തിരുവനന്തപുരം: ശബരിമല സ്വർണ്ണക്കൊള്ള കേസുമായി ബന്ധപ്പെട്ട് വിഎസ് എസ് സി നടത്തിയ ശാസ്ത്രീയ പരിശോധന ഫലം ഇന്ന് അന്വേഷണ സംഘത്തിന് കൈമാറും. കഴിഞ്ഞ ദിവസമാണ് വി എസ് എസ് സിയിൽ നിന്നും ശാസ്ത്രീയ പരിശോധന ഫലം സീൽ വെച്ച കവറിൽ കൊല്ലം വിജിലൻസ് കോടതിയിൽ നൽകിയത്. ഈ റിപ്പോർട്ടാണ് ഇന്ന് കോടതി എസ്ഐടിക്ക് കൈമാറുന്നത്. 

ഹൈക്കോടതിയിൽ പത്തൊമ്പതാം തീയതി കൊടുക്കുന്ന അന്വേഷണ പുരോഗതി റിപ്പോർട്ടിൽ ഈ ശാസ്ത്രീയ അന്വേഷണഫല റിപ്പോർട്ടും ഉൾപ്പെടുത്തും. അന്വേഷണത്തിന്റെ ഗതി നിർണയിക്കുന്ന റിപ്പോർട്ട് ആണ് വിഎസ് എസ് സി കൈമാറിയത്. സ്വർണ്ണപ്പാളികൾ മാറ്റിയോ ശബരിമലയിൽ ഇപ്പോഴുള്ള പഴയ പാളികളാണോ അതോ പുതിയ പാളികളാണോ പാളികളുടെ സ്വർണത്തിന്റെ അളവ് എന്നിവ നിർണയിക്കുന്ന പരിശോധനയാണ് നിലവിൽ നടത്തിയിട്ടുള്ളത്.