ദുബായ്: മൊബൈൽ ജിമ്മുകൾ തുറസായ സ്ഥലത്ത് ആരംഭിക്കാനൊരുങ്ങി ദുബായ് മുനിസിപ്പാലിറ്റി. നഗരവാസികൾക്ക് തുറന്ന ഇടങ്ങളിൽ സൗകര്യപ്രദമായി വ്യായാമം ചെയ്യാനുള്ള അവസരം കൂടിയാണിത്. പദ്ധതിയുടെ ഭാഗമായി മൂന്ന് പുതിയ സ്ഥലങ്ങളിൽ കണ്ടെയ്‌നർ സ്റ്റൈൽ മൊബൈൽ ജിമ്മുകൾ സ്ഥാപിക്കാൻ അപേക്ഷ ക്ഷണിച്ചു തുടങ്ങി. 

അൽ ഖവനീജ് പണ്ട് പാർക്ക്, അൽ ബർഷ സൗത്ത് പാർക്ക്, അൽ മം‌സാർ കോർണിഷ് എന്നീ മൂന്ന് ഇടങ്ങളിലായാണ് പ്രാരംഭ പദ്ധതി തുടക്കം കുറിക്കുന്നത്.

ഇത്തരത്തിൽ  മൊബൈൽ ജിമ്മുകൾ സ്ഥാപിക്കുന്നതിലൂടെ   ആരോഗ്യകരമായ ജീവിതശൈലി പ്രോത്സാഹിപ്പിക്കാനും പൊതുജനങ്ങൾക്ക് എളുപ്പത്തിൽ വ്യായാമ സൗകര്യം ലഭ്യമാക്കാനും സാധിക്കുമെന്ന് മുനിസിപ്പാലിറ്റി വ്യക്തമാക്കി. സെന്ററുകളിൽ അടിസ്ഥാന ഫിറ്റ്നസ് ഉപകരണങ്ങൾ, കാർഡിയോ മെഷീനുകൾ എന്നിവ ഉൾപ്പെടുമെന്ന് അധികൃതർ അറിയിച്ചിട്ടുണ്ട്.

കൂടാതെ പൗരന്മാർക്കും താമസക്കാർക്കും സ്വകാര്യ കമ്പനികൾക്കും ഈ പദ്ധതിയിൽ പങ്കാളികളാകാൻ അവസരമുണ്ട്. നിക്ഷേപം നടത്താൻ താൽപര്യമുള്ളവർക്ക് ലീസ് അടിസ്ഥാനത്തിൽ ജിം യൂണിറ്റുകൾ പ്രവർത്തിപ്പിക്കാം. അപേക്ഷ സമർപ്പിക്കാനുള്ള അവസാന തീയതി 2026 ജനുവരി 25 ആണെന്നും നിശ്ചിത ഓൺലൈൻ പോർട്ടൽ വഴിയാണ് അപേക്ഷ നൽകേണ്ടതെന്നും മുനിസിപ്പാലിറ്റി അറിയിച്ചു.


Dubai Municipality has invited applications to operate container-style mobile gyms at three locations — Al Khawaneej Pond Park, Al Barsha South Park, and Al Mamzar Corniche. The initiative aims to promote outdoor fitness and healthy lifestyles by offering accessible gym facilities in public spaces. Citizens, residents, and private companies can apply for leases, with the deadline set for January 25, 2026.