രത പാലിക്കുക.

തട്ടിപ്പ് എങ്ങനെ റിപ്പോർട്ട് ചെയ്യാം

സംശയാസ്പദമായ ഓഫറുകൾ ലഭിച്ചവരോ അല്ലെങ്കിൽ തങ്ങളെ ലക്ഷ്യം വച്ചുള്ളതാണെന്ന് വിശ്വസിക്കുന്നവരോ ആയ താമസക്കാർക്ക് മറ്റുള്ളവരെ സംരക്ഷിക്കാൻ സഹായിക്കുന്നതിന് സംഭവങ്ങൾ റിപ്പോർട്ട് ചെയ്യാം.  

ദുബൈ പൊലിസിന്റെ സ്മാർട്ട് ആപ്പ്

ഓൺലൈൻ, സൈബർ സംബന്ധമായ കുറ്റകൃത്യങ്ങൾക്കായുള്ള ഇ-ക്രൈം പ്ലാറ്റ്‌ഫോം

അടിയന്തരമല്ലാത്ത അന്വേഷണങ്ങൾക്ക് 901 എന്ന നമ്പറിൽ വിളിക്കുക.

dubai police warn job seekers to stay alert against fake employment and visa offers spreading online. verify recruiters, avoid upfront payments, check official channels, and report suspicious advertisements early to prevent financial loss and legal trouble in the uae promptly