കണ്ണൂര്‍: 'പടരുന്ന ലഹരി പതറുന്ന ജീവിതം' എന്ന പ്രമേയത്തില്‍ എസ്.കെ.എസ്.എസ്.എഫ് ജില്ലയിലെ മുഴുവന്‍ ക്ലസ്റ്ററുകള്‍ കേന്ദ്രീകരിച്ചും ത്രൈമാസ ലഹരി വിരുദ്ധ ക്യാംപയിനിന്റെ ജില്ലാതല ഉദ്ഘാടനം ഓണപ്പറമ്പില്‍ എസ്.കെ.എസ്.എസ്.എഫ് ജില്ലാ പ്രസിഡന്റ് ബഷീര്‍ അസ്അദി നമ്പ്രം നിര്‍വഹിച്ചു. സമൂഹത്തില്‍ ലഹരി വ്യാപനം വര്‍ധിച്ചുവെന്നും യുദ്ധകാലാടിസ്ഥാനത്തില്‍ അതിനെതിരെ പൊരുതാന്‍ ജനങ്ങള്‍ ഉണര്‍ന്ന് പ്രവര്‍ത്തിക്കണമെന്നും അദ്ദേഹം പറഞ്ഞു.
സിറാജുദ്ദീന്‍ ദാരിമി കക്കാട് പ്രമേയ പ്രഭാഷണം നടത്തി. ക്യാംപയിന്റെ ഭാഗമായി ക്യാംപസുകളില്‍ ലഘുലേഖ വിതരണം, ഡോക്യുമെന്ററി പ്രദര്‍ശനം, ലഹരി വിരുദ്ധ കൂട്ടായ്മകള്‍, ബോധവല്‍കരണ ക്ലാസുകള്‍, കൊളാഷ്, പോസ്റ്റര്‍ രചനാ മത്സരം, കൗണ്‍സിലിങ്ങ്, ഫീല്‍ഡ് വര്‍ക്ക് ഇന്ററാക്ഷന്‍, നവമാധ്യമ പ്രചാരണങ്ങള്‍, ലഹരിവിരുദ്ധ പദയാത്രകള്‍, മെസേജ് കൈമാറ്റം എന്നിവ നടക്കും. അബ്ദുല്ല യമാനി അധ്യക്ഷനായി.
ഇസ്ഹാഖ് ദാരിമി, എം അബ്ദുല്ല, എന്‍.യു മശ്ക്കൂര്‍, അബ്ദുല്‍ ഖാസിം മുക്കുന്ന്, അന്‍വര്‍ ഏറന്തല, റഷീദ് കൊട്ടില സംസാരിച്ചു.