ന്യൂഡല്‍ഹി: രാജ്യത്ത് പാകിസ്താന് വേണ്ടി വീണ്ടും ചാരപ്പണി. പാകിസ്താന് പ്രതിരോധ വിവരങ്ങള്‍ ചോര്‍ത്തിയതില്‍ ഹരിയാനയില്‍ ഒരാള്‍ അറസ്റ്റിലായി. പാകിസ്താന്‍ ആസ്ഥാനമായുള്ള ഹാന്‍ഡ്ലര്‍മാര്‍ക്ക് തന്ത്രപ്രധാനമായ സൈനിക വിവരങ്ങള്‍ ചോര്‍ത്തി നല്‍കിയ കേസില്‍ അംബാല സ്വദേശി സുനില്‍ കുമാര്‍ ആണ് അറസ്റ്റിലായത്.

അംബാല കന്റോണ്‍മെന്റിലെ ഒരു സ്വകാര്യ കരാറുകാരന്റെ സൂപ്പര്‍വൈസറായി ജോലി ചെയ്യുകയായിരുന്നു സുനില്‍ കുമാര്‍ എന്നാണ് അംബാല പൊലിസ് പറയുന്നത്. ഔദ്യോഗിക സൈനിക പ്രവേശന കാര്‍ഡ് കൈവശം വച്ചിരുന്നതിനാല്‍, സൈന്യത്തിന്റെയും വ്യോമസേനയുടെയും യൂണിറ്റുകള്‍ താമസിക്കുന്ന നിയന്ത്രിത മേഖലകളിലേക്ക് കുമാറിന് നേരിട്ട് പ്രവേശനമുണ്ടായിരുന്നു.

ALSO READ: വീണ്ടും പാക് ചാരൻ വലയിൽ; അറസ്റ്റിലായത് പഞ്ചാബ് സ്വദേശിയായ പ്രകാശ് സിങ്; അതിർത്തികളിലെ അതീവ പ്രതിരോധനീക്കങ്ങൾ ചോർത്തി

എയര്‍ഫോഴ്‌സ് മേഖലകളുടെ ചിത്രങ്ങള്‍ പകര്‍ത്തി പാകിസ്താന് കൈമാറിയെന്ന് അംബാല പൊലിസ് പറഞ്ഞു. ഇയാളുടെ പക്കല്‍ നിന്നും ഫോണും മറ്റു വസ്തുക്കളും പിടിച്ചെടുത്തിട്ടുണ്ട്. സംശയാസ്പദമായ നിരവധി കാര്യങ്ങള്‍ ഫോണില്‍ നിന്നും കണ്ടെത്തിയെന്ന് അംബാല ഡി.എസ.്പി വീരേന്ദ്ര കുമാര്‍ വ്യക്തമാക്കി.

ഓപ്പറേഷന്‍ സിന്ദൂറിന് ശേഷം ചാര പ്രവര്‍ത്തനങ്ങളുമായി ബന്ധപ്പെട്ട് രാജ്യത്ത് നടക്കുന്ന അറസ്റ്റിലെ ഏറ്റവും പുതിയതാണ് ഹരിയാനയിലേത്. 

കുമാര്‍ സോഷ്യല്‍ മീഡിയയില്‍ 'ഹണി ട്രാപ്പില്‍' പെട്ടിരുന്നതായും കഴിഞ്ഞ എട്ട് മാസമായി ഫേസ്ബുക്ക്, വാട്സ്ആപ്പ് വഴി പാകിസ്താന്‍ മൊഡ്യൂളുമായി ബന്ധം പുലര്‍ത്തുകയും ചെയ്തിരുന്നതായി പൊലിസ് സൂപ്രണ്ട് അജിത് സിംഗ് ഷെഖാവത്ത് പറഞ്ഞു.

ALSO READ: കൊച്ചിൻ ഷിപ്പ്‌യാർഡിലെ ചാരവൃത്തിയിൽ വീണ്ടും അറസ്റ്റ്; ഗുജറാത്ത് സ്വദേശി ഹിരേന്ദ്ര കുമാർ പാകിസ്ഥാന് ചോർത്തിക്കൊടുത്തത് അതീവ രഹസ്യങ്ങൾ 

സൈനിക നീക്കങ്ങളെയും സ്ഥലങ്ങളേയും കുറിച്ചുള്ള വിവരങ്ങള്‍ അദ്ദേഹം പങ്കുവെച്ചതായി ആരോപിക്കപ്പെടുന്നു. നിലവില്‍ നാല് ദിവസത്തെ പൊലിസ് റിമാന്‍ഡിലാണ് സുനില്‍ കുമാര്‍, ദേശീയ പരമാധികാരത്തെ അപകടപ്പെടുത്തിയതിന് ഭാരതീയ ന്യായ സംഹിതയിലെ സെക്ഷന്‍ 152 പ്രകാരം ഇയാള്‍ക്കു മേല്‍ കുറ്റം ചുമത്തിയതായി പൊലിസ് വ്യക്തമാക്കി.

ഓപ്പറേഷന്‍ സിന്ദൂരവുമായി കുമാറിന്റെ പ്രവര്‍ത്തനങ്ങള്‍ക്ക് ബന്ധമുണ്ടോ എന്ന് പൊലിസ് അന്വേഷിക്കുന്നുണ്ട്. നേരത്തെയും ഓപറേഷന്‍ സിന്ദൂറുമായി ബന്ധപ്പെട്ട ചാരവൃത്തിയില്‍ രാജ്യത്ത് നിരവധി പേര്‍ അറസ്റ്റിലായിട്ടുണ്ട്. 
പാകിസ്ഥാന്‍ ഹൈക്കമ്മീഷന്‍ ഉദ്യോഗസ്ഥനുമായി സെന്‍സിറ്റീവ് ഡാറ്റ പങ്കിട്ടതിന് ഹിസാര്‍ ആസ്ഥാനമായുള്ള യൂട്യൂബര്‍ ജ്യോതി മല്‍ഹോത്ര,  നേപ്പാള്‍ വഴി യൂറോപ്പിലേക്ക് രക്ഷപ്പെടാന്‍ ശ്രമിക്കുന്നതിനിടെ ബിഹാറിലെ റക്സോളില്‍ പിടിക്കപ്പെട്ട സൈന്യത്തില്‍ നിന്ന് വിട്ടുപോയ രാജ്ബീര്‍ സിംഗ് 'ഫൗജി', പട്യാല കന്റോണ്‍മെന്റിന്റെ ദൃശ്യങ്ങള്‍ ചോര്‍ത്തിയതിന് അറസ്റ്റിലായ കൈതലില്‍ നിന്നുള്ള ബിരുദാനന്തര ബിരുദ വിദ്യാര്‍ത്ഥി ദേവേന്ദര്‍ സിംഗ് എന്നിവരുള്‍പ്പെടെ ഒരു ഡസന്‍ വ്യക്തികളെ കേസില്‍ അറസ്റ്റ് ചെയ്തിട്ടുണ്ട്.

a man from ambala in haryana was arrested for allegedly spying for pakistan and sharing sensitive military and air force information with pakistan-based handlers. the arrest is part of intensified counter-espionage efforts following operation sindoor.