ന്യൂഡൽഹി: വോട്ടർ പട്ടിക തീവ്ര പരിശോധനയുടെ ഭാഗമായുള്ള എസ്ഐആർ (SIR) നടപടികളിൽ കാതലായ മാറ്റങ്ങൾ വരുത്തണമെന്ന് മുൻ നാവികസേനാ മേധാവി അഡ്മിറൽ അരുൺ പ്രകാശ്. ജനങ്ങളിൽ നിന്ന് കൂടുതൽ വിവരങ്ങൾ ശേഖരിക്കുന്നതിനായി നിലവിലെ ഫോമുകൾ പരിഷ്കരിക്കണമെന്നും ഉദ്യോഗസ്ഥർക്ക് മികച്ച പരിശീലനം നൽകണമെന്നും അദ്ദേഹം തെരഞ്ഞെടുപ്പ് കമ്മീഷനോട് ആവശ്യപ്പെട്ടു.

എസ്‌ഐആർ വോട്ടർ പരിശോധനയിൽ പരാജയപ്പെട്ട അദ്ദേഹത്തോടും ഭാര്യയോടും രേഖകൾ ഹാജരാക്കാൻ ആവശ്യപ്പെട്ട് തെരഞ്ഞെടുപ്പ് കമ്മീഷൻ നോട്ടീസ് അയച്ചിരുന്നു. 1971-ലെ യുദ്ധത്തിൽ വീർ ചക്ര നേടിയ മുൻ സേനാ മേധാവിയോട് നേരിട്ട് ഹാജരാകാൻ ആവശ്യപ്പെട്ടതിനെതിരെ സോഷ്യൽ മീഡിയയിൽ വലിയ പ്രതിഷേധമാണ് ഉയരുന്നത്. എന്നാൽ, തനിക്ക് പ്രത്യേക പരി​ഗണന ആവശ്യമില്ലെന്നും നിയമങ്ങൾ പാലിക്കാൻ ഏതൊരു പൗരനെയും പോലെ താനും ബാധ്യസ്ഥനാണെന്നും അദ്ദേഹം പ്രതികരിച്ചു.

ALSO READ: രാജ്യത്തെ പണപ്പെരുപ്പ നിരക്കിൽ വർദ്ധനവ്; മൂന്ന് മാസത്തിനിടയിലെ ഏറ്റവും ഉയർന്ന നിരക്ക് 

അരുൺ പ്രകാശ് മുന്നോട്ടുവെച്ച പ്രധാന നിർദ്ദേശങ്ങൾ

SIR ഫോമുകൾ പരിഷ്കരിക്കുക: വോട്ടറുടെ തൊഴിൽ, മുൻപത്തെ പരിശോധനയിലെ സ്ഥാനം തുടങ്ങിയ വിവരങ്ങൾ കൂടി ശേഖരിക്കാൻ പാകത്തിൽ ഫോമുകൾ മാറ്റണം.

പരിശീലനം ലഭിച്ച BLO-കൾ: രേഖകൾ പരിശോധിക്കുന്നതിനായി ബൂത്ത് ലെവൽ ഓഫീസർമാരായി (BLO) പൂർണ്ണ പരിശീലനം ലഭിച്ച യുവാക്കളെ നിയമിക്കണം.

ഓൺലൈൻ സൗകര്യം: തിരഞ്ഞെടുപ്പ് കമ്മീഷന്റെ വെബ്‌സൈറ്റിൽ രേഖകൾ നേരിട്ട് അപ്‌ലോഡ് ചെയ്യാനുള്ള സൗകര്യം ഉണ്ടെന്ന കാര്യം പൊതുജനങ്ങളെ അറിയിക്കണം.

കുടിയേറ്റ തൊഴിലാളികൾ: വീടുകളിൽ നിന്ന് അകലെ കഴിയുന്ന കുടിയേറ്റ തൊഴിലാളികൾക്ക് രേഖകൾ ഹാജരാക്കാൻ കഴിയാത്ത സാഹചര്യം കമ്മീഷൻ പ്രത്യേകം പരിഗണിക്കണം.

സമർപ്പിച്ച ഫോമുകളിൽ EPIC നമ്പർ, വോട്ടറുടെ പേര് തുടങ്ങിയ അടിസ്ഥാന വിവരങ്ങളുടെ അഭാവം മൂലമാണ് ഹിയറിംഗിനായി ഓട്ടോമാറ്റിക് നോട്ടീസ് ജനറേറ്റ് ചെയ്യപ്പെട്ടതെന്ന് തെരഞ്ഞെടുപ്പ് കമ്മീഷൻ വ്യക്തമാക്കി. സിസ്റ്റം അധിഷ്ഠിതമായ ഈ നടപടിക്രമം വോട്ടർമാരുടെ വിവരങ്ങൾ കൃത്യമായി പരിശോധിക്കാനാണെന്നും കമ്മീഷൻ അറിയിച്ചു.

ഇരുപത് വർഷം മുമ്പ് സേവനത്തിൽ നിന്ന് വിരമിച്ച തനിക്ക് പ്രത്യേക ആനുകൂല്യങ്ങളൊന്നും ആവശ്യമില്ലെന്നും തിരഞ്ഞെടുപ്പ് കമ്മീഷന്റെ (EC) അറിയിപ്പുകൾ പൗരനെന്ന നിലയിൽ കൃത്യമായി പാലിക്കുമെന്നും അഡ്മിറൽ അരുൺ പ്രകാശ് വ്യക്തമാക്കി. താനും ഭാര്യയും ഇതിനകം തന്നെ പരിശോധനാ ഫോമുകൾ പൂരിപ്പിച്ചു നൽകിയതായും 2026-ലെ ഗോവ കരട് വോട്ടർ പട്ടികയിൽ തങ്ങളുടെ പേരുകൾ ഉൾപ്പെട്ടതിൽ സന്തോഷമുണ്ടെന്നും അദ്ദേഹം ഞായറാഴ്ച പറഞ്ഞു. നിയമങ്ങൾ പാലിക്കാൻ താൻ ബാധ്യസ്ഥനാണെന്ന് വ്യക്തമാക്കിയ അദ്ദേഹം, വിരമിച്ച ശേഷം ഒരിക്കൽ പോലും പ്രത്യേക പരിഗണനയ്ക്കായി ശ്രമിച്ചിട്ടില്ലെന്നും കൂട്ടിച്ചേർത്തു.

the election commission has asked a former indian navy chief to submit documents after his name was missing from the voter list triggering strong reactions and protests on social media raising concerns over electoral rolls transparency voter rights and administrative accountability