റോവ്മാൻ പവൽ എന്ന വിനാശകാരിയായ ബാറ്റ്‌സ്മാനെ ലോകം ഇന്ന് അറിയുന്നത് ക്രീസിലെ കരുത്തുറ്റ ബാറ്റിംഗിന്റെയും കൂറ്റൻ സിക്‌സറുകളുടെയും പേരിലാണ്. എന്നാൽ, ആ കരുത്തിന് പിന്നിൽ ജമൈക്കയിലെ ഒരു തകര മേൽക്കൂരയുള്ള പൂർത്തിയാകാത്ത വീടിന്റെയും, കനത്ത മഴയത്ത് ചോർന്നൊലിക്കുന്ന മുറിയിൽ അമ്മയ്ക്ക് കാവലിരുന്ന ഒരു പതിനൊന്നുകാരന്റെയും കണ്ണുനീരും നിശ്ചയദാർഢ്യവുമുണ്ട്. ക്രിക്കറ്റ് വെറുമൊരു കളിയല്ല, ഒരു കുടുംബത്തിന്റെ അതിജീവനത്തിനായുള്ള യുദ്ധമായിരുന്നു പവലിന്.

ജമൈക്കൻ രാത്രികളിൽ മഴ കനക്കുമ്പോൾ ആ ചെറിയ വീടിനുള്ളിൽ ഒരു പതിനൊന്നുകാരൻ ഉറക്കമില്ലാതെ കാവലിരിക്കുമായിരുന്നു. തകര മേൽക്കൂരയിലെ വിള്ളലുകളിലൂടെ മഴവെള്ളം തറയിൽ കെട്ടിനിൽക്കുമ്പോൾ, ഉണങ്ങിയ ഏകയിടമായ മെത്തയിൽ തന്റെ അമ്മയും സഹോദരിയും സമാധാനമായി ഉറങ്ങുന്നുണ്ടെന്ന് അവൻ ഉറപ്പുവരുത്തി. പാനിയിൽ വെള്ളം കോരി ദൂരെക്കളയുമ്പോൾ ആ കുട്ടി അമ്മയോട് പറഞ്ഞു: "അമ്മേ വിഷമിക്കേണ്ട,  ഉറങ്ങിക്കോ. ഈ വെള്ളം ഞാൻ നോക്കിക്കോളാം."

ഈ വാക്കുകൾ ഒരു ക്രിക്കറ്റ് താരത്തിന്റെ വെറും ഓർമ്മകളല്ല; മറിച്ച്, ഒരു ലോകോത്തര ഫിനിഷറെ വാർത്തെടുത്ത ജീവിതപാഠമാണ്. ഇന്ന് ലോകമെമ്പാടുമുള്ള ബൗളർമാരുടെ ഉറക്കം കെടുത്തുന്ന റോവ്മാൻ പവൽ എന്ന 'പവർ ഹിറ്ററുടെ' ആത്മവിശ്വാസത്തിന്റെ വേരുകൾ ആ നനഞ്ഞ രാത്രികളിലാണ്.

ഉത്തരവാദിത്തം നേരത്തെ ഏറ്റെടുത്ത ബാല്യം

ക്രിക്കറ്റ് അക്കാദമികളിലല്ല പവൽ തന്റെ കായികക്ഷമതയും മാനസിക കരുത്തും നേടിയത്. അതൊരു സിംഗിൾ മദർ വളർത്തുന്ന കുട്ടിയുടെ അതിജീവന സഹജാവബോധമായിരുന്നു. "വീട്ടിൽ ഒരു പുരുഷ രൂപത്തിന്റെ പ്രാധാന്യം എനിക്കറിയാമായിരുന്നു. ഞാനായിരുന്നു ആ പുരുഷ രൂപം," പവൽ തന്റെ കുട്ടിക്കാലത്തെക്കുറിച്ച് ലളിതമായി പറയുന്നു. അമ്മ ജോവാൻ തനിച്ചാണ് പവലിനെയും സഹോദരിയെയും വളർത്തിയത്. അവർ ഒന്നിലധികം ജോലികൾ ചെയ്ത് കുടുംബം പുലർത്താൻ കഠിനാധ്വാനം ചെയ്തു. പണി തീരാത്ത വീടിന്റെ ഓരോ ഇഷ്ടികയും അവരുടെ വിയർപ്പിന്റെ ഫലമായിരുന്നു.

