അഹമ്മദാബാദ്: ലിസ്റ്റ് എ ക്രിക്കറ്റിൽ കേരളത്തിനൊപ്പം ചരിത്രം സൃഷ്ടിച്ച് വിഷ്ണു വിനോദ്. വിജയ് ഹസാരെ ട്രോഫിയിൽ പുതുച്ചേരിക്കെതിരെയുള്ള മത്സരത്തിൽ  തകർപ്പൻ പ്രകടനമാണ് വിഷ്ണു നടത്തിയത്. മത്സരത്തിൽ സെഞ്ച്വറി നേടിയാണ് താരം തിളങ്ങിയത്. 84 പന്തിൽ പുറത്താവാതെ 162 നേടിയാണ് വിഷ്ണു കേരളത്തിന്റെ വിജയശില്പിയായത്. 13 ഫോറുകളും 14 കൂറ്റൻ സിക്സുകളും ആണ് താരത്തിന്റെ ബാറ്റിൽ നിന്നും പിറന്നത്.

മത്സരത്തിൽ നേടിയ 14 സിക്സുകൾക്ക് പിന്നാലെ ലിസ്റ്റ് എ ക്രിക്കറ്റിൽ ഒരു മത്സരത്തിൽ കേരളത്തിന് വേണ്ടി ഏറ്റവും കൂടുതൽ സിക്സുകൾ നേടുന്ന താരമായും വിഷ്ണു വിനോദ് വീണ്ടും ഒന്നാം സ്ഥാനത്തെത്തി. സ്വന്തം റെക്കോർഡ് തകർത്തുകൊണ്ടാണ് വിഷ്ണു വീണ്ടും അമ്പരപ്പിച്ചത്. 2019 ചണ്ടീഗണ്ടിനെതിരെ 11 സിക്സുകൾ ആയിരുന്നു വിഷ്ണു നേടിയിരുന്നത്. കേരള ക്യാപ്റ്റൻ രോഹൻ കുന്നുമ്മലും ഈ നേട്ടത്തിൽ വിഷ്ണുവിനൊപ്പമുണ്ട്. 

ഈ വർഷമാണ് രോഹൻ കുന്നുമ്മൽ ജാർഖണ്ഡിനെതിരെ 11 സിക്സുകൾ നേടിയത്. മത്സരത്തിൽ രോഹൻ 78 പന്തിൽ 124 റൺസ് നേടിയാണ് തിളങ്ങിയത്. എട്ട് ഫോറുകളും 11 സിക്സുകളും അടങ്ങുന്നതായിരുന്നു കേരള ക്യാപ്റ്റന്റെ ഇന്നിംഗ്സ്. 

ഈ പട്ടികയിൽ ഇവർക്ക് പുറകിലുള്ളത് സഞ്ജു സാംസണും റോബിൻ ഉത്തപ്പയുമാണ്. ഇരുവരും 10 സിക്സുകൾ വീതമാണ് നേടിയത്. സഞ്ജു 2019ൽ ഗോവക്കെതിരെയും  ഉത്തപ്പ 2021ൽ ബീഹാറിനെതിരെയുമാണ് 10 സിക്സുകൾ നേടിയത്. 

അതേസമയം മത്സരത്തിൽ പുതുച്ചേരിക്കെതിരെ എട്ട് വിക്കറ്റുകളുടെ തകർപ്പൻ വിജയമാണ് കേരളം സ്വന്തമാക്കിയത്. മത്സരത്തിൽ ആദ്യം ബാറ്റ് ചെയ്ത പുതുച്ചേരി 47.4 ഓവറിൽ 247 റൺസിന്‌ പുറത്തായി. മറുപടി ബാറ്റിങ്ങിനിറങ്ങിയ കേരളം രണ്ട് വിക്കറ്റ് നഷ്ടത്തിൽ ലക്ഷ്യം അനായാസമായി മറികടന്നു. 

വിഷ്ണുവിന് പുറമെ കേരളത്തിനായി ബാബ അപരജിത്‌ അർദ്ധ സെഞ്ച്വറിയും നേടി. 69 പന്തിൽ 63 റൺസാണ് താരം നേടിയത്. കേരളത്തിനായി ബൗളിങ്ങിൽ മികച്ച പ്രകടനം നടത്തിയത് എംഡി നിതീഷ് ആണ്. എതിരാളികളുടെ നാല് വിക്കറ്റുകളാണ്‌ താരം നേടിയത്. ഏദൻ ആപ്പിൾ ടോം, അങ്കിത് ശർമ്മ എന്നിവർ രണ്ട് വീതം വിക്കറ്റുകളും ബിജു നാരായണൻ, അപരജിത്‌ എന്നിവർ ഓരോ വിക്കറ്റും വീഴ്ത്തി.

Vishnu Vinod creates history with Kerala in List A cricket. Vishnu performed brilliantly in the match against Puducherry in the Vijay Hazare Trophy. The player shone by scoring a century in the match. After hitting 14 sixes in the match, Vishnu Vinod has once again become the player who has hit the most sixes for Kerala in a single match in List A cricket.