ബെംഗളൂരു: ബെംഗളൂരു കെംപെഗൗഡ അന്താരാഷ്ട്ര വിമാനത്താവളം വഴി അമേരിക്കയിലേക്ക് യാത്ര ചെയ്ത വയോധികയുടെ ലഗേജിൽ നിന്ന് ഒരു കോടി രൂപ വിലമതിക്കുന്ന സ്വർണാഭരണങ്ങളും വജ്രവും കവർന്നു. ഹുബ്ബള്ളി സ്വദേശിനിയായ ശാന്ത രമേഷിന്റെ പരാതിയിൽ എയർപോർട്ട് പൊലിസ് കേസെടുത്ത് അന്വേഷണം ആരംഭിച്ചു. ബാഗിന് പുറമെ യാതൊരു കേടുപാടുകളും വരുത്താതെയാണ് അകത്തെ വിലപിടിപ്പുള്ള വസ്തുക്കൾ തട്ടിയെടുത്തത് എന്നതാണ് ഞെട്ടിപ്പിക്കുന്നത്.

സംഭവത്തെക്കുറിച്ച് ശാന്ത രമേഷ് പറയുന്നത്:

അമേരിക്കയിൽ മകനോടൊപ്പം സ്ഥിരതാമസമാക്കിയ ശാന്ത രമേഷ് കഴിഞ്ഞ നവംബർ 15-നാണ് ബെംഗളൂരുവിൽ നിന്ന് ആകാശ എയർ വിമാനത്തിൽ യാത്ര പുറപ്പെട്ടത്. അബുദാബി വഴിയായിരുന്നു അമേരിക്കയിലേക്കുള്ള യാത്ര.

പരിശോധന കഴിഞ്ഞ ബാഗ്: 

ചെക്ക്-ഇൻ സമയത്ത് ലഗേജ് ബാഗിനകത്തുള്ള 790 ഗ്രാം സ്വർണവും 8 ലക്ഷം രൂപയുടെ ഡയമണ്ടും ഉദ്യോഗസ്ഥരെ കാട്ടി ബോധ്യപ്പെടുത്തിയ ശേഷമാണ് ബാഗ് ടാഗ് ചെയ്തതെന്ന് ഇവർ പറയുന്നു.

കവർച്ച തിരിച്ചറിഞ്ഞത്: 

അബുദാബിയിൽ എത്തിയ ശേഷം ബാഗ് പരിശോധിച്ചപ്പോഴാണ് ആഭരണങ്ങൾ നഷ്ടപ്പെട്ട വിവരം അറിഞ്ഞത്. ഉടൻ തന്നെ അബുദാബി എയർപോർട്ടിലും വിമാനക്കമ്പനിയുടെ കസ്റ്റമർ കെയറിലും പരാതിപ്പെട്ടെങ്കിലും ഫലമുണ്ടായില്ല. തുടർന്നാണ് നാട്ടിൽ തിരിച്ചെത്തി പൊലിസിനെ സമീപിച്ചത്.

ബാഗിന് കേടുപാടുകളില്ല; സംശയം ഉദ്യോഗസ്ഥരിലേക്ക്

ബാഗിന്റെ സിബ്ബോ പൂട്ടു പൊളിക്കുകയോ ചെയ്യാതെയാണ് കവർച്ച നടന്നിരിക്കുന്നത്. പുറമെ നിന്ന് നോക്കിയാൽ ബാഗിന് യാതൊരു കേടുപാടുമില്ല. ഇത് വിമാനത്താവളത്തിലെ ലഗേജ് കൈകാര്യം ചെയ്യുന്ന ജീവനക്കാരിലേക്ക് സംശയത്തിന്റെ വിരൽ ചൂണ്ടുന്നു.

പൊലിസ് നടപടികൾ:

നവംബർ 15-ന് ബെംഗളൂരു വിമാനത്താവളത്തിൽ ലഗേജ് വിഭാഗത്തിൽ ജോലി ചെയ്തിരുന്ന ജീവനക്കാരെ ചോദ്യം ചെയ്യും.ലഗേജ് കൈമാറ്റ കേന്ദ്രങ്ങളിലെ സിസിടിവി ദൃശ്യങ്ങൾ പൊലിസ് ശേഖരിച്ചുവരികയാണ്.സംഭവത്തിൽ ആകാശ എയർ അധികൃതരോടും വിശദീകരണം തേടിയിട്ടുണ്ട്.

ലഗേജ് ബാഗുകളിൽ വിലപിടിപ്പുള്ള വസ്തുക്കൾ വെക്കരുതെന്ന നിർദ്ദേശം നിലനിൽക്കെ, ഉദ്യോഗസ്ഥരെ കാട്ടി ബോധ്യപ്പെടുത്തിയ ആഭരണങ്ങൾ എങ്ങനെ നഷ്ടപ്പെട്ടു എന്നതിനെക്കുറിച്ച് പൊലിസ് വിശദമായ അന്വേഷണം നടത്തുന്നു.