മോസ്കോ: പശ്ചിമേഷ്യയിലെ വർധിച്ചുവരുന്ന സംഘർഷങ്ങൾക്കിടയിൽ നിർണ്ണായക ഇടപെടലുമായി റഷ്യൻ പ്രസിഡന്റ് വ്ലാഡിമിർ പുട്ടിൻ രംഗത്ത്. ഇസ്റാഈൽ പ്രധാനമന്ത്രി ബെന്യാമിൻ നെതന്യാഹുവുമായും ഇറാൻ പ്രസിഡന്റ് മസൂദ് പെസെഷ്‌കിയാനുമായും പുട്ടിൻ ടെലിഫോൺ സംഭാഷണം നടത്തി. മേഖലയിലെ അസ്ഥിരത പരിഹരിക്കാൻ ക്രിയാത്മകമായ ചർച്ചകൾക്ക് റഷ്യ വേദിയൊരുക്കാമെന്ന് അദ്ദേഹം വാഗ്ദാനം ചെയ്തു.

പ്രധാന നീക്കങ്ങൾ:

ഇസ്റാഈലും ഇറാനും തമ്മിലുള്ള ശത്രുത കുറയ്ക്കാൻ റഷ്യ സന്നദ്ധമാണെന്ന് ക്രെംലിൻ വക്താവ് വ്യക്തമാക്കി. സംഭാഷണങ്ങൾ പ്രോത്സാഹിപ്പിക്കാൻ റഷ്യൻ ഭാഗത്തുനിന്ന് എല്ലാ സഹായവും ഉണ്ടാകും.യുക്രെയ്ൻ യുദ്ധത്തിന് ശേഷം ഇറാനുമായി റഷ്യൻ ബന്ധം കൂടുതൽ ശക്തമായിട്ടുണ്ട്. കഴിഞ്ഞ വർഷം ഇരുരാജ്യങ്ങളും തമ്മിൽ 20 വർഷത്തെ തന്ത്രപ്രധാന പങ്കാളിത്ത കരാറിൽ ഒപ്പുവെച്ചിരുന്നു.

ഇറാനെ മാത്രമല്ല, പശ്ചിമേഷ്യയിലാകെ സ്ഥിരത നിലനിർത്താനാണ് റഷ്യയുടെ ശ്രമമെന്ന് ക്രെംലിൻ വക്താവ് ദിമിത്രി പെസ്കോവ് പറഞ്ഞു.
കഴിഞ്ഞ വർഷം ഇറാനിയൻ ആണവ കേന്ദ്രങ്ങൾക്ക് നേരെ ഇസ്റാഈലും അമേരിക്കയും നടത്തിയ ആക്രമണങ്ങളും അതിനെത്തുടർന്നുണ്ടായ 12 ദിവസത്തെ യുദ്ധവും മേഖലയെ കടുത്ത ആശങ്കയിലാക്കിയിരുന്നു. ഈ സാഹചര്യത്തിൽ പുട്ടിന്റെ ഇടപെടൽ ആഗോള രാഷ്ട്രീയത്തിൽ വലിയ പ്രാധാന്യത്തോടെയാണ് നോക്കിക്കാണുന്നത്.