കാസര്‍കോട്: മുസ്ലിം സമുദായത്തിന്റെ പ്രധാന ആഘോഷങ്ങളായ ഈദുല്‍ ഫിത്വറിനും ഈദുല്‍ അദ്ഹയ്ക്കും സംസ്ഥാനത്ത് ചുരുങ്ങിയത് മൂന്ന് ദിവസത്തെ ഔദ്യോഗിക അവധി അനുവദിക്കണമെന്ന് സമസ്ത കേരള ജംഇയ്യത്തുല്‍ ഉലമ നൂറാം വാര്‍ഷിക സമ്മേളനം പ്രമേയത്തിലൂടെ ആവശ്യപ്പെട്ടു. നിലവില്‍ നല്‍കി വരുന്ന ഒന്നോ രണ്ടോ ദിവസത്തെ അവധി ആഘോഷങ്ങള്‍ക്കും മതപരമായ കര്‍മ്മങ്ങള്‍ക്കും ഒട്ടും അപര്യാപ്തമാണെന്ന് സമ്മേളനം വിലയിരുത്തി.

ദൂരസ്ഥലങ്ങളില്‍ ജോലി ചെയ്യുന്നവര്‍ക്കും പഠിക്കുന്നവര്‍ക്കും പെരുന്നാള്‍ ദിനങ്ങളില്‍ നാട്ടിലെത്തി കുടുംബബന്ധങ്ങള്‍ പുതുക്കാന്‍ നിലവിലെ അവധി ക്രമം സഹായകരമല്ല. ഗള്‍ഫ് രാജ്യങ്ങളിലുള്‍പ്പെടെ ആഗോളതലത്തില്‍ ഈദ് ആഘോഷങ്ങള്‍ക്കായി ദീര്‍ഘമായ അവധി നല്‍കുന്ന മാതൃക കേരളത്തിലും പരിഗണിക്കണം. രണ്ട് പെരുന്നാളുകള്‍ക്കും ചുരുങ്ങിയത് മൂന്ന് ദിവസത്തെ അവധി സര്‍ക്കാര്‍ പ്രഖ്യാപിക്കണമെന്ന് സമ്മേളനം ആവശ്യപ്പെട്ടു.

ALSO READ: ചികില്‍സാരംഗത്തെ മാഫിയാവല്‍ക്കരണം തടയാന്‍ നിയമനിര്‍മ്മാണം വേണം: സമസ്ത സമ്മേളനത്തില്‍ പ്രമേയം 

ചന്ദ്രദര്‍ശനവുമായി ബന്ധപ്പെട്ട അനിശ്ചിതത്വം കാരണം പെരുന്നാള്‍ അവധി പലപ്പോഴും കൃത്യമായി ലഭിക്കാത്ത സാഹചര്യം നിലവിലുണ്ട്. ഇത് പരിഹരിക്കാനായി പെരുന്നാളിന് മുമ്പും ശേഷവുമുള്ള ദിവസങ്ങള്‍ കൂടി ഉള്‍പ്പെടുത്തി അവധി കലണ്ടര്‍ ശാസ്ത്രീയമായി പരിഷ്‌കരിക്കാന്‍ സര്‍ക്കാര്‍ തയ്യാറാകണമെന്നും പ്രമേയം ഉണര്‍ത്തി.  വാക്കോട് മൊയ്തീന്‍ കുട്ടി ഫൈസി അവതരിപ്പിച്ച പ്രമേയത്തെ കെ.ടി ഹംസ മുസ്ല്യാര്‍ വയനാട് പിന്താങ്ങി.

three days of official holiday should be granted for eid celebrations: samastha