ന്യൂഡല്‍ഹി: ഇന്ത്യയുമായുള്ള വ്യാപാര കരാറിന് പിന്നാലെ ബംഗ്ലാദേശുമായി യു.എസ് പ്രഖ്യാപിച്ച പുതിയ കരാര്‍ ഇന്ത്യന്‍ വസ്ത്ര വ്യാപാരമേഖലയ്ക്ക് കനത്ത പ്രഹരമാകുമെന്ന് വിലയിരുത്തല്‍. ബംഗ്ലാദേശിന് മേലുള്ള ഇറക്കുമതി നികുതി 19 ശതമാനമായി ട്രംപ് ഭരണകൂടം കുറച്ചിട്ടുണ്ട്. ഇന്ത്യയുമായുള്ള കരാറില്‍ ഇത് 18 ശതമാനമാണ്. ഒറ്റനോട്ടത്തില്‍ ഇന്ത്യയ്ക്കാണ് നേട്ടമെന്ന് തോന്നുമെങ്കിലും കരാറിലെ ചെറിയ നിബന്ധനകള്‍ ആണ് ഇന്ത്യന്‍ വസ്ത്രവ്യാപാര മേഖലയ്ക്കും പരുത്തി കര്‍ഷകര്‍ക്കും വലിയ തിരിച്ചടിയാകുന്നത്.
ബംഗ്ലാദേശിന്റെ നികുതി 19 ശതമാനമാണെങ്കിലും, അമേരിക്കന്‍ പരുത്തിയും മറ്റ് അസംസ്‌കൃത വസ്തുക്കളും ഉപയോഗിച്ച് നിര്‍മ്മിക്കുന്ന വസ്ത്രങ്ങള്‍ക്ക് 'സീറോ താരിഫ്' (നികുതിയില്ല) എന്ന ഇളവാണ് അമേരിക്ക നല്‍കിയിരിക്കുന്നത്. ഇതാണ് ഇന്ത്യയ്ക്ക് തിരിച്ചടിയാകുന്നത്.
അമേരിക്കന്‍ പരുത്തി ഉപയോഗിക്കുന്ന ബംഗ്ലാദേശ് വസ്ത്രങ്ങള്‍ക്ക് നികുതി നല്‍കേണ്ടതില്ല. എന്നാല്‍ ഇന്ത്യന്‍ വസ്ത്രങ്ങള്‍ക്ക് 18 ശതമാനം നികുതി നല്‍കണം. ഇതോടെ അമേരിക്കന്‍ വിപണിയില്‍ ഇന്ത്യന്‍ വസ്ത്രങ്ങളേക്കാള്‍ കുറഞ്ഞ വിലയ്ക്ക് ബംഗ്ലാദേശ് വസ്ത്രങ്ങള്‍ ലഭ്യമാകും.
ലോകത്തെ ഏറ്റവും വലിയ പരുത്തി ഇറക്കുമതിക്കാരായ ബംഗ്ലാദേശ്, ഇന്ത്യയുടെ പരുത്തിയുടെ പ്രധാന ഉപഭോക്താക്കളാണ്. നികുതി ഇളവ് ലഭിക്കാനായി ബംഗ്ലാദേശ് ഇനി മുതല്‍ ഇന്ത്യന്‍ പരുത്തിക്ക് പകരം അമേരിക്കന്‍ പരുത്തിയെ കൂടുതല്‍ ആശ്രയിക്കും. ഇത് ഇന്ത്യയിലെ പരുത്തി കര്‍ഷകരെയും വ്യാപാരികളെയും നേരിട്ട് ബാധിക്കും. ഇന്ത്യയുടെ ആകെ വസ്ത്ര കയറ്റുമതിയുടെ 30 ശതമാനവും അമേരിക്കയിലേക്കാണ്. ഏകദേശം 10.5 ബില്യണ്‍ ഡോളറിന്റെ വ്യാപാരമാണിത്. പുതിയ കരാറിലൂടെ ഈ വിപണിയില്‍ ബംഗ്ലാദേശ് മേധാവിത്വം നേടാന്‍ സാധ്യതയുണ്ട്.
കരാര്‍ ഇന്ത്യന്‍ സമ്പദ്‌വ്യവസ്ഥയ്ക്ക് ഇരട്ട പ്രഹരമാണെന്നും പരുത്തി കര്‍ഷകരെയും നൂല്‍ നൂല്‍ക്കുന്നവരെയും ഇത് ദോഷകരമായി ബാധിക്കുമെന്നും കോണ്‍ഗ്രസ് ചൂണ്ടിക്കാട്ടിയിട്ടുണ്ട്. 18 ശതമാനം നികുതി നല്‍കേണ്ടി വരുന്ന ഇന്ത്യയ്ക്ക് എങ്ങനെയാണ് 0 ശതമാനം നികുതിയുള്ള ബംഗ്ലാദേശിനോട് മത്സരിക്കാനാവുകയെന്ന് രാജ്യസഭാ എം.പി പ്രിയങ്ക ചതുര്‍വേദി ചോദിച്ചു.

യു.എസ്- ബംഗ്ലാദേശ് കരാര്‍ ഇന്ത്യന്‍ വിപണിയെയും ബാധിച്ചു

കരാര്‍ വാര്‍ത്ത പുറത്തുവന്നതോടെ ഇന്ത്യന്‍ ടെക്‌സ്‌റ്റൈല്‍ കമ്പനികളുടെ ഓഹരി വിലയില്‍ വന്‍ ഇടിവുണ്ടായി. ഗോകുല്‍ദാസ് എക്‌സ്‌പോര്‍ട്ട്‌സ്, കെ.പി.ആര്‍ മില്‍, നിതിന്‍ സ്പിന്നേഴ്‌സ് തുടങ്ങിയ പ്രമുഖ കമ്പനികളുടെ ഓഹരികള്‍ ഇന്നലെ താഴ്ന്നു.

ALSO READ: സഊദിയിൽ വിസിറ്റിങ് വിസ ഓൺലൈൻ പുതുക്കൽ നിർത്തിവെച്ചു; വളരെ നേരത്തെയുള്ള നിയന്ത്രണം പ്രവാസി കുടുംബങ്ങൾക്ക് തിരിച്ചടി

English Summary: he recent trade agreement between the United States and Bangladesh is expected to severely impact India’s textile industry and cotton farmers. While the Trump administration set a 19% import duty for Bangladesh compared to 18% for India, a specific clause in the deal shifts the advantage entirely toward Bangladesh.
Zero-Tariff Clause: The U.S. has granted zero-tariff (no tax) access to Bangladeshi garments, provided they are manufactured using American cotton and raw materials. In contrast, Indian garments remain subject to an 18% tax.