റോം: ഇറ്റലിയിലെ തെക്കൻ ഹൈവേയിൽ പണം കൊണ്ടുപോകുകയായിരുന്ന കവചിത വാഹനത്തിന് (Armored Truck) നേരെ സായുധ സംഘത്തിന്റെ ആക്രമണം. തിങ്കളാഴ്ച രാവിലെ നടന്ന സംഭവത്തിൽ സ്വകാര്യ സുരക്ഷാ ഏജൻസിയായ ബാറ്റിസ്റ്റോളി (BTV) യുടെ വാഹനമാണ് ആക്രമിക്കപ്പെട്ടത്. എന്നാൽ സുരക്ഷാ ഉദ്യോഗസ്ഥരുടെയും സൈനിക പൊലിസിന്റെയും ശക്തമായ ഇടപെടലിൽ മോഷണശ്രമം പരാജയപ്പെടുകയും രണ്ട് പ്രതികൾ പിടിയിലാവുകയും ചെയ്തു.

ആക്രമണം നടന്നത് ഇങ്ങനെ:

സിനിമകളിലെ 'മണി ഹെയ്സ്റ്റ്' രംഗങ്ങളെ ഓർമ്മിപ്പിക്കുന്ന രീതിയിൽ അതീവ കൃത്യതയോടെയാണ് മോഷ്ടാക്കൾ പദ്ധതി തയ്യാറാക്കിയിരുന്നത്.ഹൈവേയിൽ ഗതാഗതം തടയാനായി മോഷ്ടാക്കൾ ഒരു വാഹനം കത്തിച്ചു.പണം നിറച്ച വണ്ടി നിർത്താനായി ബോംബ് വെച്ച് മറ്റൊരു വാഹനം തകർത്തു. തുടർന്ന് കറുത്ത മാസ്‌ക് ധരിച്ച ആറംഗ സായുധ സംഘം കവചിത വാഹനത്തിന് നേരെ വെടിയുതിർത്തു.ഇറ്റാലിയൻ സൈനിക പൊലിസായ 'കരബനേറി' സ്ഥലത്തെത്തിയതോടെ ഇരുവിഭാഗവും തമ്മിൽ വെടിവെപ്പുണ്ടായി. പൊലിസിന്റെ വിൻഡ്ഷീൽഡിൽ വെടിയുണ്ട തട്ടിയെങ്കിലും ആർക്കും പരിക്കേറ്റില്ല.

പരാജയപ്പെട്ട രക്ഷപ്പെടൽ

കവർച്ച പൂർത്തിയാക്കാൻ സാധിക്കില്ലെന്ന് ഉറപ്പായതോടെ മോഷ്ടാക്കൾ ഹൈവേയിലൂടെ വന്ന മറ്റ് യാത്രക്കാരുടെ കാറുകൾ തോക്കുചൂണ്ടി തട്ടിയെടുത്ത് രക്ഷപ്പെടാൻ ശ്രമിച്ചു. പൊലിസ് വാഹനങ്ങളുടേതിന് സമാനമായ ഫ്‌ലാഷിംഗ് ലൈറ്റുകൾ ഘടിപ്പിച്ച വാഹനങ്ങളും ഇവർ ഇതിനായി ഉപയോഗിച്ചിരുന്നു.

പ്രതികൾ വലയിൽ

ആക്രമണം നടന്ന് ഒരു മണിക്കൂറിനുള്ളിൽ ലിച്ചെയിലെ കരബനേറി കമാൻഡ് രണ്ട് പ്രതികളെ പിടികൂടി. സംഘത്തിലെ ബാക്കിയുള്ള നാലുപേർക്കായി തിരച്ചിൽ ഊർജ്ജിതമാക്കിയിട്ടുണ്ട്. പ്രാദേശിക ക്രിമിനൽ സംഘങ്ങളുമായി ഇവർക്ക് ബന്ധമുണ്ടോ എന്നും പൊലിസ് അന്വേഷിക്കുന്നുണ്ട്. ഹൈവേയിലെ സുരക്ഷാ ക്യാമറകളിൽ നിന്നുള്ള ആക്രമണത്തിന്റെ ഭീകര ദൃശ്യങ്ങൾ നിലവിൽ പുറത്തുവന്നിട്ടുണ്ട്.