അബൂദബി: അബൂദബിയിൽ നിന്ന് ദുബൈയിലേക്കും തിരിച്ചും ഇലക്ട്രിക് വാഹനങ്ങളിൽ (EV) യാത്ര ചെയ്യുന്നവരുടെ പ്രധാന ആശങ്കയായ ചാർജ് തീരുമോ എന്ന പേടിക്ക് വിട. യുഎഇയിലെ ഏറ്റവും തിരക്കേറിയ E11 ഹൈവേയിൽ 60 സൂപ്പർഫാസ്റ്റ് ചാർജറുകളുമായി കൂറ്റൻ ചാർജിംഗ് ഹബ്ബ് അഡ്നോക് (ADNOC) ഡിസ്ട്രിബ്യൂഷൻ തുറന്നു.

സൈഹ് ഷുഐബിൽ (Saih Shuaib) സ്ഥിതി ചെയ്യുന്ന ഈ കേന്ദ്രം ഇലക്ട്രിക് വാഹന ഉടമകൾക്ക് വലിയ ആശ്വാസമാകുമെന്നാണ് പ്രതീക്ഷിക്കപ്പെടുന്നത്.

ഒരേസമയം 60 വാഹനങ്ങൾക്ക് വരെ അതിവേഗത്തിൽ ചാർജ് ചെയ്യാൻ സൗകര്യമുള്ളതിനാൽ ചാർജിംഗിനായുള്ള നീണ്ട കാത്തിരിപ്പും ക്യൂവും ഒഴിവാക്കാനാകും. മിക്ക വാഹനങ്ങളും വെറും 20 മിനിറ്റിനുള്ളിൽ പൂർണ്ണമായി ചാർജ് ചെയ്യാമെന്നത് ദീർഘദൂര യാത്രക്കാർക്ക് വലിയ ആശ്വാസമാകും. കൂടാതെ, ചാർജിംഗ് പ്രക്രിയയിൽ സംശയമുള്ളവർക്കും ആദ്യമായി ഇവി ഉപയോഗിക്കുന്നവർക്കും സഹായത്തിനായി പ്രത്യേക പരിശീലനം ലഭിച്ച അറ്റൻഡന്റുകളുടെ സേവനവും ഇവിടെ ലഭ്യമാക്കിയിട്ടുണ്ട്.

ALSO READ: ലോകത്തെ ഏറ്റവും പവർഫുൾ പാസ്‌പോർട്ട് ഈ രാജ്യത്തിന്റെ; ഹെൻലി ഇൻഡക്സിൽ വിസ്മയിപ്പിച്ച് യുഎഇ 

വാഹനം ചാർജ് ചെയ്യുന്ന സമയം ഫലപ്രദമായി വിനിയോഗിക്കാൻ സഹായിക്കുന്ന അത്യാധുനിക സൗകര്യങ്ങളാണ് ഈ ഹബ്ബിന്റെ മറ്റൊരു പ്രത്യേകത. വൈ-ഫൈ സൗകര്യമുള്ള പ്രത്യേക വർക്ക് പോഡുകളും ഡെസ്കുകളും ഇവിടെയുള്ളതിനാൽ യാത്രക്കാർക്ക് തടസ്സമില്ലാതെ ജോലി ചെയ്യാനോ ഫോൺ കോളുകൾ ചെയ്യാനോ സാധിക്കും. 

ജോലിക്കാവശ്യമായ സമാധാനപരമായ അന്തരീക്ഷത്തോടൊപ്പം കഫേകൾ, വൃത്തിയുള്ള വിശ്രമമുറികൾ തുടങ്ങിയ അടിസ്ഥാന സൗകര്യങ്ങളും ഇവിടെ ലഭ്യമാണ്. ഇലക്ട്രിക് വാഹനങ്ങളിലെ യാത്ര വെറും സഞ്ചാരം എന്നതിലുപരി സൗകര്യപ്രദമായ ഒരു ജീവിതശൈലിയായി മാറ്റാൻ ലക്ഷ്യമിട്ടുള്ളതാണ് അഡ്നോകിന്റെ ഈ പുതിയ സംരംഭം.

നിലവിലെ സ്റ്റേഷന് നേരെ എതിർവശത്തായി (ഗാൻടൗട്ട് ഭാഗത്ത്) ഉടൻ തന്നെ രണ്ടാമത്തെ ഹബ്ബ് കൂടി അഡ്നോക് ആരംഭിക്കും. 

ഷാർജ ഉൾപ്പെടെയുള്ള മറ്റ് എമിറേറ്റുകളെ ബന്ധിപ്പിക്കുന്ന പ്രധാന ഹൈവേകളിലും സമാനമായ ചാർജിംഗ് ഹബ്ബുകൾ നിർമ്മിക്കാൻ അഡ്നോക് പദ്ധതിയിടുന്നുണ്ട്. ഇലക്ട്രിക് വാഹനങ്ങളുടെ പ്രചാരം വർദ്ധിപ്പിക്കാൻ ഇത്തരം വിപുലമായ സൗകര്യങ്ങൾ സഹായിക്കുമെന്ന് അഡ്നോക് ഡിസ്ട്രിബ്യൂഷൻ അധികൃതർ പറഞ്ഞു.

electric vehicle owners gain major relief as a mega charging hub opens on abu dhabi dubai highway featuring sixty fast chargers improving long distance travel convenience sustainability and uae clean mobility infrastructure.