തിരുവനന്തപുരം: കേരളത്തിനെ സംബന്ധിച്ച് വികസനത്തിന് പുതിയ ദിശാബോധം വന്നുവെന്ന് പ്രധാനമന്ത്രി നരേന്ദ്രമോദി.പുത്തരിക്കണ്ടം മൈതാനത്ത് അമൃത് ഭാരത്, പാസഞ്ചര്‍ ട്രെയിനുകളുടെ ഫ്‌ളാഗ് ഓഫ് ചെയ്ത് സംസാരിക്കുകയായിരുന്നു അദ്ദേഹം. എന്റെ സുഹൃത്തുക്കളെ എന്ന് മലയാളത്തില്‍ അഭിസംബോധന ചെയ്തുകൊണ്ടാണ് മോദി പ്രസംഗം ആരംഭിച്ചത്. 

കേന്ദ്ര സര്‍ക്കാര്‍ നടപ്പാക്കിയ വികസന പ്രവര്‍ത്തനങ്ങള്‍ പ്രധാനമന്ത്രി എണ്ണിപ്പറഞ്ഞു. വികസിത ഭാരതത്തിനായി രാജ്യം മുഴുവന്‍ ശ്രമിക്കുകയാണ്. നഗരത്തിലെ പാവപ്പെട്ട കുടുംബങ്ങള്‍ക്കായി സര്‍ക്കാര്‍ ഒത്തിരി കാര്യങ്ങള്‍ ചെയ്യുന്നുണ്ട്. കേന്ദ്രസര്‍ക്കാര്‍ കേരളത്തിലെ ജനങ്ങള്‍ക്കൊപ്പമാണ്. കേരളത്തിലെ നഗരങ്ങളിലെ ദരിദ്ര കുടുംബങ്ങള്‍ക്കും ആവാസ് യോജന വഴി വീട് കിട്ടിയെന്നും മോദി പറഞ്ഞു.

'രാജ്യത്തെ മുഴുവന്‍ പാവപ്പെട്ടവരുടെയും ഉന്നമനത്തിന് നടപ്പാക്കുന്ന ഒരു മഹത്തായ സംരഭത്തിനും തിരുവനന്തപുരത്ത് തുടക്കമായിട്ടുണ്ട്''- ഉന്തുവണ്ടിക്കാര്‍ക്കും വഴിയോര കച്ചവടക്കാര്‍ക്കും പ്രയോജനം ലഭിക്കുന്ന ക്രെഡിറ്റ് കാര്‍ഡ് പുറത്തിറക്കിയ ശേഷം മോദി പറഞ്ഞു. 

അമൃത് ഭാരത് ട്രെയിനുകള്‍ കേരളത്തിന്റെ യാത്രാസൗകര്യം കൂടുതല്‍ മെച്ചപ്പെടുത്തിയെന്നും ഗുരുവായൂരിലേക്കുള്ള പുതിയ ട്രെയിന്‍ തീര്‍ഥാടനത്തിന് ഉപയുക്തമാകുമെന്നും പ്രധാനമന്ത്രി പറഞ്ഞു. 

തിരുവനന്തപുരം-താംബരം, തിരുവനന്തപുരം- ഹൈദരാബാദ്, നാഗര്‍കോവില്‍-മംഗളുരു അമൃത് ഭാരത് ട്രെയിനുകള്‍, ഗുരുവായൂര്‍-തൃശൂര്‍ പാസഞ്ചര്‍ എന്നിവയാണ് മോദി ഫ്ളാഗ് ഓഫ് ചെയ്തത്. വിമാനത്താവളത്തില്‍ നിന്ന് പുത്തരിക്കണം മൈതാനത്തേക്ക് റോഡ് ഷോ ആയിട്ടാണ് പ്രധാനമന്ത്രി എത്തിയത്.മുഖ്യമന്ത്രി പിണറായി വിജയന്‍, ഗവര്‍ണര്‍ രാജേന്ദ്ര അര്‍ലേക്കര്‍ എന്നിവരുടെ നേതൃത്വത്തില്‍ വിമാനത്താവളത്തില്‍ പ്രധാനമന്ത്രിയെ സ്വീകരിച്ചു.

Prime Minister Narendra Modi said that Kerala has entered a new phase of development and will move forward with a renewed sense of direction. He was speaking after flagging off Amrit Bharat and passenger train services at Putharikandam Maidan in the state capital.