ദുബൈ: ദുബൈയിലെ തിരക്കേറിയ പാതകളിലൊന്നായ അൽ ഖുദ്‌റ റോഡിൽ പുതിയ പാലം തുറന്നു. ദുബൈ സ്റ്റുഡിയോ സിറ്റിയുമായി ബന്ധിപ്പിക്കുന്ന അൽ ഖുദ്‌റ റോഡിലെ കവലയിൽ നിർമ്മിച്ച 600 മീറ്റർ നീളമുള്ള പാലമാണ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) ഗതാഗതത്തിനായി തുറന്നുകൊടുത്തത്.

ഓരോ ദിശയിലേക്കും നാലുവരി പാതകളുള്ള ഈ പാലം നിലവിൽ വന്നതോടെ റോഡിന്റെ ശേഷിയിൽ 191 ശതമാനം വർദ്ധനവാണ് ഉണ്ടായിരിക്കുന്നത്. മുൻപ് മണിക്കൂറിൽ 6,600 വാഹനങ്ങൾ മാത്രം കടന്നുപോയിരുന്ന ഈ പാതയിലൂടെ ഇനി മുതൽ 19,200 വാഹനങ്ങൾക്ക് സുഗമമായി സഞ്ചരിക്കാം. ഇതോടെ ജംഗ്ഷനിലെ കാത്തിരിപ്പ് സമയം 113 സെക്കൻഡിൽ നിന്ന് വെറും 52 സെക്കൻഡായി കുറഞ്ഞു.

ALSO READ: ഓൺലൈൻ ഗെയിമുകൾ വഴി ബാങ്ക് തട്ടിപ്പ്: കുട്ടികളെ ലക്ഷ്യമിട്ട് സൈബർ ക്രിമിനലുകൾ; മുന്നറിയിപ്പുമായി യുഎഇ അധികൃതർ 

അൽ ഖുദ്‌റ റോഡ് വികസന പദ്ധതിയുടെ ഭാഗമായി നിരവധി പാലങ്ങളും റോഡുകളുമാണ് ആർടിഎ നവീകരിക്കുന്നത്. പദ്ധതി പൂർണ്ണമാകുന്നതോടെ ഈ മേഖലയിലെ യാത്രാ സമയം 9.4 മിനിറ്റിൽ നിന്ന് 2.8 മിനിറ്റായി കുറയുമെന്ന് ആർടിഎ ഡയറക്ടർ ജനറൽ മതാർ അൽ തായർ പറഞ്ഞു. അതായത് ഏകദേശം 70 ശതമാനം സമയലാഭമാണ് യാത്രക്കാർക്ക് ലഭിക്കുക. ഏകദേശം 4 ലക്ഷത്തോളം താമസക്കാർക്കും സന്ദർശകർക്കും ഈ പദ്ധതിയുടെ പ്രയോജനം ലഭിക്കും.

ഫെബ്രുവരി 15-ന് അൽ ഖുദ്‌റ റോഡിന്റെയും ഷെയ്ഖ് സായിദ് ബിൻ ഹംദാൻ അൽ നഹ്യാൻ സ്ട്രീറ്റിന്റെയും കവലയിൽ പുതിയ വടക്കൻ പാലം കൂടി തുറക്കും. 700 മീറ്റർ നീളമുള്ള ഈ പാലം തുറക്കുന്നതോടെ അൽ ഖുദ്‌റ സിറ്റിയിലേക്കും ഷെയ്ഖ് മുഹമ്മദ് ബിൻ സായിദ് റോഡിലേക്കുമുള്ള യാത്ര കൂടുതൽ സുഗമമാകും. കൂടാതെ, എമിറേറ്റ്സ് റോഡിലേക്കുള്ള പാതകൾ വീതികൂട്ടുന്ന പ്രവൃത്തികളും പദ്ധതിയുടെ ഭാഗമായി നടന്നുവരികയാണ്.

dubai opens a new bridge on al qudra road, easing traffic congestion and improving travel time for motorists heading to arabian ranches and studio city, offering smoother connectivity and better daily commute for residents and visitors.