ദുബൈ: ഇറാൻ വ്യോമാതിർത്തി താൽക്കാലികമായി അടച്ചതിനു പിന്നാലെ വിമാന സർവീസുകൾ പുനഃക്രമീകരിച്ച് ഫ്ലൈദുബൈ. സുരക്ഷാ കാരണങ്ങളാലാണ് ഷെഡ്യൂളുകളിൽ മാറ്റം വരുത്തിയതെന്ന് അധികൃതർ അറിയിച്ചു.

വ്യാഴാഴ്ച പുലർച്ചെ വ്യോമാതിർത്തി അടച്ചതോടെ ഇറാനിലേക്കും പരിസര പ്രദേശങ്ങളിലൂടെയുമുള്ള നിരവധി വിമാനങ്ങളാണ് റദ്ദാക്കിയിരിക്കുന്നത്. ചില സർവീസുകൾ മറ്റ് സുരക്ഷിതമായ റൂട്ടുകളിലൂടെ വഴിതിരിച്ചുവിട്ടു. വ്യോമാതിർത്തി ഇപ്പോൾ വീണ്ടും തുറന്നിട്ടുണ്ടെങ്കിലും, സർവീസുകൾ പഴയപടി ആകാൻ സമയമെടുക്കുമെന്നതിനാൽ ഷെഡ്യൂളുകൾ ക്രമീകരിച്ചുവരികയാണ്.

ALSO READ: ഇറാൻ വ്യോമപാത അടച്ചു; എയർ ഇന്ത്യ, ഇൻഡിഗോ വിമാനങ്ങൾ റൂട്ട് മാറ്റി, യാത്രക്കാർക്ക് നിർദേശം 

യാത്രക്കാരുടെ ശ്രദ്ധയ്ക്ക്

"യാത്രക്കാരുടെയും ജീവനക്കാരുടെയും സുരക്ഷയ്ക്കാണ് ഞങ്ങൾ മുൻഗണന നൽകുന്നത്. യാത്രാ തടസ്സം നേരിട്ട യാത്രക്കാരുമായി നേരിട്ട് ബന്ധപ്പെടുന്നുണ്ട്," ഫ്ലൈദുബൈ പ്രസ്താവനയിൽ പറഞ്ഞു. യാത്രക്കാർ ഫ്ലൈദുബൈ വെബ്‌സൈറ്റിലെ 'Manage Booking' വിഭാഗം സന്ദർശിച്ച് വിമാനത്തിന്റെ നിലവിലെ അവസ്ഥ പരിശോധിക്കണമെന്നും കോൺടാക്റ്റ് വിവരങ്ങൾ അപ്‌ഡേറ്റ് ചെയ്യണമെന്നും നിർദ്ദേശിച്ചു.

സംഘർഷാവസ്ഥ തുടരുന്നു

ഇറാനിൽ നിലനിൽക്കുന്ന ആഭ്യന്തര പ്രതിഷേധങ്ങളും അമേരിക്കയുമായുള്ള നയതന്ത്ര പ്രശ്നങ്ങളും കാരണം മേഖലയിൽ സംഘർഷം നിലനിൽക്കുകയാണ്. ഇതാദ്യമായല്ല സംഘർഷത്തെത്തുടർന്ന് ഈ മാസം വിമാനങ്ങൾ റദ്ദാക്കേണ്ടി വരുന്നത്. എമിറേറ്റ്സ് ഉൾപ്പെടെയുള്ള മറ്റ് യുഎഇ വിമാനക്കമ്പനികളും സാഹചര്യം സൂക്ഷ്മമായി നിരീക്ഷിച്ചു വരികയാണ്.

ALSO READ: പ്രതിഷേധക്കാര്‍ക്ക് വധശിക്ഷയില്ലെന്ന് ഇറാന്‍; തന്റെ ഇടപെടലിന്റെ ഫലമെന്ന അവകാശവാദവുമായി ട്രംപ്  

അതേസമയം, ഇറാനിൽ ഭരണകൂട വിരുദ്ധ പ്രക്ഷോഭം ശക്തമാകുന്നതിനിടെ, അതിന്റെ മറവിൽ ആക്രമണം നടത്താനുള്ള നീക്കത്തിൽ നിന്ന് പിന്മാറണമെന്ന് യു.എസിലെ ട്രംപ് ഭരണകൂടത്തോട് സഊദി അറേബ്യ ഉൾപ്പെടെയുള്ള ഗൾഫ് രാജ്യങ്ങൾ ആവശ്യപ്പെട്ടു. ആക്രമണത്തിന് തയ്യാറെടുക്കാൻ അമേരിക്ക മുന്നറിയിപ്പ് നൽകിയിട്ടുണ്ടെങ്കിലും, മേഖലയിലെ സമാധാനവും എണ്ണ വിപണിയും കണക്കിലെടുത്ത് അറബ്, ഗൾഫ് രാജ്യങ്ങൾ ട്രംപിനെ ആശങ്ക അറിയിച്ചതായി 'വാൾ സ്ട്രീറ്റ് ജേണൽ' റിപ്പോർട്ട് ചെയ്തു.

ഇറാനിൽ ഭരണമാറ്റം ലക്ഷ്യമിട്ടുള്ള ആക്രമണം നടന്നാൽ അത് ആഗോള എണ്ണ വിപണിയെ സാരമായി ബാധിക്കുമെന്നും അമേരിക്കൻ സമ്പദ്‌വ്യവസ്ഥയെപ്പോലും പിന്നോട്ടടിക്കുമെന്നും യു.എസ് സഖ്യകക്ഷികളായ സഊദി അറേബ്യ, ഒമാൻ, ഖത്തർ എന്നീ രാജ്യങ്ങൾ വൈറ്റ് ഹൗസിനെ അറിയിച്ചിട്ടുണ്ട്.

rising war fears in west asia prompt iran to shut its airspace, forcing flydubai to suspend flights to the country, disrupting regional air travel and affecting passengers amid escalating security concerns.