ദുബൈ: ലോകത്തെ ഏറ്റവും വലിയ കുടുംബ വിനോദ-സാംസ്കാരിക ഇടമായ ദുബൈ ഗ്ലോബൽ വില്ലേജിന്റെ 30-ാം സീസൺ മേയ് 10ന് സമാപിക്കും. ലോകത്തിന്റെ വിവിധ കോണുകളിൽ നിന്നുള്ള തൊണ്ണൂറിലേറെ സംസ്കാരങ്ങൾ അണിനിരക്കുന്ന ഈ ആഘോഷ വേദി 31-ാം സീസണുമായി വർഷാവസാനം വീണ്ടും സജീവമാകുമെന്നും അധികൃതർ അറിയിച്ചു. മുപ്പതാം വാർഷിക നിറവിലുള്ള ഗ്ലോബൽ വില്ലേജ് ഇത്തവണയും സന്ദർശകർക്കായി വിപുലമായ സൗകര്യങ്ങളാണ് ഒരുക്കിയിരിക്കുന്നത്. സീസൺ അവസാനിക്കാൻ ഏതാനും മാസങ്ങൾ കൂടി ബാക്കി നിൽക്കെ, ജനുവരിയിൽ വൈവിധ്യമാർന്ന കലാപരിപാടികൾ സന്ദർശകരെ കാത്തിരിക്കുന്നു. ലോക പ്രശസ്ത താരങ്ങളെ നേരിൽ കാണാനും, ലോകോത്തര നിലവാരത്തിലുള്ള സ്റ്റേജ് ഷോകൾ ആസ്വദിക്കാനും, വിവിധ രാജ്യങ്ങളുടെ തനത് രുചികൾ പരീക്ഷിക്കാനും ഇനിയും അവസരമുണ്ട്.

ഗ്ലോബൽ വില്ലേജിന് പുറമെ, ജനുവരിയിൽ യു.എ.ഇയിൽ എല്ലായിടത്തും വിനോദ പരിപാടികൾ അരങ്ങേറുന്നുണ്ട്. പ്രശസ്ത സംഗീതജ്ഞരുടെ കച്ചേരികൾ, ഭക്ഷണ പ്രിയർക്കായി ഫുഡ് ഫെസ്റ്റിവലുകൾ തുടങ്ങി വൈവിധ്യമാർന്ന ആഘോഷങ്ങളാൽ സമ്പന്നമാണ് ഈ മാസം. ഓരോ പരിപാടികളുടെയും ടിക്കറ്റ് നിരക്കുകളും മറ്റു വിവരങ്ങളും ലഭ്യമായതിനാൽ താമസക്കാർക്കും വിനോദ സഞ്ചാരികൾക്കും അവരുടെ ബജറ്റിനനുസരിച്ച് ആഘോഷങ്ങൾ തെരഞ്ഞെടുക്കാവുന്നതാണ്. വേനൽക്കാല അവധിക്ക് മുൻപായി ഈ വിസ്മയക്കാഴ്ചകൾ നേരിൽ കാണാൻ വരുംദിവസങ്ങളിൽ സന്ദർശകരുടെ വലിയ പ്രവാഹം തന്നെയുണ്ടാകുമെന്നാണ് സംഘാടകർ പ്രതീക്ഷിക്കുന്നത്.

കുട്ടികൾക്കും മുതിർന്നവർക്കും ഒരു പോലെ ആസ്വദിക്കാവുന്ന വിനോദ റൈഡുകളും ഷോപ്പിങ് അനുഭവങ്ങളും ഗ്ലോബൽ വില്ലേജിനെ കുടുംബങ്ങളുടെ പ്രിയപ്പെട്ട ഇടമാക്കി മാറ്റുന്നു.