മുംബൈ: ട്രാഫിക് പിഴയുടെ പേരിലുള്ള പുതിയ ഓൺലൈൻ തട്ടിപ്പുരീതി തുറന്നുകാട്ടി സ്റ്റാൻഡ്അപ്പ് കൊമേഡിയനായ ശ്രീധർ വി. സർക്കാർ പോർട്ടലിനെ അക്ഷരംപ്രതി അനുകരിക്കുന്ന വ്യാജ വെബ്‌സൈറ്റുകൾ വഴിയാണ് ഈ തട്ടിപ്പ് നടക്കുന്നത്. തന്റെ ബാങ്ക് വിവരങ്ങൾ തട്ടിയെടുക്കാനുള്ള ശ്രമത്തിൽ നിന്നും തലനാരിഴയ്ക്കാണ് രക്ഷപ്പെട്ടതെന്ന് അദ്ദേഹം വെളിപ്പെടുത്തി.

ഔദ്യോഗിക സന്ദേശങ്ങളെ വെല്ലുന്ന രീതിയിലാണ് ഇത്തരം വ്യാജ സന്ദേശങ്ങൾ തട്ടിപ്പുകാർ തയ്യാറാക്കുന്നത്. വാഹനം അമിതവേഗതയിൽ ഓടിച്ചതിന് 500 രൂപ പിഴയടയ്ക്കണമെന്ന് കാണിച്ച് ശ്രീധറിന് സന്ദേശം ലഭിച്ചിരുന്നു. സന്ദേശത്തോടൊപ്പം പണമടയ്ക്കാൻ ഒരു ലിങ്കും നൽകിയിരുന്നു. 

ഈ ലിങ്കിൽ ക്ലിക്ക് ചെയ്തപ്പോൾ തുറന്നുവന്നത് ഔദ്യോഗിക വെബ്‌സൈറ്റിന് സമാനമായൊരു പേജാണ്. ഇതിൽ അശോക ചിഹ്നവും സർക്കാർ മന്ത്രാലയങ്ങളുടെ പേരും കൃത്യമായി ഉൾപ്പെടുത്തിയിരുന്നു.

"ഇന്ത്യക്കാർ ക്രിയേറ്റീവ് അല്ലെന്ന് ആര് പറഞ്ഞു? അദ്ദേഹം പരിഹാസരൂപേണ ചോദിച്ചു. തട്ടിപ്പുകാരുടെ സാങ്കേതിക വൈദഗ്ധ്യത്തെ ചൂണ്ടിക്കാണിച്ചാണ് അദ്ദേഹം ഇങ്ങനെ പ്രതികരിച്ചത്. ബാങ്ക് കാർഡ് വിവരങ്ങൾ നൽകുന്നതിന് തൊട്ടുമുമ്പാണ് വെബ്‌സൈറ്റ് അഡ്രസ്സിലെ മാറ്റം അദ്ദേഹം ശ്രദ്ധിച്ചത്.

ALSO READ: പഠനം പാതിവഴിയിൽ മുടങ്ങി, ശരീരം പകുതിയും വൈകല്യത്തിന്റെ പിടിയിൽ; സ്കൂട്ടറിൽ ബസിടിച്ചു ഗുരുതരമായി പരുക്കേറ്റ സംഭവം; യുവാവിന് 1.62 കോടി രൂപ നഷ്ടപരിഹാരം നൽകാൻ വിധി 

യഥാർത്ഥ സർക്കാർ വെബ്‌സൈറ്റ് echallan.parivahan.gov.in എന്നതാണ്. എന്നാൽ തട്ടിപ്പുകാർ echallan.pasvahan.icu എന്ന വ്യാജ ഡൊമെയ്‌നാണ് ഉപയോഗിക്കുന്നത്. ഒറ്റനോട്ടത്തിൽ ഈ വ്യത്യാസം തിരിച്ചറിയുക അസാധ്യമാണ്. വ്യാജ സൈറ്റിൽ എന്ത് വിവരങ്ങൾ നൽകിയാലും ഉടൻ പണമടയ്ക്കാനുള്ള സന്ദേശം തെളിയും. ആളുകളെ വിശ്വസിപ്പിക്കാനായി തട്ടിപ്പുകാർ പയറ്റുന്ന തന്ത്രമാണിതെന്ന് ശ്രീധർ ചൂണ്ടിക്കാട്ടി.

പിഴ ഉടൻ പണമടച്ചില്ലെങ്കിൽ ഡ്രൈവിംഗ് ലൈസൻസ് റദ്ദാക്കുമെന്ന ഭീഷണി ഈ വ്യാജ സൈറ്റിലുണ്ട്. പണമടയ്ക്കാൻ വൈകിയാൽ കോടതിയിൽ നിന്ന് സമൻസ് വരുമെന്നും തട്ടിപ്പുകാർ മുന്നറിയിപ്പ് നൽകുന്നു. ഉപയോക്താക്കളെ ഭയപ്പെടുത്തി വേഗത്തിൽ പണം തട്ടിയെടുക്കാനാണ് ഇത്തരത്തിലുള്ള സന്ദേശങ്ങൾ ഉപയോഗിക്കുന്നത്.

ശ്രീധറിന്റെ പോസ്റ്റ് വൈറലായതോടെ സമാനമായ അനുഭവം നേരിട്ട നിരവധി പേർ രംഗത്തെത്തി. എഐ സാങ്കേതികവിദ്യ ഉപയോഗിച്ച് തട്ടിപ്പുകാർ ഇപ്പോൾ അതീവ കൃത്യതയുള്ള വ്യാജ വെബ്‌സൈറ്റുകൾ നിർമ്മിക്കുന്നുണ്ട്. ഇത്തരം വെബ്‌സൈറ്റുകൾ സാധാരണക്കാർക്ക് വലിയ ഭീഷണിയാണെന്ന് പലരും അഭിപ്രായപ്പെട്ടു.

സാധാരണ മൊബൈൽ നമ്പറുകളിൽ നിന്ന് വരുന്ന സംശയാസ്പദമായ ലിങ്കുകളിൽ ക്ലിക്ക് ചെയ്യരുത്. ഇത്തരം തട്ടിപ്പുകളിൽ വീഴാതിരിക്കാൻ ഔദ്യോഗിക ആപ്പുകൾ മാത്രം ഉപയോഗിക്കണമെന്ന് അധികൃതർ നിർദ്ദേശിക്കുന്നു. അപരിചിതമായ സന്ദേശങ്ങളിലെ ലിങ്കുകൾ പരിശോധിക്കാതെ തുറക്കുന്നത് അപകടമാണെന്ന് വിദഗ്ധർ മുന്നറിയിപ്പ് നൽകുന്നു.

a famous standup comedian narrowly escaped a challan fraud, exposing a new scam method and jokingly asking who said indians are not creative, as authorities warn people to stay alert against such tricks.