തിരുവനന്തപുരം: പി.ടി ഉഷയെ വിമര്‍ശിച്ച് സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി ദാസന്‍. ടിന്റു ലൂക്കയെ ഉഷ തള്ളിപ്പറഞ്ഞതിനെ വിമര്‍ശിച്ചാണ് ടി.പി ദാസന്‍ രംഗത്തെത്തിയത്. ടിന്റുവിന് കുറവുകള്‍ ഉണ്ടായിരുന്നെങ്കില്‍ അത് നേരത്തെ പറയണമായിരുന്നു. അല്ലെങ്കില്‍ മറ്റേതെങ്കിലും പരിശീലകന്റെ കീഴില്‍ വിടണമായിരുന്നു. പരിശീലന രീതിയും ശൈലിയും മാറ്റണമെന്ന് നേരത്തെ പറഞ്ഞിട്ടും അവയൊന്നും കേട്ടില്ല.അതിനാല്‍ ഇപ്പോള്‍ ടിന്റുവിനെതിരേ പറയുന്നത് ശരിയല്ലെന്നും ടി.പി ദാസന്‍ പറഞ്ഞു.

റിയോ ഒളിംപിക്‌സില്‍ ടിന്റു ലൂക്ക മല്‍സരിച്ച 800 മീറ്ററില്‍ പ്രാഥമിക റൗണ്ടില്‍ തന്നെ പുറത്തായിരുന്നു. ഹീറ്റിസില്‍ ആറാമതായാണ് ടിന്റു ഫിനിഷ് ചെയ്തത്. ഇതിനെതിരേ ടിന്റുവിന്റെ ബന്ധുക്കള്‍ ഉഷയ്ക്കും ഉഷ സ്‌കൂളിനുമെതിരേ ആരോപണങ്ങള്‍ ഉന്നയിച്ചിരുന്നു.

റിയോയില്‍ ടിന്റു ലൂക്കയില്‍ നിന്നും ഇതിലും മികച്ച പ്രകടനമൊന്നും താന്‍ പ്രതീക്ഷിച്ചിരുന്നില്ലെന്നും തനിക്ക് ചെയ്യാന്‍ കഴിയുന്നതൊക്കെ പരിശീലക എന്ന നിലയില്‍ ചെയ്തിട്ടുണ്ടെന്നും ഉഷ പറഞ്ഞിരുന്നു. ടിന്റുവില്‍ നിന്നും ഇതില്‍ കൂടുതല്‍ പ്രതീക്ഷിക്കാനില്ലെന്നും പറഞ്ഞതിനെതിരേയാണ് ടി.പി ദാസന്‍ രംഗത്തെത്തിയത്.