അബൂദബി: വാഹനമോടിക്കുന്നതിനിടെ മൊബൈല്‍ ഫോണ്‍ ഉപയോഗിക്കുന്നതിന്റെ അപകടങ്ങളെക്കുറിച്ച് ദൃശ്യങ്ങള്‍ പുറത്തുവിട്ട് അബൂദബി പൊലിസ്. 'യുവര്‍ കമന്റ്' എന്ന പേരില്‍ നടത്തുന്ന ബോധവല്‍ക്കരണ കാംപയിന്‍ ഭാഗമായാണ് സമൂഹ മാധ്യമങ്ങളിലൂടെ മുന്നറിയിപ്പ് നല്‍കിയത്.
ശ്രദ്ധക്കുറവ് മൂലം റെഡ് സിഗ്‌നല്‍ മറികടക്കുന്നതും മറ്റു വാഹനങ്ങളുമായി കൂട്ടിയിടിക്കുന്നതും സംബന്ധിച്ച് സിഗ്‌നലിലെ കാമറകളില്‍ പതിഞ്ഞ ദൃശ്യങ്ങളാണ് പുറത്തുവിട്ടത്. വാഹനമോടിക്കുമ്പോള്‍ ഫോണ്‍ ഉപയോഗിച്ചാല്‍ 800 ദിര്‍ഹം പിഴയും 4 ബ്ലാക്ക് പോയിന്റുകളുമാണ് ശിക്ഷ. റെഡ് സിഗ്‌നല്‍ മറികടന്നാല്‍ 1,000 ദിര്‍ഹം പിഴയും 12 ബ്ലാക്ക് പോയിന്റും ലഭിക്കും. വാഹനം 30 ദിവസത്തേക്കു കണ്ടുകെട്ടും. പിടിച്ചെടുത്ത വാഹനം തിരികെ ലഭിക്കുന്നതിനു 50,000 ദിര്‍ഹം വരെ വേറെ അടയ്‌ക്കേണ്ടി വരും.

ചുരുക്കത്തില്‍, അപകടമുണ്ടാക്കിയ ആള്‍ക്ക് മൊത്തം 52,000 ദിര്‍ഹമെങ്കിലും പിഴ അടയ്‌ക്കേണ്ടി വരും. റോഡില്‍ പൂര്‍ണ ശ്രദ്ധ ചെലുത്തണമെന്നും പൊലിസ് ഓര്‍മിപ്പിച്ചു. പൊതുമുതല്‍ നശിപ്പിച്ചാല്‍ പൊലിസ് പട്രോള്‍ വാഹനങ്ങളെ ഇടിക്കുകയോ പൊലിസിന്റെ സ്വത്തുക്കള്‍ നശിപ്പിക്കുകയോ ചെയ്താല്‍ അര ലക്ഷം ദിര്‍ഹം പിഴ ഈടാക്കും.
നിരത്തുകളില്‍ വാഹനവുമായി അഭ്യാസ പ്രകടനം നടത്തിയാലും സമാന തുകയാണ് പിഴ. വ്യാജ നമ്പര്‍ പ്ലേറ്റ്, കൃത്രിമം നടത്തുക, പ്ലേറ്റിലെ അക്കങ്ങള്‍ മായ്ച്ചു കളയുക, അപകടമുണ്ടാക്കുന്ന വിധത്തില്‍ വാഹനമോടിക്കുക തുടങ്ങിയവയിലും വാഹനങ്ങള്‍ പിടിച്ചെടുക്കും.

Summary: Abu Dhabi police remind drivers to stay focused on roads and avoid distractions