കേരളത്തിലെ വിവിധ സർവ്വകലാശാലകൾ നടത്തുന്ന പരീക്ഷകളുടെ സമയക്രമത്തിൽ കൃത്യമായ ഏകോപനം ഇല്ലാത്തത് വിദ്യാർത്ഥികളെ വലിയ തോതിൽ പ്രയാസപ്പെടുത്തുന്ന സാഹചര്യമാണുള്ളതെന്ന് സമസ്ത കേരള ജംഇയ്യത്തുൽ ഉലമ നൂറാം വാർഷിക സമ്മേളനം പ്രമേയത്തിലൂടെ ഉണർത്തിച്ചു. പലപ്പോഴും ഒന്നിലധികം പരീക്ഷകൾ ഒരേ ദിവസം വരികയോ, ഉപരിപഠനത്തിനുള്ള പ്രവേശന പരീക്ഷകൾ മുടങ്ങുകയോ ചെയ്യുന്ന അവസ്ഥയുണ്ട്. 

ഇത് പരിഹരിക്കാനായി പരീക്ഷാ കലണ്ടറുകൾ ഏകീകരിക്കാൻ സർക്കാർ തയ്യാറാകണമെന്നും, അതോടൊപ്പം തന്നെ, ഭരണഘടന വാഗ്ദാനം ചെയ്യുന്ന മതസ്വാതന്ത്ര്യം പരിഗണിച്ച്, വെള്ളിയാഴ്ച ഉച്ചയ്ക്ക് ജുമുഅ നമസ്കാരത്തിന് തടസ്സമാകാത്ത രീതിയിൽ വിദ്യാഭ്യാസ സ്ഥാപനങ്ങൾക്കും പരീക്ഷകൾക്കും സമയക്രമം നിശ്ചയിക്കേണ്ടത് അനിവാര്യമാണെന്നും പ്രമേയം വ്യക്തമാക്കി. 

ALSO READ: ഈദ് ആഘോഷങ്ങള്‍ക്ക് മൂന്ന് ദിവസത്തെ ഔദ്യോഗിക അവധി അനുവദിക്കണം: സമസ്ത

ജുമുഅ സമയത്ത് പരീക്ഷകൾ നിശ്ചയിക്കുന്നതും ക്ലാസുകൾ നടത്തുന്നതും വിശ്വാസികളായ വിദ്യാർത്ഥികളോടും അധ്യാപകരോടുമുള്ള അനീതിയാണ്. അതിനാൽ, വെള്ളിയാഴ്ചകളിൽ ഉച്ചയ്ക്ക് കൃത്യമായ ഇടവേള ഉറപ്പാക്കിക്കൊണ്ടും പരീക്ഷാ ടൈം ടേബിളുകൾ മുൻകൂട്ടി ഏകോപിപ്പിച്ചുകൊണ്ടും മദ്റസാ സമയവിഷയത്തിൽ സർക്കാറുകൾ നൽകിയ ഉറപ്പുകൾ നടപ്പിൽ വരുത്തിയും ഉത്തരവിറക്കാൻ വിദ്യാഭ്യാസ വകുപ്പും സർക്കാരും ഇടപെടണമെന്നും സമ്മേളനം ആവശ്യപ്പെട്ടു. ഡോ. അരിപ്ര അബ്ദുറഹ്മാൻ ഫൈസി പ്രമേയം അവതരിപ്പിച്ചു. ഐബി ഉസ്മാൻ ഫൈസി പ്രമേയം പിന്താങ്ങി.