ആറ്റിങ്ങൽ: സ്കൂളിലേക്ക് പോയ രണ്ട് ഒമ്പതാം ക്ലാസ് വിദ്യാർത്ഥിനികളെ കാണാതായി. ആറ്റിങ്ങൽ ഗവൺമെന്റ് ഗേൾസ് ഹയർ സെക്കൻഡറി സ്കൂളിലെ വിദ്യാർത്ഥിനികളായ ശ്രീവൈഗ, എയ്ഞ്ചൽ എന്നിവരെയാണ് ചൊവ്വാഴ്ച രാവിലെ മുതൽ കാണാതായത്. സംഭവത്തിൽ ആറ്റിങ്ങൽ പൊലിസ് കേസെടുത്ത് അന്വേഷണം ആരംഭിച്ചു.

സംഭവത്തെക്കുറിച്ച്:

ഇന്ന് (ചൊവ്വാഴ്ച) രാവിലെ പതിവുപോലെ സ്കൂളിലേക്ക് പോകാനായി യൂണിഫോം ധരിച്ചാണ് ഇരുവരും വീടുകളിൽ നിന്നും ഇറങ്ങിയത്. കാണാതായവരിൽ ഒരാൾ ചിറയിൻകീഴ് സ്വദേശിനിയും മറ്റൊരാൾ വക്കം സ്വദേശിനിയുമാണ്.വൈകുന്നേരം സ്കൂൾ വിട്ട് ഏറെ നേരമായിട്ടും കുട്ടികൾ വീട്ടിൽ തിരിച്ചെത്താതിരുന്നതോടെയാണ് രക്ഷിതാക്കൾ അന്വേഷണം തുടങ്ങിയത്.

കുട്ടികൾ സ്കൂളിൽ എത്തിയിരുന്നില്ലെന്ന് പ്രാഥമിക അന്വേഷണത്തിൽ വ്യക്തമായിട്ടുണ്ട്. ഇതോടെ രക്ഷിതാക്കൾ ആറ്റിങ്ങൽ പൊലിസിനെ സമീപിക്കുകയായിരുന്നു.

അന്വേഷണം ഊർജ്ജിതം:

രക്ഷിതാക്കളുടെ പരാതിയിൽ കേസെടുത്ത പൊലിസ് വ്യാപകമായ തെരച്ചിൽ തുടങ്ങിയിട്ടുണ്ട്.ആറ്റിങ്ങൽ നഗരത്തിലെയും ബസ് സ്റ്റാൻഡ് പരിസരത്തെയും സിസിടിവി ദൃശ്യങ്ങൾ പൊലിസ് പരിശോധിച്ചുവരികയാണ്.കുട്ടികളുടെ സഹപാഠികളിൽ നിന്നും സുഹൃത്തുക്കളിൽ നിന്നും പൊലിസ് വിവരങ്ങൾ ശേഖരിക്കുന്നുണ്ട്.കാണാതാകുമ്പോൾ സ്കൂൾ യൂണിഫോം തന്നെയാണ് ഇരുവരുടെയും വേഷം.വിവരം ലഭിക്കുന്നവർ അറിയിക്കുക: ഈ കുട്ടികളെക്കുറിച്ച് എന്തെങ്കിലും വിവരം ലഭിക്കുന്നവർ ഉടൻ തന്നെ അടുത്തുള്ള പൊലിസ് സ്റ്റേഷനിൽ വിവരമറിയിക്കണമെന്ന് അഭ്യർത്ഥിച്ചു പൊലിസ്.