കണ്ണൂര്‍ -പിലാത്തറ ദേശീയപാതയില്‍ ബസുകള്‍ മല്‍സരിച്ചോടുന്നു
കെ.എസ്.ആര്‍.ടി.സി ബസിനുപോലും അമിതവേഗത
കണ്ണൂര്‍: ദേശീയപാതയില്‍ കണ്ണൂര്‍ മുതല്‍ പിലാത്തറ വരെയുള്ള ദൂരം അമിത വേഗതയിലോടുന്ന ബസുകളില്‍ യാത്രക്കാര്‍ ഇരിക്കുന്നത് ജീവന്‍ പണയം വച്ച്.
ദിവസവും വലുതും ചെറുതുമായ അപകടങ്ങളാണ് പരിയാരം കണ്ണൂര്‍ പാതയില്‍ അരങ്ങേറുന്നത്. കെ.എസ്.ആര്‍.ടി.സി ബസുകളുടെയും സ്വകാര്യ ബസുകളുടെയും മല്‍സര ഓട്ടം അപകടങ്ങള്‍ക്ക് വഴിവെക്കുന്നതായി ഗതാഗതവകുപ്പിന്റെ കണ്ടെത്തിയിരുന്നു. പരിയാരം മുതല്‍ തളിപ്പറമ്പ് വരെ അപകട മേഖലയായി പൊലിസ് കണ്ടെത്തിയിരുന്നെങ്കിലും വാഹനങ്ങളുടെ അമിതവേഗത നിയന്ത്രിക്കാനുള്ള നടപടി ഇനിയും ആരംഭിച്ചിട്ടില്ല. പൊലിസ് എയ്ഡ് പോസ്റ്റുകളോ, പാതയില്‍ സ്പീഡ് ബ്രേക്കറുകളോ സ്ഥാപിക്കാന്‍ അധികൃതര്‍ തയാറാകാത്തതിനാല്‍ കണ്ണൂര്‍ മുതല്‍ പിലാത്തറ വരെയുള്ള പ്രദേശം ദിവസവും അപകടം നടക്കുന്ന പാതയായി മാറിക്കഴിഞ്ഞു. ദീര്‍ഘദൂര സ്വകാര്യ ബസുകള്‍ മറ്റു ഹ്രസ്വദൂര ബസുകളോട് മല്‍സരിച്ചോടുമ്പോള്‍ കെ.എസ്.ആര്‍.ടി.സി ബസുകള്‍ കെ.എസ്.ആര്‍.ടി.സിയോട് തന്നെയാണ് മല്‍സരിക്കുന്നത്. രാത്രിയിലെ ബസുകളാണ് ഇപ്പോള്‍ ഏറ്റവും കൂടുതല്‍ അമിതവേഗതയില്‍ സഞ്ചരിക്കുന്നത്. രാത്രിയില്‍ ദേശീയപാതയിലൂടെ ധാരാളം ടാങ്കര്‍ ലോറികള്‍ സഞ്ചരിക്കുന്നുണ്ടെങ്കിലും ബസുകള്‍ക്ക് ഇതൊന്നും പ്രശ്‌നമല്ലെന്ന രീതിലാണ് സഞ്ചരിക്കുന്നത്. ഇന്നലെ പുതിയ തെരുവില്‍ ബസ് കടയിലേക്ക് പാ
ഞ്ഞുകയറി അഞ്ചുപേര്‍ക്കാണ് പരുക്കേറ്റത്. തളിപ്പറമ്പില്‍ ഒരാഴ്ച മുമ്പ് ബസ് വഴിയാത്രക്കാരനെയിടിച്ച് കടയിലേക്ക് പാഞ്ഞു കയറിയ സംഭവവും നടന്നിരുന്നു. വഴിയാത്രക്കാരന്‍ പിന്നീട് മരണപ്പെട്ടു. കെ.എസ്.ആര്‍.ടി.സി അടക്കമുള്ള ബസുകള്‍ സ്പീഡ് ഗവര്‍ണറുകള്‍ ഇളക്കിമാറ്റിയാണ് ഈപാതയില്‍ ഓടുന്നതെന്നാണ് പരക്കെയുള്ള ആരോപണം. സ്പീഡ് ഗവര്‍ണര്‍ പരിശോധന നടക്കാത്തിനാല്‍ അമിതവേഗതയില്‍ ഓടുന്ന ബസുകളുടെ എണ്ണം വര്‍ധിക്കുകയാണ്.