ന്യൂഡല്‍ഹി: ഡല്‍ഹി കലാപവുമായി ബന്ധപ്പെട്ട ഗൂഢാലോചനാക്കേസില്‍ അഞ്ചു വര്‍ഷത്തിലധികമായി ജയിലില്‍ക്കഴിയുന്ന ഉമര്‍ ഖാലിദ്, ഷര്‍ജീല്‍ ഇമാം എന്നിവരുടെ ജാമ്യാപേക്ഷ തള്ളി സുപ്രിം കോടതി. ഇവര്‍ക്കെതിരെ ശക്തമായ തെളിവുണ്ടെന്ന് വ്യക്തമാക്കിയാണ് കോടതി ജാമ്യാപേക്ഷ തള്ളിയത്. ഡല്‍ഹി പൊലിസിന്റെ വാദങ്ങള്‍ അംഗീകരിച്ചു. 

ക്രിമിനല്‍ ഗൂഢാലോചനയില്‍ ഇരുവരുടെയും പങ്കാളിത്തം സൂചിപ്പിക്കുന്ന മതിയായ തെളിവുകള്‍ പ്രോസിക്യൂഷന്‍ നല്‍കിയിട്ടുണ്ടെന്ന് സുപ്രിം കോടതി വ്യക്തമാക്കി.

കേസില്‍ മറ്റ് അഞ്ചുപേര്‍ക്ക് കോടതി ജാമ്യം അനുവദിച്ചു.  ഗുല്‍ഫിഷ ഫാത്തിമ, മീരാന്‍ ഹൈദര്‍, ഷിഫാഉര്‍റഹ്‌മാന്‍, മുഹമ്മദ് സലിം ഖാന്‍, ഷദാബ് അഹമ്മദ് എന്നിവര്‍ക്കാണ് കോടതി ജാമ്യം അനുവദിച്ചത്. 

സംസ്ഥാനത്തെ അസ്ഥിരപ്പെടുത്താനുള്ള ബോധപൂര്‍വമായ ശ്രമമാണ് അവര്‍ ചെയ്ത കുറ്റകൃത്യങ്ങളെന്നും അവയെ സ്വയമേവയുള്ള പ്രതിഷേധങ്ങളായി കണക്കാക്കാനാവില്ലെന്നുമാണ് ഡല്‍ഹി പൊലിസ് കോടതിയെ അറിയിച്ചത്. 

കേസില്‍ വാദംകേട്ട ജസ്റ്റിസുമാരായ അരവിന്ദ് കുമാര്‍, എന്‍.വി അഞ്ജാരിയ എന്നിവരടങ്ങിയ ബെഞ്ച് ഡിസംബര്‍ പത്തിനാണ് വിധിപറയാന്‍ മാറ്റിയത്.

സെപ്തംബര്‍ രണ്ടിനാണ് ഡല്‍ഹി ഹൈക്കോടതി ഇവര്‍ക്ക് ജാമ്യം നിഷേധിച്ചത്. സാധാരണ ചെയ്തുവരുന്ന സമരം മാത്രമാണ് തങ്ങള്‍ നടത്തിയതെന്നും ഡല്‍ഹി പൊലിസ് ആരോപിക്കുന്ന കുറ്റം ചാര്‍ത്താന്‍ സാധിക്കില്ലെന്നും ഹരജിക്കാര്‍ ഹൈക്കോടതിയില്‍ വാദിച്ചിരുന്നു. എന്നാല്‍ പെട്ടെന്നുണ്ടായ സമരമല്ലെന്നും, മുന്‍ കൂട്ടി ആസൂത്രണം ചെയ്ത സമരമാണ് ഉമര്‍ ഖാലിദ് ഉള്‍പ്പെടെയുള്ളവര്‍ നടത്തിയതെന്നുമായിരുന്നു ഡല്‍ഹി ഹൈക്കോടതിയുടെ നിരീക്ഷണം. 

അതേസമയം ഡല്‍ഹി കലാപ ഗൂഢാലോചനയുമായി പ്രതികളെ ഒരിക്കലും ബന്ധപ്പെടുത്താന്‍ കഴിയില്ലെന്ന വാദമാണ് അഭിഷേക് മനു സിങ് വി, കപില്‍ സിബല്‍ തുടങ്ങിയ അഭിഭാഷകരുടെ വാദം. വിചാരണ കൂടാതെ ദീര്‍ഘകാലം ജയിലില്‍ അടച്ചതിലെ നിതീകേടും കോടതിയില്‍ ഉന്നയിച്ചു. ഇവര്‍ക്കെതിരെ യുഎപിഎ ചുമത്തിയത് എന്തിനാണെന്നും സുപ്രീം കോടതി നേരത്തെ ചോദിച്ചിരുന്നു.

the supreme court has denied bail to umar khalid and sharjeel imam while granting bail to five other accused, marking a significant development in the case.