പാലക്കാട്: തമിഴ്‌നാട്ടിലെ ഒട്ടഛത്രത്തുനിന്ന് പച്ചക്കറിയുമായി വരികയായിരുന്ന ലോറിയില്‍ പാന്‍മസാല കടത്തിയ സംഭവത്തില്‍ മൂന്നുപേര്‍ പിടിയില്‍. ഒറ്റപ്പാലം കടമ്പഴിപ്പുറം സ്വദേശികളായ ഷെഫീക്ക് മുഹമ്മദ്, ഹനീഫ, ഷെമീര്‍ ബാബു എന്നിവരെയാണ് എക്‌സൈസ് സംഘം പിടികൂടിയത്. ഒന്നര ലക്ഷം പായ്ക്കറ്റ് ഹാന്‍സ് ആണ് പിടികൂടിയത്.
പിടിയിലായവരെ ചിറ്റൂര്‍ ഒന്നാം ക്ലാസ് മജിസ്‌ട്രേറ്റ് കോടതിയില്‍ ഹാജരാക്കി. പാന്‍മസാല പായ്ക്കറ്റ് പച്ചക്കറികള്‍ കയറ്റിയ ലോറിക്കുള്ളില്‍ ഒളിപ്പിച്ചുവയ്ക്കുകയായിരുന്നു. ഗോപാലപുരം എക്‌സൈസ് ചെക് പോസ്റ്റില്‍ നടത്തിയ പരിശോധനയിലാണ് പാന്‍മസാലകള്‍ കണ്ടെത്തിയത്. എക്‌സൈസ് റെയ്ഞ്ച് ഇന്‍സ്‌പെക്ടര്‍ ശ്രീരാജ്, പ്രിവന്റീവ് ഓഫിസര്‍ അര്‍ജുന്‍ എന്നിവരുടെ നേതൃത്വത്തിലാണ് പ്രതികളെ പിടികൂടിയത്.