ആലപ്പുഴ: ഡ്രൈവിങ് സ്കൂൾ ഏജൻ്റിൽ നിന്ന് കൈക്കൂലി വാങ്ങുന്നതിനിടെ ചേർത്തല മോട്ടോർ വെഹിക്കിൾ ഇൻസ്പെക്ടർ (MVI) വിജിലൻസിൻ്റെ പിടിയിലായി. ചേർത്തല ജോയിൻ്റ് ആർ.ടി.ഒ ഓഫീസിലെ എം.വി.ഐ ആയ കെ.ജി. ബിജുവിനെയാണ് ആലപ്പുഴ വിജിലൻസ് സംഘം അറസ്റ്റ് ചെയ്തത്. വെള്ളിയാഴ്ച വൈകിട്ടോടെ ഇദ്ദേഹത്തിൻ്റെ വീട്ടിൽ വെച്ചായിരുന്നു നാടകീയ നീക്കങ്ങൾ നടന്നത്.

സംഭവം ഇങ്ങനെ:

വാഹനങ്ങളുടെ റീ-ടെസ്റ്റ് നടത്തുന്നതുമായി ബന്ധപ്പെട്ട നടപടികൾ വേഗത്തിലാക്കാൻ ഡ്രൈവിങ് സ്കൂൾ ഏജൻ്റിൽ നിന്ന് ബിജു പണം ആവശ്യപ്പെടുകയായിരുന്നു. ഇതനുസരിച്ച് 5,600 രൂപ കൈമാറാനായി ഏജൻ്റ് ബിജുവിൻ്റെ വീട്ടിലെത്തി. പണം കൈപ്പറ്റുന്നതിനിടെ വീടിന് ചുറ്റും മറഞ്ഞുനിന്നിരുന്ന വിജിലൻസ് ഉദ്യോഗസ്ഥർ പാഞ്ഞെത്തി ഇദ്ദേഹത്തെ പിടികൂടുകയായിരുന്നു.

വിജിലൻസ് ട്രാപ്പ്: 

മുൻകൂട്ടി ലഭിച്ച രഹസ്യ വിവരത്തിൻ്റെ അടിസ്ഥാനത്തിൽ വിജിലൻസ് സംഘം 'ട്രാപ്പ്' ഒരുക്കുകയായിരുന്നു. ഫിനോഫ്തലിൻ പുരട്ടിയ നോട്ടുകളാണ് ഏജൻ്റ് വഴി കൈമാറിയത്.കൈക്കൂലി പണം പിടിച്ചെടുത്തതിന് പിന്നാലെ ഇദ്ദേഹത്തിൻ്റെ വീട്ടിൽ വിജിലൻസ് വിശദമായ പരിശോധന നടത്തി. സേവനങ്ങൾക്കായി എത്തുന്നവരിൽ നിന്ന് ബിജു സ്ഥിരമായി പണം ആവശ്യപ്പെടാറുണ്ടെന്ന് പരാതികൾ ഉയർന്നിരുന്നു.കസ്റ്റഡിയിലെടുത്ത ഉദ്യോഗസ്ഥനെ വൈദ്യപരിശോധനയ്ക്ക് വിധേയനാക്കി. അറസ്റ്റ് രേഖപ്പെടുത്തിയ ശേഷം ഇദ്ദേഹത്തെ വിജിലൻസ് കോടതിയിൽ ഹാജരാക്കും.