മലപ്പുറം: പെരുവള്ളൂർ പറമ്പിൽ പീടികയിൽ കാറും ബൈക്കും കൂട്ടിയിടിച്ചുണ്ടായ അപകടത്തിൽ ചികിത്സയിലായിരുന്ന പ്രവാസി യുവാവ് കൂടി മരണത്തിന് കീഴടങ്ങി. വേങ്ങര പാക്കടപ്പുറായ സ്വദേശി കൊട്ടേക്കാട്ട് നിസാർ (32) ആണ് മരിച്ചത്. ഇതോടെ അപകടത്തിൽ മരിച്ചവരുടെ എണ്ണം രണ്ടായി. നിസാറിന്റെ സുഹൃത്തായ മുനീർ (24) അപകടദിവസം തന്നെ മരണപ്പെട്ടിരുന്നു.

ജനുവരി 11 ഞായറാഴ്ച, പടിക്കൽ - കരുവാങ്കല്ല് റോഡിലെ പെട്രോൾ പമ്പിന് മുന്നിൽ വെച്ചായിരുന്നു അപകടം സംഭവിച്ചത്. പെട്രോൾ പമ്പിലേക്ക് കയറുന്നതിനിടെ എതിരെ വന്ന കാർ ബൈക്കിലിടിക്കുകയായിരുന്നു. ഗൾഫിൽ നിന്ന് ഏതാനും ആഴ്ചകൾക്ക് മുൻപാണ് നിസാറും സുഹൃത്ത് മുനീറും അവധിക്കായി നാട്ടിലേക്കെത്തിയത്.

ALSO READ: കണ്ണൂരില്‍ ബയോഗ്ലാസ് പ്ലാന്റിന്റെ ടാങ്കില്‍വീണ് രണ്ടുവയസ്സുകാരിക്ക് ദാരുണാന്ത്യം  

പരേതനായ മമ്മിതുവിന്റെ മകനാണ് നിസാർ. മാതാവ്: ഉമ്മു ജമീല, ഭാര്യ: ഷബാന, മക്കൾ: മുഹമ്മദ് അഫ്സാൻ, ഹിനാറ.

കോഴിക്കോട് മെഡിക്കൽ കോളജിൽ ചികിത്സയിലിരിക്കെയാണ് നിസാറിന്റെ അന്ത്യം സംഭവിച്ചത്. പോസ്റ്റ്‌മോർട്ടം നടപടികൾക്ക് ശേഷം മൃതദേഹം മാടംചിന ജുമാ മസ്ജിദിൽ ഖബറടക്കും. പ്രവാസ ജീവിതത്തിനിടയിലെ അവധി ആഘോഷിക്കാൻ നാട്ടിലെത്തിയ രണ്ട് യുവാക്കളുടെ വിയോഗം നാടിനെയാകെ കണ്ണീരിലാഴ്ത്തിയിരിക്കുകയാണ്.