പാലക്കാട്: വെള്ളാപ്പള്ളി നടേശനുമായി ബന്ധം സ്ഥാപിക്കുന്നത് ഇടതുമുന്നണിക്കു ബാധ്യതയാകുമെന്ന് സി.പി.ഐ. എസ്.എന്‍.ഡി.പി യോഗം കേരള ചരിത്രത്തിന്റെ ഭാഗമാണ്. എന്നാല്‍ അത്തരം ഇടപെടലല്ല ഇപ്പോള്‍ വെള്ളാപ്പള്ളിയുടെ നേതൃത്വത്തിനു കീഴില്‍ നടക്കുന്നതെന്നും സി.പി.ഐ പാലക്കാട് ജില്ലാ കമ്മിറ്റി യോഗം ചൂണ്ടിക്കാട്ടി. 

ഇത്തരത്തിലുള്ളവരുമായുള്ള ചങ്ങാത്തം മതന്യൂനപക്ഷങ്ങള്‍ക്ക് എല്‍.ഡി.എഫിനെതിരെ സംശയമുയരാന്‍ ഇടയാക്കുമെന്നും അതിനാല്‍ വിഷയത്തില്‍ അതീവ ജാഗ്രത വേണമെന്നും ജില്ലാ കമ്മിറ്റി യോഗത്തിന്റെ ചര്‍ച്ചയില്‍ നിര്‍ദേശമുയര്‍ന്നു.

പിണറായി-വെള്ളാപ്പള്ളി സഖ്യം ന്യൂനപക്ഷത്തെ അകറ്റിയെന്ന് സി.പി.ഐയില്‍ നേരത്തേയും വിമര്ഡശനമുയര്‍ന്നിരുന്നു.  ഭൂരിപക്ഷ വോട്ട് കിട്ടുമെന്നു വിചാരിച്ചാകും രണ്ടുപേരും കൂടി ഇതെല്ലാം ചെയ്തത്. ന്യൂനപക്ഷം ശത്രുക്കളുമായെന്നും അന്ന് വിമര്‍ശനമുയര്‍ന്നു. 

ALSO READ: കോഴിക്കോട് ബിവറജിലേക്ക് മദ്യവുമായി വന്ന ലോറി അപകടത്തില്‍പ്പെട്ട് ഡ്രൈവര്‍ക്ക് ദാരുണാന്ത്യം

മലപ്പുറവുമായി ബന്ധപ്പെട്ട് വെള്ളാപ്പള്ളി നിരന്തരം നടത്തുന്ന വര്‍ഗീയ പരാമര്‍ശങ്ങള്‍ക്കെതിരെ വലിയ വിമര്‍ശനം ഉയരുന്നതിനിടെയാണ് സി.പി.ഐയുടെ പ്രതികരണം. അതേസമയം, വെള്ളാപ്പള്ളിയുടെ പരാമര്‍ശങ്ങളെ മുഖ്യമന്ത്രി ഇതുവരെ  തള്ളിപ്പറഞ്ഞിട്ടില്ല.

സി.പി.ഐക്കാര്‍ പണം വാങ്ങിയെന്ന വെള്ളാപ്പള്ളി നടേശന്റെ പരാമര്‍ശത്തിനെതിരെ നേരത്തെ പാര്‍ട്ടി സംസ്ഥാന സെക്രട്ടറി ബിനോയ് വിശ്വം രംഗത്തെത്തിയിരുന്നു. തങ്ങള്‍ക്ക് മാര്‍ക്കിടാന്‍ വെള്ളാപ്പള്ളിയെ ആരും ഏല്‍പ്പിച്ചിട്ടില്ലെന്നും തെറ്റായ മാര്‍ഗത്തില്‍ പണം വാങ്ങിയെന്ന് വെള്ളാപ്പള്ളി തെളിയിച്ചാല്‍ തിരിച്ചു നല്‍കുമെന്നമായിരുന്നു ബിനോയ് വിശ്വത്തിന്റെ മറുപടി. വ്യവസായി എന്ന നിലയില്‍ തെരഞ്ഞെടുപ്പ് ഫണ്ടോ പാര്‍ട്ടി ഫണ്ടോ വാങ്ങിയിട്ടുണ്ടാകാമെന്നും അദ്ദേഹം കൂട്ടിച്ചേര്‍ത്തു. 

cpi palakkad district committee says association with vellappally natesan could harm ldf, raising minority concerns over recent statements and political ties in kerala.