2026-ലെ ഹെൻലി പാസ്‌പോർട്ട് സൂചിക പുറത്ത്. മുൻ വർഷത്തെ റാങ്കിംഗിനെ അപേക്ഷിച്ച് സൂചികയിൽ വലിയ മാറ്റങ്ങളൊന്നും ഉണ്ടായിട്ടില്ല. 192 രാജ്യങ്ങളിലേക്ക് വിസയില്ലാതെ യാത്ര ചെയ്യാൻ കഴിയുന്ന സിംഗപ്പൂരിന്റേതാണ് ലോകത്തിലെ ഏറ്റവും ശക്തമായ പാസ്‌പോർട്ട്. കഴിഞ്ഞ വർഷവും സൂചികയിൽ ഒന്നാം സ്ഥാനം സിങ്കപ്പൂരിനായിരുന്നു.

ജപ്പാനും ദക്ഷിണ കൊറിയയുമാണ് രണ്ടാം സ്ഥാനത്ത്. ഈ രാജ്യങ്ങളിൽ നിന്നുള്ള പൗരന്മാർക്ക് 188 രാജ്യങ്ങളിലേക്ക് വിസ രഹിത പ്രവേശനം സാധ്യമാണ്.

ഡെൻമാർക്ക്, ലക്സംബർഗ്, സ്പെയിൻ, സ്വീഡൻ, സ്വിറ്റ്സർലൻഡ് എന്നീ രാജ്യങ്ങൾ മൂന്നാം സ്ഥാനത്ത് തുടരുന്നു. ഓസ്ട്രിയ, ബെൽജിയം, ഫിൻലാൻഡ്, ഫ്രാൻസ്, ജർമ്മനി, ഗ്രീസ്, അയർലൻഡ്, ഇറ്റലി, നെതർലാൻഡ്‌സ്, നോർവേ എന്നീ പത്ത് യൂറോപ്യൻ രാജ്യങ്ങളാണ് നാലാം സ്ഥാനത്ത്.

യൂറോപ്പിന് പുറത്തുള്ള മുൻനിര പാസ്‌പോർട്ടുകളിൽ യുഎഇ അഞ്ചാം സ്ഥാനത്താണ്. ന്യൂസിലാൻഡ് ആറാം സ്ഥാനവും ഓസ്‌ട്രേലിയ ഏഴാം സ്ഥാനവും കാനഡ എട്ടാം സ്ഥാനവും മലേഷ്യ ഒൻപതാം സ്ഥാനവും നേടി. പട്ടികയുടെ ആദ്യ പത്തിൽ യൂറോപ്യൻ രാജ്യങ്ങളുടെ സമ​ഗ്രാധിപത്യമാണ്.

പട്ടികയുടെ അവസാന സ്ഥാനത്ത് അഫ്ഗാനിസ്ഥാൻ ആണ്. അഫ്ഗാൻ പാസ്‌പോർട്ട് ഉള്ളവർക്ക് 24 രാജ്യങ്ങളിലേക്ക് മാത്രമാണ് വിസയില്ലാതെ യാത്ര ചെയ്യാൻ കഴിയുക. മുൻനിര രാജ്യങ്ങളുമായി താരതമ്യം ചെയ്യുമ്പോൾ 168 ലക്ഷ്യസ്ഥാനങ്ങളുടെ വലിയ അന്തരം ഇതുവഴി വ്യക്തമാകുന്നു.

കഴിഞ്ഞ 20 വർഷത്തിനിടെ ആഗോള യാത്രാസൗകര്യം വർധിച്ചുവെന്ന് ഹെൻലി & പാർട്ണേഴ്‌സിന്റെ ചെയർമാൻ ക്രിസ്റ്റ്യൻ എച്ച്. കെയ്‌ലിൻ ചൂണ്ടിക്കാട്ടി. എന്നാൽ അതിന്റെ പ്രയോജനം എല്ലായിടത്തും ഒരുപോലെ ലഭിച്ചിട്ടില്ല. പാസ്‌പോർട്ടിന്റെ ശക്തി ഇന്ന് അവസരങ്ങളെയും സുരക്ഷയെയും സാമ്പത്തിക പങ്കാളിത്തത്തെയും നിർണ്ണയിക്കുന്ന ഘടകമായി മാറിയതായി അദ്ദേഹം പറഞ്ഞു.

2026-ൽ റെക്കോർഡ് എണ്ണം ആളുകൾ യാത്ര ചെയ്യുമെന്നാണ് പ്രതീക്ഷയെന്ന് ഐഎടിഎ ഡയറക്ടർ ജനറൽ വില്ലി വാൽഷ് പറഞ്ഞു. യാത്ര കൂടുതൽ എളുപ്പമാകുമ്പോൾ അതിന്റെ സാമ്പത്തികവും സാമൂഹികവുമായ നേട്ടങ്ങളും വർധിക്കും. അതേസമയം, സുരക്ഷ ഉറപ്പാക്കാൻ ഡിജിറ്റൽ ഐഡി, ഡിജിറ്റൽ പാസ്‌പോർട്ട് പോലുള്ള സാങ്കേതിക പരിഹാരങ്ങൾ രാജ്യങ്ങൾ പരിഗണിക്കണമെന്നും അദ്ദേഹം വ്യക്തമാക്കി.

അമേരിക്ക വീണ്ടും ആദ്യ പത്തിൽ ഇടം നേടിയെങ്കിലും ദീർഘകാലാടിസ്ഥാനത്തിലുള്ള തിരിച്ചടി തുടരുകയാണ്. 2014-ൽ ഒന്നാം സ്ഥാനത്തായിരുന്ന യുഎസ് 2026-ൽ പത്താം സ്ഥാനത്താണ്. യുകെയും സമാനമായ തിരിച്ചടി നേരിട്ടു.

കഴിഞ്ഞ 20 വർഷത്തിനിടെ ഏറ്റവും മികച്ച മുന്നേറ്റം കാഴ്ചവച്ച രാജ്യം യുഎഇയാണ്. 2006 മുതൽ 149 പുതിയ വിസ രഹിത ലക്ഷ്യസ്ഥാനങ്ങൾ ചേർത്ത യുഎഇ 57 സ്ഥാനങ്ങൾ ഉയർന്ന് അഞ്ചാം സ്ഥാനത്തെത്തി.

കിഴക്കൻ യൂറോപ്പിലെയും പടിഞ്ഞാറൻ ബാൽക്കണിലെയും രാജ്യങ്ങളും ശ്രദ്ധേയമായ മുന്നേറ്റം നടത്തി. അൽബേനിയ, ഉക്രെയ്ൻ, സെർബിയ, നോർത്ത് മാസിഡോണിയ, ബോസ്നിയ–ഹെർസഗോവിന, ജോർജിയ എന്നിവയാണ് പ്രധാന നേട്ടം കൈവരിച്ച രാജ്യങ്ങൾ.

അതേസമയം, കഴിഞ്ഞ രണ്ട് ദശകത്തിനിടെ വിസ രഹിത പ്രവേശനത്തിൽ മൊത്തത്തിൽ പിന്നോട്ടുപോയ ഒരേയൊരു രാജ്യം ബൊളീവിയയാണ്. 2026-ൽ അഞ്ച് ലക്ഷ്യസ്ഥാനങ്ങൾ നഷ്ടപ്പെട്ട ബൊളീവിയ 61-ാം സ്ഥാനത്തേക്ക് താഴ്ന്നു.

uae impresses in the henley passport index with strong global mobility gains offering visa free access to numerous destinations highlighting diplomatic success economic strength and growing international influence worldwide