ധാക്ക: തീരുവ 19 ശതമാനമായി വെട്ടിക്കുറച്ച് യു.എസ്- ബംഗ്ലാദേശ് വ്യാപാരക്കരാര്‍. കഴിഞ്ഞ ദിവസം വ്യാപാരക്കരാര്‍ ഒപ്പുവെച്ചു. ബംഗ്ലാദേശിനു മേല്‍ ചുമത്തിയിരുന്ന പകരം തീരുവ 19 ശതമാനമായി കുറച്ചിട്ടുണ്ട്. യു.എസില്‍ നിന്നുള്ള പരുത്തി, സിന്തറ്റിക് ഫൈബര്‍ എന്നിവ ഉപയോഗിച്ച് നിര്‍മിക്കുന്ന തുണിത്തരങ്ങള്‍ ഉള്‍പ്പെടെ ഏതാനും ഉല്‍പ്പന്നങ്ങളെ തീരുവയില്‍ നിന്ന് ഒഴിവാക്കിയിട്ടുമുണ്ടെന്ന് റിപ്പോര്‍ട്ടുകള്‍ വ്യക്തമാക്കുന്നു.ബംഗ്ലാദേശ് ഇടക്കാല സര്‍ക്കാറിന്റെ മുഖ്യ ഉപദേഷ്ടാവ് മുഹമ്മദ് യൂനുസാണ്  വിവരങ്ങള്‍ പങ്കുവെച്ചത്.ഒമ്പത് മാസത്തെ ചര്‍ച്ചകള്‍ക്കൊടുവിലാണ് ഇരുരാജ്യങ്ങളും തമ്മില്‍ വ്യാപാരക്കരാറില്‍ ധാരണയായിരിക്കുന്നത്.  

ALSO READ: ജെഫ്രി എപ്‌സ്റ്റീന് കഅബയുടെ കിസ്‌വ കൈമാറിയതിന്റെ കൂടുതൽ തെളിവുകൾ പുറത്ത്; സുൽത്താൻ അഹമ്മദും ചിത്രത്തിൽ

പ്രസിഡന്റ് ഡൊണാള്‍ഡ് ട്രംപിന്റെ ഭരണകൂടം ബംഗ്ലാദേശ് ഉല്‍പ്പന്നങ്ങള്‍ക്കുള്ള യു.എസ് 'പരസ്പര' തീരുവ 20 ശതമാനത്തില്‍ നിന്ന് 19 ശതമാനമായി കുറയ്ക്കാന്‍ ഒരുങ്ങുന്നുവെന്ന് വൈറ്റ് ഹൗസ് പുറത്തിറക്കിയ സംയുക്ത പ്രസ്താവനയില്‍ പറയുന്നു. തുടക്കത്തില്‍ 37 ശതമാനമാണ് ബംഗ്ലാദേശ് ഉല്‍പന്നങ്ങള്‍ക്ക് ട്രംപ് തീരുവ നിശ്ചയിച്ചിരുന്നത്. പിന്നീട് ആഗസ്റ്റില്‍ അത് 20 ശതമാനമായി കുറച്ചിരുന്നു. ഇതാണ് വീണ്ടും 19ലേക്ക് കുറച്ചിരിക്കുന്നത്.  

ബംഗ്ലാദേശിന്റെ സമ്പദ്ഘടനയില്‍ വലിയ പങ്കാണ് ടെക്സ്‌റ്റൈല്‍ മേഖലക്ക്. ഇതില്‍ ലഭിച്ച നികുതിയിളവ് നിര്‍ണായകമാണെന്ന് റിപ്പോര്‍ട്ടുകള്‍ ചൂണ്ടിക്കാട്ടുന്നു. ബംഗ്ലാദേശ് ടെക്സ്‌റ്റൈല്‍ ഉല്‍പ്പന്നങ്ങളുടെ ഏറ്റവും വലിയ വിപണിയാണ് യുഎസ്. തുണിത്തരങ്ങളുടെയും വസ്ത്രങ്ങളുടെയും ഉത്പാദനം ബംഗ്ലാദേശിലെ കയറ്റുമതിയുടെ 80 ശതമാനത്തോളം വരും, 2024 ല്‍ സര്‍ക്കാരിനെ അട്ടിമറിച്ച വിദ്യാര്‍ത്ഥികളുടെ നേതൃത്വത്തിലുള്ള വിപ്ലവത്തില്‍ കനത്ത ആഘാതമേറ്റതിനുശേഷം വ്യവസായം പുനര്‍നിര്‍മ്മിക്കുകയാണ് രാജ്യം. ബംഗ്ലാദേശിന്റെ ഫാര്‍മ, മത്സ്യ ഉല്‍പ്പന്നങ്ങള്‍ക്കും യു.എസില്‍ തീരുവയില്ല. 

ആഗോള ടെക്സ്‌റ്റൈല്‍ ശൃംഖലയില്‍ ബംഗ്ലാദേശിന്റെ സ്ഥാനം ശക്തിപ്പെടുത്തുന്നതിനും തൊഴിലവസരങ്ങള്‍ സംരക്ഷിക്കുന്നതിനുമുള്ള ചുവടുവെപ്പാണ് കരാര്‍ എന്ന് മുഹമ്മദ് യൂനുസ് പറഞ്ഞു. വ്യാഴാഴ്ച ബംഗ്ലാദേശ് പൊതുതെരഞ്ഞെടുപ്പ് നടക്കാനിരിക്കെയാണ് കരാര്‍ യാഥാര്‍ഥ്യമായിരിക്കുന്നത്.

അതിനിടെ, ഇന്ത്യക്ക് ലഭിക്കാത്ത ഇളവ് ബംഗ്ലാദേശിന് ലഭിച്ചത് ഇന്ത്യന്‍ ഉല്‍പ്പന്നങ്ങള്‍ക്ക് തിരിച്ചടിയാകുമെന്ന വിലയിരുത്തലുകളുണ്ട്.

the united states and bangladesh have signed a trade agreement reducing tariffs on bangladeshi products to 19 percent. the deal is expected to significantly benefit bangladesh’s textile sector, its largest export industry.