തൊടുപുഴ: ഈ മാസം 20ന്  കേരള നിയമസഭാ സമ്മേളനം ആരംഭിക്കുമ്പോൾ ജനപ്രതിനിധികളില്ലാതെ മൂന്ന് മണ്ഡലങ്ങൾ. രണ്ട് എം.എൽ.എമാരുടെ അപ്രതീക്ഷിത വിയോഗവും കോടതി വിധിയിലൂടെയുള്ള ഒരാളുടെ അയോഗ്യതയുമാണ് സഭയിൽ മൂന്ന് ഒഴിവുകൾ സൃഷ്ടിച്ചത്. 

പീരുമേട്, കൊയിലാണ്ടി, തിരുവനന്തപുരം നിയോജക മണ്ഡലങ്ങളിലാണ് എം.എൽ.എ മാർ ഇല്ലാത്തത്. സി.പി.ഐ നേതാവായിരുന്ന വാഴൂർ സോമന്റെയും സി.പി.എം നേതാവായിരുന്ന കാനത്തിൽ ജമീലയുടെയും അപ്രതീക്ഷിത വിയോഗമാണ് പീരുമേട്, കൊയിലാണ്ടി സീറ്റുകൾ ഒഴിഞ്ഞുകിടക്കാൻ കാരണം.

ALSO READ: ശബരിമല സ്വർണക്കൊള്ള കേസ്; എസ്.ഐ.ടി അന്വേഷണ പുരോ​ഗതി റിപ്പോർട്ട് ഇന്ന് ഹെെക്കോടതിയിൽ    

മുൻ മന്ത്രി ആന്റണി രാജു അയോഗ്യനായതാണ് തിരുവനന്തപുരം  മണ്ഡലം ഒഴിഞ്ഞുകിടക്കാൻ കാരണമായത്. 34 വർഷം പഴക്കമുള്ള 'തൊണ്ടിമുതൽ കേസിലെ' കോടതിവിധി ആന്റണി രാജുവിന്  തിരിച്ചടിയാവുകയായിരുന്നു. ജനപ്രാതിനിധ്യ നിയമം (സെക്ഷൻ 151 എ) അനുസരിച്ച് നിയമസഭയുടെ കാലാവധി തീരാൻ ആറ് മാസത്തിൽ താഴെ മാത്രമുള്ളപ്പോൾ ഉപതെരഞ്ഞെടുപ്പ് നടത്തേണ്ടതില്ലെന്ന് കേന്ദ്ര തെരഞ്ഞെടുപ്പ് കമ്മിഷന് തീരുമാനിക്കാം. നിലവിലെ നിയമസഭയുടെ കാലാവധി തീരാൻ നാല് മാസം മാത്രമാണ് അവശേഷിക്കുന്നത്. അതിനാൽ, ഖജനാവിന് വലിയ സാമ്പത്തിക ബാധ്യത വരുത്തിവയ്ക്കുന്ന തെരഞ്ഞെടുപ്പിന് കമ്മിഷൻ മുതിരില്ല.