തെഹ്‌റാൻ: ഇറാനിലെ ഭരണകൂട വിരുദ്ധ പ്രതിഷേധം കടുക്കുന്നു. പ്രതിഷേധക്കാരുടെ ഏക ആശയവിനിമയ മാർഗ്ഗമായിരുന്ന സ്റ്റാർലിങ്ക് (Starlink) സാറ്റലൈറ്റ് ഇന്റർനെറ്റും സർക്കാർ തകർത്തു എന്ന തരത്തിലുള്ള റിപ്പോർട്ടുകളാണ് ഇപ്പോൾ പുറത്തുവന്നു കൊണ്ടിരിക്കുന്നത്. വിദേശരാജ്യങ്ങളിൽ നിന്നുള്ള അത്യാധുനിക 'കിൽ സ്വിച്ച്' (Kill Switch) സാങ്കേതികവിദ്യ ഉപയോഗിച്ചാണ് ഇലോൺ മസ്കിന്റെ സ്റ്റാർലിങ്ക് സേവനങ്ങളെ ഇറാൻ തടസ്സപ്പെടുത്തിയിരിക്കുന്നത്.

രാജ്യത്തെ ഇന്റർനെറ്റ് സേവനങ്ങൾ ഭരണകൂടം പൂർണ്ണമായി വിച്ഛേദിച്ചപ്പോൾ, പ്രതിഷേധക്കാർ വിവരങ്ങൾ പുറംലോകത്തെത്തിക്കാൻ ആശ്രയിച്ചിരുന്നത് സ്റ്റാർലിങ്കിനെയായിരുന്നു. എന്നാൽ, കഴിഞ്ഞ ഏതാനും ദിവസങ്ങൾക്കുള്ളിൽ സ്റ്റാർലിങ്കിന്റെ പ്രവർത്തനക്ഷമത 80 ശതമാനത്തിലധികം കുറഞ്ഞതായി 'ഇറാൻ വയർ' റിപ്പോർട്ട് ചെയ്യുന്നു. മിലിട്ടറി-ഗ്രേഡ് ജാമിംഗ് ഉപകരണങ്ങൾ ഉപയോഗിച്ചാണ് ഈ തടസ്സം സൃഷ്ടിച്ചിരിക്കുന്നത്. ഇത്രയും സങ്കീർണ്ണമായ സാങ്കേതികവിദ്യ ഇറാൻ സ്വന്തമായി വികസിപ്പിച്ചതല്ലെന്നും, റഷ്യയോ ചൈനയോ നൽകിയതാകാമെന്നുമാണ് സൈബർ വിദഗ്ധർ വിലയിരുത്തുന്നത്.

ALSO READ: ഇറാനിലെ പ്രക്ഷോഭത്തിൽ മരണസംഖ്യ 200 കടന്നു; സൈനിക നീക്കം വിലയിരുത്തി ട്രംപ്, തിരിച്ചടിക്കുമെന്നുറപ്പിച്ച് ഇറാൻ 

യുക്രെയ്ൻ യുദ്ധത്തിൽ സ്റ്റാർലിങ്കിനെ തടസ്സപ്പെടുത്താൻ റഷ്യ സമാനമായ രീതികൾ ഉപയോഗിച്ചിരുന്നു. ചൈനയും ഇത്തരം ഇലക്ട്രോണിക് യുദ്ധമുറകളിൽ (Electronic Warfare) വൻതോതിൽ നിക്ഷേപം നടത്തിയിട്ടുണ്ട്. ഇറാൻ ഇപ്പോൾ പ്രയോഗിക്കുന്ന അതിശക്തമായ 'മൈക്രോവേവ് ജാമിംഗ്' ഉപഗ്രഹങ്ങളെ മാത്രമല്ല, രാജ്യത്തെ മൊബൈൽ വഴിയുള്ള ആശയവിനിമയങ്ങളെയും ബാധിക്കുന്നതായാണ് വിവരം. ഇത് സിവിലിയൻമാരുടെ ആരോഗ്യത്തിന് ഗുരുതരമായ ഭീഷണിയുയർത്തുന്നതായും റിപ്പോർട്ടുകളുണ്ട്.

ഇറാനിലെ ഇന്റർനെറ്റ് പുനഃസ്ഥാപിക്കുന്നതിനെക്കുറിച്ച് ഇലോൺ മസ്കുമായി സംസാരിക്കുമെന്ന് യുഎസ് പ്രസിഡന്റ് ഡോണാൾഡ് ട്രംപ് വ്യക്തമാക്കി. "നമ്മുടെ കൈവശം മികച്ച സാങ്കേതികവിദ്യയുണ്ട്, ഇലോൺ ഇക്കാര്യത്തിൽ മിടുക്കനാണ്," ട്രംപ് പറഞ്ഞു. സമാധാനപരമായ പ്രതിഷേധക്കാരെ കൊലപ്പെടുത്തിയാൽ ഇറാൻ ഭരണകൂടം വലിയ വില നൽകേണ്ടി വരുമെന്നും അമേരിക്കൻ സൈന്യം ഏതു നിമിഷവും നടപടിക്ക് തയ്യാറാണെന്നും ട്രംപ് മുന്നറിയിപ്പ് നൽകി.

ALSO READ: ലണ്ടനിലെ ഇറാൻ എംബസിയിൽ പ്രതിഷേധം; ഔദ്യോഗിക പതാക വലിച്ചെറിഞ്ഞ് പഴയ പതാക ഉയർത്തി 

കടുത്ത സാമ്പത്തിക പ്രതിസന്ധി ചൂണ്ടിക്കാട്ടി 280-ലധികം കേന്ദ്രങ്ങളിലാണ് ഇറാനിൽ പ്രതിഷേധം നടക്കുന്നത്. ഇതുവരെ 530-ലധികം പേർ കൊല്ലപ്പെടുകയും ആയിരക്കണക്കിന് ആളുകൾ അറസ്റ്റിലാകുകയും ചെയ്തു. 

ഇന്റർനെറ്റ് വിച്ഛേദിക്കുന്നത് വഴി ഓരോ മണിക്കൂറിലും 1.56 ദശലക്ഷം ഡോളറിന്റെ സാമ്പത്തിക നഷ്ടമാണ് ഇറാന്റെ സമ്പദ്‌വ്യവസ്ഥയ്ക്ക് ഉണ്ടാകുന്നത്. ശിക്ഷാ നടപടികൾ ഭയക്കാതെ 50,000-ത്തോളം പേർ ഇപ്പോഴും സ്റ്റാർലിങ്ക് ഉപകരണങ്ങൾ രഹസ്യമായി ഉപയോഗിക്കുന്നുണ്ടെന്നാണ് കണക്ക്.

iran has shut down starlink internet services with reported russian assistance as protests against the government intensify authorities tighten digital controls communication disruptions grow and global attention focuses on escalating unrest censorship measures and geopolitical implications affecting civil freedoms nationwide.