പാലക്കാട് : സാമ്പത്തിക ബാധ്യതയെ തുടര്‍ന്ന് അട്ടപ്പാടിയില്‍ പഞ്ചായത്ത് മുന്‍ വൈസ് പ്രസിസന്റ് ആത്മഹത്യ ചെയ്തു. അഗളി പഞ്ചായത്ത് മുന്‍ വൈസ് പ്രസിഡന്റ് പുലിയറ വണ്ടര്‍കുന്നേല്‍ ഗോപാലകൃഷ്ണന്‍ (60) ആണ് ആത്മഹത്യ ചെയ്തത്. 

സഹകരണബാങ്കില്‍ 8 ലക്ഷം രൂപയുടെ കടബാധ്യതയുണ്ടായിരുന്ന ഗോപാലാകൃഷ്ണന്റെ ഭൂമിക്ക് ജപ്തി ഭീഷണിയുണ്ടായിരുന്നു. തണ്ടപ്പേര്‍ ലഭിക്കാത്തതുകാരണം വസ്തു വില്‍ക്കാന്‍ സാധിച്ചിരുന്നില്ല. 

അതിനിടെ ഗോപാലകൃഷ്ണന്‍ രോഗബാധിതനുമായി.ഇതിന് ചികിത്സയ്ക്ക് പണം കണ്ടെത്താന്‍ കഴിയാത്തതും മനപ്രയാസമുണ്ടാക്കി ഇതിന് പിന്നാലെയാണ് ആത്മഹത്യ ചെയ്തത്.

ALSO READ: 'കാലിനേറ്റ മുറിവ് കെട്ടിയത് സര്‍ജിക്കല്‍ ബ്ലേഡ് ഉള്ളില്‍വച്ച്'; ചികിത്സപ്പിഴവ് പമ്പ സര്‍ക്കാര്‍ ആശുപത്രിയില്‍

വാടക വീട്ടില്‍ വച്ച് കൃഷിയിടത്തില്‍ ഉപയോഗിച്ചിരുന്ന കീടനാശിനി കുടിച്ചാണ് ഇദ്ദേഹം ആത്മഹത്യ ചെയ്തത്. അട്ടപ്പാടിയിലുള്ള സഹോദരനോട് താന്‍ വിഷം കഴിച്ചുവെന്ന് വിളിച്ചുപറഞ്ഞിരുന്നു. ആശുപത്രിയില്‍ എത്തിച്ചെങ്കിലും മരണം സംഭവിക്കുകയായിരുന്നു. 

സിപിഎം നേതാവായിരുന്ന ഗോപാലകൃഷ്ണന്‍ 2004-05 കാലഘട്ടത്തില്‍ അഗളി വൈസ് പ്രസിഡന്റായും 2005-10 കാലഘട്ടത്തില്‍ പഞ്ചായത്തംഗമായും പ്രവര്‍ത്തിച്ചിരുന്നു. 

നാല് മാസം മുന്‍പ് തണ്ടപ്പേര്‍ ലഭിക്കാത്തതിനാല്‍ നരസിമുക്ക് ഇരട്ടക്കളത്തെ കൃഷണസ്വാമി എന്ന കര്‍ഷകനും ആത്മഹത്യ ചെയ്തിരുന്നു.

(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന്‍ ശ്രമിക്കുക. ഹെല്‍പ്ലൈന്‍ നമ്പരുകള്‍ - 1056, 0471- 2552056)

A former panchayat vice president committed suicide in Attappadi, Palakkad district, allegedly due to financial distress caused by debt and the inability to sell his land because he had not received the required land ownership document (Thandaper).