ചെന്നൈ: രാത്രി 10 മണി കഴിഞ്ഞ നേരത്ത് മൂന്ന് പാക്കറ്റ് എലിവിഷത്തിനായി വന്ന ഒരു ഓർഡർ. സാധാരണഗതിയിൽ ഒരു ഡെലിവറി ഏജന്റിന് അത് വെറുമൊരു ജോലി മാത്രമാണ്. എന്നാൽ, ചെന്നൈയിലെ ഒരു ബ്ലിങ്കിറ്റ് ഏജന്റിന് ആ ഓർഡർ നൽകിയ വിലാസത്തിലേക്ക് എത്തിയപ്പോൾ എന്തോ പന്തികേട് തോന്നി. ആ സംശയം ഒരു യുവതിയുടെ ജീവൻ രക്ഷിക്കുന്നതിലാണ് അവസാനിച്ചത്.

സംഭവത്തിന്റെ തുടക്കം

രാത്രി വൈകി ചെന്നൈയിലെ ഒരു വീട്ടിൽ നിന്നാണ് എലിവിഷത്തിനായി ഓർഡർ ലഭിച്ചത്. സാധനങ്ങളുമായി വീട്ടിലെത്തിയ ഏജന്റ് കണ്ടത് കരഞ്ഞു കലങ്ങിയ കണ്ണുകളുമായി വാതിൽ തുറന്ന യുവതിയെയാണ്. അവരുടെ മുഖത്തെ പരിഭ്രമവും അസമയത്തെ എലിവിഷം ഓർഡറും കണ്ടതോടെ റൈഡറുടെ ഉള്ളിൽ അപകടസൂചന മുഴങ്ങി. യുവതി ആത്മഹത്യയ്ക്ക് ശ്രമിക്കുകയാണോ എന്ന സംശയം അദ്ദേഹത്തിൽ ബലപ്പെട്ടു.

ALSO READ: മുണ്ടക്കൈ - ചൂരൽമല പുനരധിവാസം: നൂറ് വീടുകളുമായി കോൺഗ്രസ്; ഭൂമി രജിസ്ട്രേഷൻ തിയതി പ്രഖ്യാപിച്ചു

കരുതലോടെയുള്ള ഇടപെടൽ

സാധനം കൈമാറി മടങ്ങുന്നതിന് പകരം, ആ യുവതിയോട് സംസാരിക്കാൻ അദ്ദേഹം തയ്യാറായി. "എന്തിനാണ് ഈ സമയത്ത് ഇത് ഓർഡർ ചെയ്തത്?" എന്ന അദ്ദേഹത്തിന്റെ ചോദ്യത്തിന് മുന്നിൽ യുവതി ആദ്യം പതറി. തനിക്ക് ദോഷകരമായ ചിന്തകളൊന്നുമില്ലെന്ന് അവർ പറഞ്ഞെങ്കിലും റൈഡർ പിന്മാറിയില്ല. സഹോദരതുല്യമായ സ്നേഹത്തോടെയും കരുതലോടെയും അദ്ദേഹം അവരെ ആശ്വസിപ്പിക്കാൻ തുടങ്ങി.

"ജീവൻ അമൂല്യമാണ്, ഏത് പ്രതിസന്ധിയും കടന്നുപോകും. ദയവായി തെറ്റായ തീരുമാനങ്ങൾ എടുക്കരുത്," എന്ന് അദ്ദേഹം അവരെ ഓർമ്മിപ്പിച്ചു.

മാറ്റിവെച്ച ദുരന്തം

ഏജന്റിന്റെ സ്നേഹപൂർണ്ണമായ പെരുമാറ്റവും ഉപദേശവും ആ യുവതിയുടെ മനസ്സ് മാറ്റി. ഒടുവിൽ വിഷം വാങ്ങാൻ അവർ വിസമ്മതിക്കുകയും ഓർഡർ ക്യാൻസൽ ചെയ്യുകയും ചെയ്തു. വിഷം അവിടെ നൽകാതെ അദ്ദേഹം തിരികെ കൊണ്ടുപോയി. "ഇന്ന് വലിയൊരു കാര്യം ചെയ്ത സംതൃപ്തിയിലാണ് ഞാൻ," എന്ന് താൻ പങ്കുവെച്ച വീഡിയോയിൽ ആ യുവാവ് വൈകാരികമായി പറഞ്ഞു.

സോഷ്യൽ മീഡിയയിൽ തരംഗമായി വീഡിയോ

 

 

 

 

 

View this post on Instagram

 

 

 

 

 

 

 

 

 

 

 

A post shared by ✨...RDS...✨ (@dilli_rider_)

ഇൻസ്റ്റാഗ്രാമിലൂടെ ഈ അനുഭവം പങ്കുവെച്ചതോടെ വീഡിയോ നിമിഷനേരം കൊണ്ട് വൈറലായി. "എല്ലാ ഹീറോകളും കേപ്പ് ധരിക്കാറില്ല, ചിലർ മഞ്ഞ ടീഷർട്ടും ധരിക്കാറുണ്ട്" എന്നാണ് നെറ്റിസൺസ് ബ്ലിങ്കിറ്റ് ഏജന്റിനെ പ്രശംസിച്ചുകൊണ്ട് കുറിച്ചത്. കേവലം ഒരു ഡെലിവറി പാർട്ണർ എന്നതിലുപരി സഹജീവി സ്നേഹം ഉയർത്തിപ്പിടിച്ച ഈ യുവാവ് ഇന്ന് സമൂഹത്തിന് മാതൃകയാവുകയാണ്.