അബുദബി: യുഎഇയിൽ ഓൺലൈൻ ഗെയിമുകളിലൂടെയും സോഷ്യൽ മീഡിയ പ്ലാറ്റ്‌ഫോമുകളിലൂടെയും കുട്ടികളെ ലക്ഷ്യമിട്ടുള്ള സാമ്പത്തിക തട്ടിപ്പുകളും ചൂഷണങ്ങളും വർദ്ധിക്കുന്നതായി അധികൃതർ. കുട്ടികളെ വശീകരിച്ച് മാതാപിതാക്കളുടെ ബാങ്ക് കാർഡ് വിവരങ്ങൾ കൈക്കലാക്കുകയും ലൈംഗികമായി ചൂഷണം ചെയ്യുകയും ചെയ്യുന്ന കേസുകൾ ശ്രദ്ധയിൽപ്പെട്ടതിനെ തുടർന്ന് പൊലിസും പബ്ലിക് പ്രോസിക്യൂഷനും ജാഗ്രതാ നിർദ്ദേശം പുറപ്പെടുവിച്ചു.

കുറ്റവാളികൾ വ്യാജ ഐഡന്റിറ്റികൾ ഉപയോഗിച്ച് ഗെയിമുകളിലൂടെ കുട്ടികളുമായി സൗഹൃദം സ്ഥാപിക്കും. തുടർന്ന് കുട്ടികളുമായി ദിവസങ്ങളോളം ചാറ്റ് ചെയ്ത് അവരുടെ പ്രിയപ്പെട്ട കൂട്ടുകാരനായി മാറുന്നു. ഗെയിമിലെ പുതിയ ലെവലുകൾ തുറക്കാനോ പ്രത്യേക വസ്ത്രങ്ങളും ആയുധങ്ങളും വാങ്ങാനോ മാതാപിതാക്കളുടെ ക്രെഡിറ്റ്/ഡെബിറ്റ് കാർഡ് ഉപയോഗിക്കാൻ ഇവർ കുട്ടികളെ പ്രേരിപ്പിക്കുന്നു.

പിന്നീട് കാർഡിന്റെ ഇരുവശവും ഫോട്ടോ എടുത്ത് അയക്കാനും രഹസ്യ പിൻ (PIN) നമ്പർ കൈമാറാനും ഇവർ കുട്ടികളോട് ആവശ്യപ്പെടുന്നു. ഇത് ഉപയോഗിച്ച് മിനിറ്റുകൾക്കുള്ളിൽ ബാങ്ക് അക്കൗണ്ടിലെ പണം മോഷ്ടിക്കും. കുട്ടികളുടെ സ്വകാര്യ ചിത്രങ്ങളോ വീഡിയോകളോ കൈക്കലാക്കി അവരെ ഭീഷണിപ്പെടുത്തുന്ന രീതിയും കുറ്റവാളികൾ പിന്തുടരുന്നുണ്ട്.

ALSO READ: ഒറ്റ വിസയിൽ 6 ഗൾഫ് രാജ്യങ്ങൾ! ജിസിസി ഏകീകൃത വിസ വരുന്നു; എങ്ങനെ അപേക്ഷിക്കാം? | gcc unified visa 

യുഎഇ സൈബർ നിയമപ്രകാരം പ്രായപൂർത്തിയാകാത്തവരെ ഓൺലൈൻ വഴി ചൂഷണം ചെയ്യുന്നവർക്ക് കഠിനമായ ശിക്ഷയാണ് നൽകുന്നത്. പൊതു മര്യാദകൾ ലംഘിക്കുന്ന തരത്തിലുള്ള കാര്യങ്ങൾ പ്രചരിപ്പിച്ചാൽ 2.5 ലക്ഷം മുതൽ 5 ലക്ഷം ദിർഹം വരെ പിഴയും തടവും ലഭിക്കാം. കുട്ടികളെയാണ് ലക്ഷ്യം വെക്കുന്നതെങ്കിൽ കുറഞ്ഞത് ഒരു വർഷം തടവും 5 ലക്ഷം ദിർഹം വരെ പിഴയും ഈടാക്കും.

അബുദബിയിലും ദുബൈയിലും ഇത്തരം കേസുകളിൽ പിടിയിലായവർക്ക് കോടതി കനത്ത ശിക്ഷ വിധിച്ച് കഴിഞ്ഞു. യുഎസ് കേന്ദ്രമായുള്ള ചൈൽഡ് പ്രൊട്ടക്ഷൻ സെന്ററുകളുടെ സഹായത്തോടെയാണ് പല അന്താരാഷ്ട്ര ഓൺലൈൻ തട്ടിപ്പുകാരെയും യുഎഇ പൊലിസ് കുടുക്കിയത്.

രക്ഷിതാക്കൾ ശ്രദ്ധിക്കാൻ

• ബാങ്ക് കാർഡുകൾ നൽകരുത്: ചെറിയ ആവശ്യങ്ങൾക്കായി പോലും കുട്ടികൾക്ക് ബാങ്ക് കാർഡ് വിവരങ്ങൾ നൽകരുത്.
• ഗെയിമുകൾ നിരീക്ഷിക്കുക: കുട്ടികൾ കളിക്കുന്ന ഗെയിമുകൾ ഏതാണെന്നും അതിൽ ആരുമായാണ് അവർ സംസാരിക്കുന്നതെന്നും ഇടയ്ക്കിടെ പരിശോധിക്കുക.
• ചാറ്റ് ഓഫ് ചെയ്യുക: ഗെയിമുകളിലെ പ്രൈവറ്റ് ചാറ്റ് ഫീച്ചറുകൾ സാധ്യമാകുന്നിടത്തോളം പ്രവർത്തനരഹിതമാക്കുക.
• വിവരങ്ങൾ പങ്കുവെക്കരുത്: കാർഡ് നമ്പറോ പാസ്‌വേഡോ ഫോട്ടോയോ ആരോടും പങ്കുവെക്കരുതെന്ന് കുട്ടികളെ പറഞ്ഞു മനസ്സിലാക്കുക.
• പരാതിപ്പെടുക: സംശയാസ്പദമായ എന്തെങ്കിലും ശ്രദ്ധയിൽപ്പെട്ടാൽ ഉടൻ തന്നെ ഔദ്യോഗിക ചാനലുകൾ വഴി പൊലിസിനെ അറിയിക്കുക.

uae authorities have issued a warning after reports of bank fraud linked to online games, where cyber criminals target children to steal personal and banking details, urging parents to stay alert and monitor digital activity closely.