ബംഗളൂരു: വിവാദങ്ങള്‍ കെട്ടടങ്ങും മുന്‍പെ കര്‍ണാടകയില്‍ വീണ്ടും ബുള്‍ഡോസര്‍ രാജ്. ബംഗളൂരു നോര്‍ത്തിലെ തനിസാന്ദ്രയില്‍ 20ലധികം വീടുകള്‍ ബംഗളൂരു ഡവര്‍ലപ്പ്‌മെന്റ് അതോറിറ്റി പൊളിച്ചുനീക്കി.ഒരു നോട്ടിസ് പോലും നല്‍കാതെയാണ് ബി.ഡി.എ നടപടി. 

പുലര്‍ച്ചെ തന്നെ ഒഴിപ്പിക്കല്‍ നടപടികള്‍ ആരംഭിച്ചതായി പ്രദേശവാസികള്‍ പറയുന്നു. ഒറ്റരാത്രികൊണ്ട് തങ്ങള്‍ വഴിയാധാരമായതായും ഇവര്‍ ചൂണ്ടിക്കാട്ടി. നോട്ടിസ് നല്‍കാതെയായിരുന്നു നടപടിയെന്ന് ബി.ഡി.എ തന്നെ സമ്മതിച്ചിട്ടുണ്ട്. 

ബിഡിഎ ഉദ്യോഗസ്ഥരും പൊലിസ് ഉദ്യോഗസ്ഥരും നാല് മണ്ണുമാന്തി യന്ത്രങ്ങളുമായി രാവിലെ 7 മണിക്ക് സ്ഥലത്തെത്തി. വീടുകളുടെ വാതിലില്‍ മുട്ടി, കെട്ടിടങ്ങള്‍ പൊളിച്ചുമാറ്റാന്‍ ഉത്തരവ് പുറപ്പെടുവിച്ചിട്ടുണ്ടെന്ന് പറഞ്ഞ് താമസക്കാരോട് ഉടന്‍ ഒഴിഞ്ഞുപോകാന്‍ ആവശ്യപ്പെട്ടു. 

ബി.ഡി.എയുടെ ഉടമസ്ഥതയിലുള്ള ഭൂമിയിലാണ് വീടുകള്‍ നിര്‍മ്മിച്ചിരിക്കുന്നതെന്നാണ് ഉദ്യോഗസ്ഥര്‍ അവകാശപ്പെടുന്നത്. എന്നാല്‍ ഇ-ഖാറ്റ സര്‍ട്ടിഫിക്കറ്റുകള്‍ ഉള്‍പ്പെടെയുള്ള സാധുവായ രേഖകള്‍ തങ്ങളുടെ കൈവശമുണ്ടെന്ന് പ്രദേശവാസികള്‍ പറയുന്നു. പതിവായി ഭൂ നികുതി അടയ്ക്കുന്നുണ്ടെന്നും അവര്‍ പറയുന്നു. 20 വര്‍ഷമായി പ്രദേശത്ത് താമസിക്കുന്നുണ്ടെന്നും ഒരു പ്രശ്നവും ഉണ്ടാകില്ലെന്ന് മന്ത്രി കൃഷ്ണഭൈരഗൗഡ ഉറപ്പ് നല്‍കിയിരുന്നതായും താമസക്കാര്‍ വ്യക്തമാക്കി.

കൊഗിലു ലേ ഔട്ടിലെ വസീം കോളനി, ഫക്കീര്‍ കോളനി പൊളിക്കലിന്റെ ചൂടാറും മുന്‍പേയാണ് പുതിയ നടപടി. വൃദ്ധരും സ്ത്രീകളും കുഞ്ഞുങ്ങളും ഉള്‍പെടെ നൂറുകണക്കിനാളുകളാണ് അന്നും വഴിയാധാരമായത്. രോഗികളും ഗര്‍ഭിണികളും വരെ സംഘത്തിലുണ്ടായിരുന്നു. മുസ്‌ലിം, ദലിത് കുടുംബങ്ങളാണ് അന്ന് തെരുവിലാക്കപ്പെട്ടത്. രാജ്യമെങ്ങും നടപടിക്കെതിരെ കടുത്ത വിമര്‍ശനം ഉയര്‍ന്നിരുന്നു. 

