കല്‍ബ: യു.എ.ഇയിലെ നഗരാതിര്‍ത്തികളിലേക്കും റീട്ടെയ്ല്‍ സേവനം വിപുലമാക്കുന്നതിന്റെ ഭാഗമായി ഷാര്‍ജ എമിറേറ്റിലെ കല്‍ബയില്‍ പുതിയ ഹൈപ്പര്‍ മാര്‍ക്കറ്റ് തുറന്ന് ലുലു ഗ്രൂപ്പ്. കല്‍ബ മുന്‍സിപ്പാലിറ്റി ഡയരക്ടര്‍ ഡോ. അഹമ്മദ് സഈദ് അല്‍ മസ്‌റൂഇ പുതിയ സ്റ്റോറിന്റെ ഉദ്ഘാടനം നിര്‍വഹിച്ചു. ലുലു ഗ്രൂപ്പ് ചെയര്‍മാന്‍ എം.എ. യൂസഫലി, കല്‍ബ ഇക്കണോമിക് ഡിപാര്‍ട്‌മെന്റ് ഹെഡ് അംന അല്‍ സആബി, ഡെപ്യൂട്ടി ഹെഡ് ഇബ്രാഹിം സുലൈമാന്‍ അല്‍ ഷര്‍ഫ എന്നിവര്‍ ചടങ്ങില്‍ സംബന്ധിച്ചു.

യു.എ.ഇയില്‍ ലുലു ഗ്രൂപ്പിന്റെ 122ാമത് സ്റ്റോറാണിത്. ഉപഭോക്താക്കള്‍ക്ക് താമസസ്ഥലങ്ങള്‍ക്ക് സമീപം തന്നെ ലോകോത്തര ഷോപ്പിങ് അനുഭവം ഉറപ്പാക്കുകയാണ് ലക്ഷ്യമെന്ന് എം.എ. യൂസഫലി പറഞ്ഞു. ജി.സി.സിയിലെ മറ്റ് നഗരങ്ങളിലേക്കും ലുലുവിന്റെ സേവനം വരുംദിവസങ്ങളില്‍ കൂടുതല്‍ വിപുലമാക്കുമെന്നും അദ്ദേഹം വ്യക്തമാക്കി.

43,000 ചതുരശ്ര അടിയില്‍ ഒരുക്കിയ ഹൈപ്പര്‍ മാര്‍ക്കറ്റില്‍ ഗ്രോസറി, ഫ്രഷ് ഫുഡ്, ഹോട്ട് ഫുഡ് ബേക്കറി, ലൈവ് ഫിഷ്മീറ്റ് കൗണ്ടറുകള്‍ എന്നിവ സജ്ജീകരിച്ചിട്ടുണ്ട്. കൂടാതെ ഫാഷന്‍ ഉല്‍പ്പന്നങ്ങള്‍, ഇലക്ട്രോണിക്‌സ്, ഹോം അപ്ലയന്‍സസ് എന്നിവയുടെ വിപുലമായ ശേഖരവും ഇവിടെയുണ്ട്. ഷോപ്പിങ് സുഗമമാക്കാന്‍ സെല്‍ഫ് ചെക്ക് ഔട്ട് കൗണ്ടറുകളും വിശാലമായ പാര്‍ക്കിങ് സൗകര്യവും ഒരുക്കിയിട്ടുണ്ട്. ലുലു സി.ഇ.ഒ. സൈഫി രൂപാവാല, ഗ്ലോബല്‍ ഓപറേഷന്‍സ് ഡയറക്ടര്‍ സലിം എം.എ, ലുലു ഷാര്‍ജ ഡയറക്ടര്‍ അജയ് നായര്‍ തുടങ്ങിയവരും ഉദ്ഘാടന ചടങ്ങില്‍ പങ്കെടുത്തു.

English Summary: Lulu Group has opened its latest hypermarket in Kalba, Sharjah, as part of its strategy to extend retail services to suburban areas. The store, which marks Lulu's 122nd outlet in the UAE, was inaugurated by Dr. Ahmed Saeed Al Mazrouei, Director of Kalba Municipality, in the presence of Lulu Group Chairman M.A. Yusuff Ali and other dignitaries.