മഞ്ചേശ്വരം: ഹൊസങ്കടി കടമ്പാര്‍ മനയില്‍ ദമ്പതികളെ ബന്ദികളാക്കി 30 പവനും 30,000 രൂപയും റിട്‌സ് കാറും കവര്‍ന്ന സംഘത്തെക്കുറിച്ച് പൊലിസിനു സൂചന ലഭിച്ചു. കവര്‍ച്ചാ സംഘം കൊണ്ടുപോയ കാര്‍ കര്‍ണാടക പണമ്പൂരില്‍ ഉപേക്ഷിച്ച നിലയില്‍ കണ്ടെത്തി.
അതിനിടെ പ്രതികളുടേതെന്നു സംശയിക്കുന്ന മൂന്നു വിരലടയാളങ്ങള്‍ ലഭിച്ചതായും സൂചനയുണ്ട്. ഇന്നലെ പുലര്‍ച്ചെയാണ് കടമ്പാര്‍ മനയിലെ രവീന്ദ്രനാഥ ഷെട്ടിയുടെ വീട്ടില്‍ കവര്‍ച്ച നടന്നത്.
വീടിന്റെ മുന്‍ഭാഗത്തെ വാതില്‍ പൂട്ടു പൊളിച്ച് അകത്തു കടന്ന സംഘം ഷെട്ടിയേയും ഭാര്യ മഹാലക്ഷ്മിയേയും കത്തി കാട്ടി ഭീഷണിപ്പെടുത്തി സ്വര്‍ണവും പണവും കാറും കവര്‍ന്നു രക്ഷപ്പെടുകയായിരുന്നു.
പണമ്പൂരിലെ റോഡരികില്‍ ഉപേക്ഷിച്ച നിലയിലാണു റിട്‌സ് കാര്‍ കണ്ടെത്തിയത്. ഫോറന്‍സിക് വിദഗ്ധര്‍ പരിശോധിച്ച ശേഷം കാര്‍ മഞ്ചേശ്വരത്തേക്കു കൊണ്ടുവന്നു.
വീടിന്റെ മുന്‍വശത്തെ വാതിലില്‍ നിന്ന് ഒരു വിരലടയാളവും കവര്‍ച്ചാ സംഘം പുറത്തു വലിച്ചെറിഞ്ഞ ടോര്‍ച്ചില്‍ നിന്ന് മറ്റൊരു വിരലടയാളവും പൊലിസിന് ശേഖരിക്കാനായി.
പൊലിസ് നായ എത്തി വീടിനകത്തു നിന്നു മണം പിടിച്ച് മുന്‍വശത്തെ ഗേറ്റുവരെ ഓടി തിരിച്ചു വന്നു.