ALSO READ: ഷാജഹാന്റെ ഉറൂസിനായി ഒരുങ്ങി താജ്മഹൽ; ഖവാലിയും മൗലീദും ഉയരും, രഹസ്യഅറ തുറക്കും, ജനങ്ങൾക്ക് സൗജന്യ പ്രവേശനത്തിന്റെ മൂന്ന് നാളുകൾ വിരുന്നെത്തി

ബിഡിഎയുടെ കണക്കനുസരിച്ച് തനിസാന്ദ്രയില്‍ ഏകദേശം രണ്ട് ഏക്കറോളം വ്യാപിച്ചുകിടക്കുന്ന വീടുകള്‍, ഗാരേജുകള്‍, ഗോഡൗണുകള്‍ എന്നിവ പൊളിച്ചുമാറ്റിയിരിക്കുന്നത്, ഏകദേശം 80 കോടി രൂപ വിലമതിക്കുന്ന ഭൂമി തിരിച്ചുപിടിച്ചതായി ഉദ്യോഗസ്ഥര്‍ അവകാശപ്പെടുന്നു. 2004-ല്‍ അര്‍ക്കാവതി ലേഔട്ട് പദ്ധതിക്കായി ഭൂമി നോട്ടിസ് നല്‍കിയിരുന്നുവെന്നാണ് ഉദ്യോഗസ്ഥര്‍ അവകാശപ്പെടുന്നത്. കോടതി ഉത്തരവിനെക്കുറിച്ചും വരാനിരിക്കുന്ന നടപടിയെക്കുറിച്ചും താമസക്കാരെ അറിയിച്ചിരുന്നുവെന്നും അവര്‍ പറയുന്നു.

എന്നാല്‍ പ്രദേശവാസികള്‍ ഈ അവകാശവാദത്തെ ശക്തമായി എതിര്‍ത്തു. പൊലിസ് ഉദ്യോഗസ്ഥരുടെയും നാല് മണ്ണുമാന്തി തൊഴിലാളികളുടെയും അകമ്പടിയോടെ രാവിലെ 7 മണിയോടെ ബിഡിഎ ഉദ്യോഗസ്ഥര്‍ എത്തി, വാതിലുകളില്‍ മുട്ടി, താമസക്കാരോട് ഉടന്‍ ഒഴിഞ്ഞുപോകാന്‍ ഉത്തരവിട്ടു, പൊളിച്ചുമാറ്റല്‍ ഉത്തരവ് ഇതിനകം പുറപ്പെടുവിച്ചിട്ടുണ്ടെന്നും പറഞ്ഞു. രേഖാമൂലമുള്ള അറിയിപ്പ് ഒരിക്കലും നല്‍കിയിട്ടില്ലെന്ന് താമസക്കാര്‍ ഉറപ്പിച്ചു പറയുന്നു. 

''ഞങ്ങള്‍ ഏകദേശം 20 വര്‍ഷമായി ഇവിടെ താമസിക്കുന്നു. ഞങ്ങള്‍ക്ക് ഒരു ഇ-ഖാത, വൈദ്യുതി കണക്ഷന്‍, എല്ലാ സ്വത്ത് രേഖകളും ഉണ്ട്. അവര്‍ ഞങ്ങളുടെ സാധനങ്ങള്‍ വലിച്ചെറിഞ്ഞു, ഇപ്പോള്‍ ഞങ്ങള്‍ക്ക് ഉറങ്ങാന്‍ പോലും സ്ഥലമില്ല,''  ഒരു താമസക്കാരനെ ഉദ്ധരിച്ച് ഡെക്കാന്‍ ഹെറാള്‍ഡ് റിപ്പോര്‍ട്ട് ചെയ്യുന്നു.

''ഇപ്പോള്‍, പോകാന്‍ ഒരിടവുമില്ലാതെ, ഞാന്‍ തെരുവില്‍ കഴിയാന്‍ നിര്‍ബന്ധിതയായിരിക്കുന്നു,'' വൃക്ക സംബന്ധമായ ആരോഗ്യപ്രശ്‌നങ്ങളുണ്ടെന്നും മാസങ്ങളായി വിശ്രമത്തിലാണെന്നും പറഞ്ഞ 25 കാരിയായ ആസിയയുടെ അവസ്ഥ ദി ഹിന്ദു വ്യക്തമാക്കുന്നു.

