സാംഗ്ലി: സിനിമയിൽ നിക്ഷേപം വാഗ്ദാനം ചെയ്ത് ലക്ഷങ്ങൾ തട്ടിയെന്ന പരാതിയിൽ പ്രശസ്ത സംഗീത സംവിധായകൻ പലാഷ് മുച്ഛലിനെതിരെ സാംഗ്ലി പൊലിസ് കേസ് രജിസ്റ്റർ ചെയ്തു. നടനും നിർമ്മാതാവുമായ വിഗ്യാൻ മാനെ നൽകിയ പരാതിയുടെ അടിസ്ഥാനത്തിലാണ് പൊലിസ് പ്രാഥമിക അന്വേഷണം ആരംഭിച്ചത്.

സിനിമയുടെ പേരിൽ തട്ടിപ്പ്

പരാതിക്കാരനായ വിഗ്യാൻ മാനെ പറയുന്നതനുസരിച്ച്, 2023 ഡിസംബറിലാണ് തട്ടിപ്പിന്റെ തുടക്കം.പലാഷ് സംവിധാനം ചെയ്യുന്ന 'നസാരിയ' എന്ന സിനിമയിൽ 25 ലക്ഷം രൂപ നിക്ഷേപിച്ചാൽ ഒടിടി റിലീസിന് ശേഷം 12 ലക്ഷം രൂപ ലാഭം നൽകാമെന്നും സിനിമയിൽ വേഷം നൽകാമെന്നും പലാഷ് വിശ്വസിപ്പിച്ചു.

2023 ഡിസംബറിനും 2025 മാർച്ചിനും ഇടയിൽ വിവിധ ഘട്ടങ്ങളിലായി 40 ലക്ഷം രൂപ പലാഷ് കൈപ്പറ്റി.എന്നാൽ നിശ്ചയിച്ച സമയം കഴിഞ്ഞിട്ടും സിനിമ പൂർത്തിയായില്ല. നൽകിയ പണം തിരികെ ആവശ്യപ്പെട്ടപ്പോൾ പലാഷ് ഒഴിഞ്ഞുമാറിയതോടെയാണ് വിഗ്യാൻ മാനെ സാംഗ്ലി പൊലിസ് സൂപ്രണ്ടിനെ സമീപിച്ചത്.

വിവാഹമോചനവും വിവാദങ്ങളും

ഇന്ത്യൻ വനിതാ ക്രിക്കറ്റ് ടീം താരം സ്മൃതി മന്ദാനയുമായുള്ള പലാഷിന്റെ പ്രണയവും തുടർന്നുണ്ടായ വിവാഹ നിശ്ചയവും വലിയ വാർത്തയായിരുന്നു. എന്നാൽ 2025 നവംബർ 23-ന് നടക്കേണ്ടിയിരുന്ന വിവാഹം അവസാന നിമിഷം മുടങ്ങി. സ്മൃതിയുടെ പിതാവിന്റെ ആരോഗ്യനില മോശമായതിനാലാണ് വിവാഹം മാറ്റിയതെന്ന് ഔദ്യോഗികമായി അറിയിച്ചിരുന്നെങ്കിലും, പലാഷിന്റെ ചില വ്യക്തിബന്ധങ്ങളാണ് വേർപിരിയലിലേക്ക് നയിച്ചതെന്ന് റിപ്പോർട്ടുകൾ ഉണ്ടായിരുന്നു. തങ്ങൾ വേർപിരിയുകയാണെന്ന് പലാഷ് തന്നെ പിന്നീട് സോഷ്യൽ മീഡിയയിലൂടെ സ്ഥിരീകരിച്ചിരുന്നു.

സാംഗ്ലി പൊലിസ് കേസുമായി ബന്ധപ്പെട്ട് പലാഷിനെ ചോദ്യം ചെയ്യാൻ വിളിപ്പിച്ചേക്കുമെന്നാണ് സൂചന. പലാഷ് ഇതുവരെ ഈ വിഷയത്തിൽ ഔദ്യോഗികമായി പ്രതികരിച്ചിട്ടില്ല.