ദുബൈ: യുഎഇയുടെ വിവിധ ഭാഗങ്ങളിൽ ശക്തമായ കാറ്റും മഴയും അനുഭവപ്പെട്ടു. വടക്കൻ എമിറേറ്റുകളിൽ ഇടിമിന്നലോടു കൂടിയ കനത്ത മഴയാണ് പെയ്തത്. ഈ മാറ്റം ശൈത്യകാലത്തെ കൂടുതൽ മനോഹരവും എന്നാൽ അൽപ്പം അപകടകരവുമാക്കിയിട്ടുണ്ട്. കാലാവസ്ഥാ വകുപ്പ് നൽകിയ മുന്നറിയിപ്പ് ശരിവെക്കുന്നതായിരുന്നു ഇന്നത്തെ കാഴ്ചകൾ.

റാസൽഖൈമയിലെ മലനിരകളിൽ നിന്നുള്ള കൗതുകകരമായ കാഴ്ചകൾ സമൂഹമാധ്യമങ്ങളിൽ പ്രചരിക്കുന്നുണ്ട്. കനത്ത മഴ പെയ്തതോടെ ജബൽ ജൈസിലെ പാറക്കെട്ടുകളിലൂടെ വെള്ളം കുത്തിയൊലിച്ചു. വറ്റി വരണ്ടു കിടന്നിരുന്ന വാദികൾ നിറഞ്ഞൊഴുകി. ഇത് മലനിരകളിൽ താൽക്കാലിക വെള്ളച്ചാട്ടങ്ങൾ ഉണ്ടാകാൻ കാരണമായി. സോഷ്യൽ മീഡിയയിൽ ഇതിന്റെ ദൃശ്യങ്ങൾ വൈറലായിക്കൊണ്ടിരിക്കുകയാണ്. വടക്കൻ മേഖലകളിൽ പലയിടത്തും ആലിപ്പഴ വർഷവും ഉണ്ടായി.

ALSO READ: ഒറ്റ വിസയിൽ 6 ഗൾഫ് രാജ്യങ്ങൾ! ജിസിസി ഏകീകൃത വിസ വരുന്നു; എങ്ങനെ അപേക്ഷിക്കാം? | gcc unified visa 

അബുദബിയിൽ അതീവ ജാഗ്രത

മഴയ്ക്ക് പുറമെ കനത്ത മൂടൽമഞ്ഞും രാജ്യത്തിന്റെ ചില ഭാഗങ്ങളിൽ പ്രതിസന്ധി സൃഷ്ടിച്ചു. അബുദബിയിലെ ശൈഖ് ഖലീഫ ബിൻ സായിദ് റോഡിൽ കാഴ്ച പരിധി കുറഞ്ഞതിനെ തുടർന്ന് വാഹനങ്ങളുടെ വേഗത കുറയ്ക്കാൻ അധികൃതർ നിർദ്ദേശം നൽകി. ജബൽ ധന്ന മുതൽ ഉം അൽ അഷ്ടാൻ വരെയുള്ള ഭാഗങ്ങളിൽ വേഗനിയന്ത്രണം ഏർപ്പെടുത്തിയിട്ടുണ്ട്. ഇലക്ട്രോണിക് ബോർഡുകളിൽ കാണിക്കുന്ന വേഗത മാത്രം പാലിക്കാൻ പൊലിസ് യാത്രികർക്ക് നിർദ്ദേശം നൽകി. വാഹനങ്ങൾ തമ്മിൽ കൃത്യമായ അകലം പാലിക്കാനും പൊലിസ് ആവശ്യപ്പെട്ടിട്ടുണ്ട്.

#عاجل | #تنبيه #ضباب #شرطة_أبوظبي ترجو من الإخوة السائقين توخي الحذر بسبب انخفاض الرؤية الأفقية أثناء تشكل الضباب وتدعوهم للالتزام بالسرعة المتغيرة الموضحة على الشواخص واللوحات الارشادية الالكترونية مع تمنياتنا لكم بالسلامة. pic.twitter.com/YF0z05oZOR

— شرطة أبوظبي (@ADPoliceHQ) February 8, 2026

ദേശീയ കാലാവസ്ഥാ നിരീക്ഷണ കേന്ദ്രത്തിന്റെ (NCM) കണക്കനുസരിച്ച് തിങ്കളാഴ്ച രാവിലെ വരെ ഈ സാഹചര്യം തുടരാൻ സാധ്യതയുണ്ട്. മണിക്കൂറിൽ 40 കിലോമീറ്റർ വേഗതയിൽ വരെ കാറ്റ് വീശാൻ സാധ്യതയുണ്ട്. അറേബ്യൻ ഗൾഫിലും ഒമാൻ കടലിലും കടൽ നേരിയ തോതിൽ പ്രക്ഷുബ്ധമായേക്കാം. പകൽ സമയം 20 ഡിഗ്രിക്ക് മുകളിലും രാത്രിയിൽ 20 ഡിഗ്രിക്ക് താഴെയും ആയിരിക്കും ചൂട് അനുഭവപ്പെടുക. രാത്രി കാലങ്ങളിൽ തീരദേശ നഗരങ്ങളിൽ ഈർപ്പത്തിന്റെ അളവ് കൂടും. ഇത് മൂടൽമഞ്ഞിന് കാരണമാകും.

പെട്ടെന്നുണ്ടാകുന്ന ഈ കാലാവസ്ഥാ മാറ്റം യാത്രക്കാരെയും വിനോദസഞ്ചാരികളെയും ഒരുപോലെ ബാധിക്കുന്നുണ്ട്. വാദികളിലേക്കും മലനിരകളിലേക്കും പോകുന്നവർ സുരക്ഷാ നിർദ്ദേശങ്ങൾ കർശനമായി പാലിക്കണം.

unexpected cool rain and hailstorm were reported in ras al khaimah, while authorities issued a high alert in abu dhabi as unstable weather conditions continue across parts of the uae, prompting safety advisories for residents.