ദുബൈ: ലോകപ്രശസ്തമായ ബുർജ് ഖലീഫയെയും ദുബൈ മാളിനെയും ബന്ധിപ്പിക്കുന്ന മെട്രോ സ്റ്റേഷനിൽ വൻ വികസന പദ്ധതികൾ വരുന്നു. വർദ്ധിച്ചുവരുന്ന തിരക്ക് പരിഗണിച്ച് സ്റ്റേഷന്റെ കപ്പാസിറ്റി 65 ശതമാനം വർദ്ധിപ്പിക്കാനാണ് ആർടിഎ ലക്ഷ്യമിടുന്നത്. ഇതുവഴി മണിക്കൂറിൽ 12,320 യാത്രക്കാരെ ഉൾക്കൊള്ളാൻ സ്റ്റേഷനു സാധിക്കും.

പദ്ധതിയുടെ പ്രധാന സവിശേഷതകൾ

സ്റ്റേഷന്റെ നിലവിലെ വിസ്തീർണ്ണം 6,700 ചതുരശ്ര മീറ്ററാണ്. ഇതിൽ നിന്ന് 8,500 ചതുരശ്ര മീറ്ററായി വിസ്തീർണ്ണം വർദ്ധിപ്പിക്കും. പദ്ധതി നിലവിൽ വന്നാൽ ദിവസേന 2,20,000 യാത്രക്കാർക്ക് സ്റ്റേഷനിലൂടെ യാത്ര ചെയ്യാൻ സാധിക്കും.

ALSO READ: അതിമനോഹരമായ കൃഷിയിടമൊരുക്കി മുഹമ്മദ് അൽ ഹാഷ്മി; വീട്ടുവളപ്പിൽ നിന്നും കമ്മ്യൂണിറ്റി ഗാർഡനിലേക്ക്

ഇതിനുപുറമേ സ്റ്റേഷനിൽ പുതിയ എസ്‌കലേറ്ററുകൾ, ലിഫ്റ്റുകൾ, പരിഷ്കരിച്ച പ്ലാറ്റ്‌ഫോമുകൾ എന്നിവ സജ്ജീകരിക്കും. പ്രവേശന കവാടങ്ങളും പുറത്തേക്കുള്ള വഴികളും (Entry & Exit Gates) വേർതിരിക്കും. ഇത് യാത്രക്കാരുടെ തിരക്ക് ഒഴിവാക്കാൻ സഹായിക്കും.

പുതുവത്സരാഘോഷം പോലുള്ള പ്രധാന അവസരങ്ങളിൽ സ്റ്റേഷനിലുണ്ടാകുന്ന അമിത തിരക്ക് കണക്കിലെടുത്താണ് പുതിയ തീരുമാനം. 2026-ലെ പുതുവത്സര വേളയിൽ മാത്രം 1.24 ദശലക്ഷം പേരാണ് ദുബൈ മെട്രോ ഉപയോഗിച്ചത്. കഴിഞ്ഞ അഞ്ച് വർഷത്തിനിടെ ഈ സ്റ്റേഷനിലെ യാത്രക്കാരുടെ എണ്ണത്തിൽ 7.5 ശതമാനം വളർച്ച രേഖപ്പെടുത്തിയിരുന്നു.

ALSO READ: ഓണ്‍ലൈനായി അപേക്ഷിച്ചതുകൊണ്ട് മാത്രം ജോലി ലഭിക്കില്ല; ഇക്കാര്യങ്ങള്‍ക്കൂടി അറിഞ്ഞിരിക്കണം | UAE Job Tips 

ദുബൈ വേൾഡ് പ്രോജക്ട് മാനേജ്‌മെന്റ് ഫോറത്തിൽ വെച്ച് ആർടിഎ ഡയറക്ടർ ജനറൽ മതാർ അൽ തായറും ഇമാർ ഗ്രൂപ്പ് സ്ഥാപകൻ മുഹമ്മദ് അലബ്ബാറും ചേർന്നാണ് കരാറിൽ ഒപ്പുവെച്ചത്.

2010-ൽ പ്രവർത്തനം ആരംഭിച്ച ഈ സ്റ്റേഷനിലെ യാത്രക്കാരുടെ എണ്ണം 2024-ൽ 10.57 ദശലക്ഷം കടന്നിരുന്നു. നഗരത്തിന്റെ സാമ്പത്തിക-ടൂറിസം ഹൃദയഭാഗമായ ഡൗൺടൗൺ ദുബായിലെ ഗതാഗതം കൂടുതൽ ആധുനികമാക്കാനുള്ള ആർടിഎയുടെ തന്ത്രപരമായ നീക്കമായാണ് ഈ വിപുലീകരണത്തെ കാണുന്നത്.

dubai authorities announce expansion of burj khalifa–dubai mall metro station to handle rising passenger demand, improving crowd management, travel efficiency, and connectivity at one of the city’s busiest transport hubs.