നടപടി സാമൂഹിക മാധ്യമങ്ങളിലും രൂക്ഷ വിമര്‍ശനമുയര്‍ത്തുന്നുണ്ട്.

'വടക്കന്‍ ബംഗളൂരുവിലെ സാരൈപല്യയില്‍ അതിരാവിലെ നടന്ന പൊളിച്ചുമാറ്റലുകള്‍. ബിഡിഎ നടത്തിയ പൊളിച്ചുമാറ്റല്‍ ദൗത്യം താമസക്കാരെ ദുരിതത്തിലാക്കിയിരിക്കുകയാണ്. നോട്ടിസുകളല്ല, ജെസിബികള്‍ കണ്ടാണ് കുടുംബങ്ങള്‍ ഉണര്‍ന്നത്. മുന്‍കൂര്‍ അറിയിപ്പ് നല്‍കിയിരുന്നില്ലെന്ന് നാട്ടുകാര്‍ പറയുന്നു. പുലര്‍ച്ചെ വീടുകള്‍ പൊളിച്ചുമാറ്റി, തമാസക്കാരെ കുടിയൊഴിപ്പിച്ചു.  വീട്ടുപകരണങ്ങള്‍ തെരുവിലേക്ക് വലിച്ചെറിഞ്ഞു. കുട്ടികള്‍ക്ക് ഭക്ഷണമോ പാല് പോലുമോ കിട്ടാനില്ല, പോകാന്‍ ഒരിടവുമില്ലാതെ കുടുംബങ്ങള്‍ വലഞ്ഞു,' ബെംഗളൂരു ആസ്ഥാനമായി പ്രവര്‍ത്തിക്കുന്ന ആള്‍ട്ട് ന്യൂസിന്റെ സഹസ്ഥാപകനായ മുഹമ്മദ് സുബൈര്‍ എക്‌സില്‍ പോസ്റ്റ് ചെയ്തു.

നിയമപരമായ കുടിയൊഴിപ്പിക്കല്‍ ഇങ്ങനെയാണോ? നടപടി ആവശ്യമായി വന്നാല്‍ പോലും, ജനങ്ങളുടെ ജീവിതം ഒറ്റരാത്രികൊണ്ട് കീഴ്‌മേല്‍ മറിക്കുന്നതിനുപകരം അടിസ്ഥാന മനുഷ്യത്വത്തോടും സഹാനുഭൂതിയോടും കൂടി സര്‍ക്കാര്‍ അത് കൈകാര്യം ചെയ്യേണ്ടിയിരുന്നില്ലേ?- അദ്ദേഹം ചോദിക്കുന്നു. 

കരുണയില്ലാത്ത ഭരണം അസ്വീകാര്യമാണെന്നും അദ്ദേഹം എക്‌സില്‍ കുറിച്ചു. പ്രദേശത്തു നിന്നുള്ള ചിത്രങ്ങളും വീഡിയോകളും അദ്ദേഹം എക്‌സില്‍ ഷെയര്‍ ചെയ്തിട്ടുണ്ട്. 

അതേസമയം, ബി.ഡി.എയുടെ സ്‌പെഷ്യല്‍ ടാസ്‌ക് ഫോഴ്സിന് (എസ്ടിഎഫ്) വീഴ്ച സംഭവിച്ചിട്ടുണ്ടെന്ന് കമ്മീഷണര്‍ പി. മണിവണ്ണന്‍ സമ്മതിച്ചു, 

''ഞങ്ങള്‍ രേഖകള്‍ പരിശോധിച്ചാണ് പൊളിക്കല്‍ പ്രവര്‍ത്തനങ്ങള്‍ ആരംഭിച്ചത്. ഞങ്ങളുടെ രേഖകള്‍ പ്രകാരം ഈ ഭൂമി  ബിഡിഎയുടേതാണ്, പക്ഷേ നോട്ടിസ് നല്‍കാതെയാണ് പൊളിച്ചുമാറ്റല്‍ നടത്തിയത്,'' അദ്ദേഹം പറഞ്ഞതായി ദി ഹിന്ദു റിപ്പോര്‍ട്ട് ചെയ്യുന്നു.

