സാവോപോളോ: ആവർത്തിച്ചുള്ള പരിക്കുകളും ശസ്ത്രക്രിയകളും മാനസികമായി തളർത്തിയപ്പോൾ ബ്രസീലിയൻ സൂപ്പർ താരം നെയ്മർ ജൂനിയർ ഫുട്ബോൾ കരിയർ അവസാനിപ്പിക്കുന്നതിനെക്കുറിച്ച് ഗൗരവമായി ആലോചിച്ചിരുന്നതായി പിതാവ് നെയ്മർ സീനിയർ വെളിപ്പെടുത്തി. അടുത്തിടെ നൽകിയ ഒരു അഭിമുഖത്തിലാണ് മകന്റെ കരിയറിലെ ഏറ്റവും പ്രയാസമേറിയ നിമിഷങ്ങളെക്കുറിച്ച് അദ്ദേഹം മനസ്സ് തുറന്നത്.

'എനിക്ക് മതിയായി' - നെയ്മർ

കഴിഞ്ഞ സീസണിന്റെ അവസാനഘട്ടത്തിൽ ഇടത് കാൽമുട്ടിലെ മെനിസ്കസ് പരിക്ക് ഗുരുതരമായപ്പോഴാണ് 33-കാരനായ നെയ്മർ ഇത്തരമൊരു തീരുമാനത്തെക്കുറിച്ച് ചിന്തിച്ചത്.തന്റെ പരിക്കിനെക്കുറിച്ചുള്ള വാർത്തകൾ തന്നോട് സംസാരിക്കുന്നതിന് മുൻപേ മാധ്യമങ്ങളിൽ വന്നത് നെയ്മറെ വല്ലാതെ വേദനിപ്പിച്ചു. ആ സമയത്ത് അവന്റെ മനസ്സ് ശൂന്യമായിരുന്നുവെന്ന് പിതാവ് പറയുന്നു.

നെയ്മർ അച്ഛനോട് പറഞ്ഞത് ഇങ്ങനെയായിരുന്നു: "എനിക്ക് ഇനി ഇത് സഹിക്കാൻ കഴിയില്ല. വീണ്ടും ഒരു ഓപ്പറേഷൻ വേണോ എന്ന് പോലും എനിക്കറിയില്ല. അച്ഛാ... എനിക്ക് മതിയായി."

രക്ഷകനായത് പിതാവിന്റെ വാക്കുകൾ

മകൻ തളർന്നപ്പോൾ കരുത്തായി നിന്നത് പിതാവായിരുന്നു. വീണ്ടും ശസ്ത്രക്രിയയ്ക്ക് വിധേയനാകാനും ലോകകപ്പ് എന്ന സ്വപ്നത്തിനായി പോരാടാനും അദ്ദേഹം നെയ്മറെ പ്രേരിപ്പിച്ചു.വിരമിക്കാൻ ആഗ്രഹിക്കുന്നുവെങ്കിൽ ശസ്ത്രക്രിയയ്ക്ക് ശേഷം അത് ചെയ്യാമെന്നും എന്നാൽ സുഖം പ്രാപിക്കാനുള്ള ശ്രമത്തിൽ താൻ ഒപ്പമുണ്ടാകുമെന്നും പിതാവ് വാഗ്ദാനം നൽകി.തൊട്ടടുത്ത ദിവസം തന്നെ വേദന വകവെക്കാതെ നെയ്മർ പരിശീലനം ആരംഭിക്കുകയും കളിക്കളത്തിലേക്ക് തിരിച്ചെത്തുകയും ചെയ്തു.

സാന്റോസിനെ രക്ഷിച്ച പോരാളി

2025 ജനുവരിയിൽ തന്റെ പഴയ തട്ടകമായ സാന്റോസിലേക്ക് മടങ്ങിയെത്തിയ നെയ്മർ ടീമിനായി നിർണ്ണായക പങ്കാണ് വഹിച്ചത്. പരിക്കിന്റെ വേദന സഹിച്ചും കളത്തിലിറങ്ങിയ നെയ്മർ എട്ട് ഗോളുകൾ നേടി ടീമിനെ റെലഗേഷൻ ഭീഷണിയിൽ നിന്ന് രക്ഷിച്ചു. ഗോളടിച്ച ശേഷം നെയ്മർ പിതാവിനെ നോക്കി താൻ അവസാനം വരെ പോരാടുമെന്ന് ആംഗ്യം കാണിച്ചത് വൈകാരികമായ നിമിഷമായിരുന്നു.

ലക്ഷ്യം 2026 ലോകകപ്പ്

ഡിസംബർ 22-ന് നടന്ന വിജയകരമായ ശസ്ത്രക്രിയയ്ക്ക് ശേഷം നെയ്മർ ഇപ്പോൾ വിശ്രമത്തിലാണ്. ഈ മാസം അവസാനം ആരംഭിക്കുന്ന ബ്രസീലിയൻ സീരി എ സീസണിലൂടെ താരം വീണ്ടും സജീവമാകുമെന്നാണ് പ്രതീക്ഷിക്കുന്നത്. 2026-ലെ ലോകകപ്പിൽ ബ്രസീലിനായി ബൂട്ട് കെട്ടുക എന്നതാണ് നെയ്മറുടെ നിലവിലെ പ്രധാന ലക്ഷ്യം. 128 മത്സരങ്ങളിൽ നിന്ന് 79 ഗോളുകൾ നേടിയിട്ടുള്ള നെയ്മറാണ് ബ്രസീലിന്റെ എക്കാലത്തെയും മികച്ച സ്കോറർ.