പുനരധിവാസത്തിനുള്ള ക്രമീകരണങ്ങള്‍ ബി.ഡി.എ നടത്തുമെന്നും അനുബന്ധ ചെലവുകള്‍ വഹിക്കുമെന്നും മണിവണ്ണന്‍ പറഞ്ഞു. വീഴ്ചകളെക്കുറിച്ച് അന്വേഷിക്കാന്‍ ഉത്തരവിട്ടിട്ടുണ്ടെന്നും അദ്ദേഹം പ്രഖ്യാപിച്ചു.

വിഷയം അന്വേഷിച്ച് 30 ദിവസത്തിനുള്ളില്‍ റിപ്പോര്‍ട്ട് സമര്‍പ്പിക്കാന്‍ വിരമിച്ച ജസ്റ്റിസ് നിയാസ് അഹമ്മദിനെ നിയമിച്ചതായും റിപ്പോര്‍ട്ടുകള്‍ പറയുന്നു.

കൊഗിലു ലേ ബുള്‍ഡോസര്‍ രാജ് ഇരകള്‍ കര്‍ണാടക ഹൈക്കോടതിയില്‍ 
ബംഗളൂരു: കൊഗിലു ലേ ഔട്ടിലെ വസീം കോളനി, ഫക്കീര്‍ കോളനി എന്നിവിടങ്ങളില്‍ കര്‍ണാടക സര്‍ക്കാറിന്റെ ഗ്രേറ്റര്‍ ബംഗളൂരു അതോറിറ്റി (ജി.ബി.എ) നടത്തിയ ബുള്‍ഡോസര്‍ രാജ് ഇരകള്‍ ഹൈക്കോടതിയെ സമീപിച്ചു, ബുള്‍ഡോസര്‍ രാജ് ഇരകളായ ജൈബ തബസ്സും, റെഹാന, ആരിഫ് ബീഗം എന്നിവരാണ് കര്‍ണാടക ഹൈക്കോടതിയില്‍ പൊതുതാല്‍പര്യ ഹരജി (പി.ഐ.എല്‍) ഫയല്‍ ചെയ്തത്. 

ഒഴിപ്പിക്കലിന് കുറഞ്ഞത് 15 ദിവസത്തെ സമയവും കാരണംകാണിക്കല്‍ നോട്ടിസും വേണമെന്ന സുപ്രിംകോടതി മാര്‍ഗനിര്‍ദേശങ്ങളുടെ ലംഘനമാണ് നടപടിയെന്ന് ഹരജിക്കാര്‍ ചൂണ്ടിക്കാട്ടുന്നു. വീടുകള്‍ ഇടിച്ചുനിരത്തിയ സമയത്ത് കുടുംബങ്ങളിലെ കുട്ടികളുടെ പാഠപുസ്തകങ്ങള്‍, യൂനിഫോമുകള്‍, സമീപത്തെ സര്‍ക്കാര്‍ സ്‌കൂളുകളില്‍ പഠിക്കുന്ന വിദ്യാര്‍ഥികളുടെ ഹാള്‍ ടിക്കറ്റുകള്‍ എന്നിവയുള്‍പ്പെടെയുള്ള നിര്‍ണായക വസ്തുക്കള്‍ നശിച്ചുവെന്ന് ഹരജിയില്‍ പറയുന്നു.

അഞ്ച് കിലോമീറ്റര്‍ ചുറ്റളവില്‍ അടിയന്തര പുനരധിവാസമോ ബദല്‍ താമസ സൗകര്യമോ ഒരുക്കണമെന്നും ഹരജിക്കാര്‍ ആവശ്യപ്പെടുന്നു. തകര്‍ന്ന വീടുകള്‍ക്ക് നഷ്ടപരിഹാരം നല്‍കണമെന്നും ഈ പ്രക്രിയയില്‍ പരിക്കേറ്റവര്‍ക്ക് വൈദ്യസഹായം നല്‍കണമെന്നും ആവശ്യമുയര്‍ത്തിയിട്ടുണ്ട്.