ആറാം ക്ലാസ്സിൽ പഠിക്കുമ്പോൾ പവൽ തന്റെ അമ്മയ്ക്ക് ഒരു വാക്ക് നൽകി: "എനിക്ക് അല്പം സമയം തരൂ, ഞാൻ എല്ലാം മാറ്റും. ഇപ്പോൾ ഞാൻ ഒരു ചെറിയ ആൺകുട്ടിയായിരിക്കാം, പക്ഷേ ഞാൻ വളരുമ്പോൾ നമ്മുടെ ജീവിതം മാറ്റിമറിക്കും." ദാരിദ്ര്യത്തിൽ നിന്ന് മോചനം നേടാൻ ഒന്നുകിൽ ക്രിക്കറ്റ്, അല്ലെങ്കിൽ വിദ്യാഭ്യാസം ഈ രണ്ട് വഴികളേ മുന്നിലുള്ളൂ എന്ന് ആ കുട്ടിക്ക് അന്നേ അറിയാമായിരുന്നു.

മുറിപ്പാടുകളെ കരുത്താക്കിയ അധ്യാപകൻ

പവലിന്റെ ജീവിതത്തിൽ നിർണ്ണായകമായ മറ്റൊരു വ്യക്തിത്വം അദ്ദേഹത്തിന്റെ അധ്യാപകനായ നിക്കോളാസ് ഡില്ലൺ ആണ്. ഒരിക്കൽ പിതാക്കന്മാരെക്കുറിച്ച് ഒരു അസൈൻമെന്റ് ചെയ്യേണ്ടി വന്നപ്പോൾ, തന്നെയും അമ്മയെയും ഉപേക്ഷിച്ചുപോയ അച്ഛനെക്കുറിച്ച് ഓർത്ത് പവൽ തകർന്നുപോയി. എന്നാൽ ഡില്ലൺ അവനോട് പറഞ്ഞു: "അത് നിന്നെ തളർത്താൻ അനുവദിക്കരുത്. നിന്റെ പിതാവ് ചെയ്തതിന്റെ നേർവിപരീതമായി മാറാനുള്ള പ്രചോദനമായി അതിനെ കാണുക." ആ ഉപദേശം പവലിനെ ഒരു ഉത്തരവാദിത്തമുള്ള പുരുഷനായി വളർത്തി. ഇന്നും ആഴ്ചയിൽ രണ്ടുതവണ പവൽ തന്റെ ആ ഗുരുനാഥനെ വിളിക്കാറുണ്ട്.

ക്രിക്കറ്റ്: ദാരിദ്ര്യത്തിൽ നിന്നുള്ള മോചനരേഖ

ജമൈക്ക അണ്ടർ-19 ടീമിലേക്കുള്ള പ്രവേശനമാണ് പവലിന്റെ ജീവിതത്തിൽ വഴിത്തിരിവായത്. വെസ്റ്റ് ഇൻഡീസ് സർവകലാശാലയിൽ സ്കോളർഷിപ്പോടെയുള്ള പഠനവും റോബർട്ട് സാമുവൽസിന്റെ കീഴിലുള്ള പരിശീലനവും അദ്ദേഹത്തെ ഒരു പ്രൊഫഷണൽ താരമാക്കി മാറ്റി. കരീബിയൻ പ്രീമിയർ ലീഗിൽ (CPL) ജമൈക്ക തലവാസ് അദ്ദേഹത്തെ തിരഞ്ഞെടുത്തപ്പോൾ ലഭിച്ച തുക പവലിന്റെ ജീവിതത്തിലെ ഏറ്റവും വലിയ അത്ഭുതമായിരുന്നു.

"ഇത്രയും പണം ഞാൻ ജീവിതത്തിൽ കണ്ടിട്ടില്ല," പവൽ ആ നിമിഷം ഓർക്കുന്നു. മിക്ക താരങ്ങളും പണം കിട്ടുമ്പോൾ ആഡംബര കാറുകൾ വാങ്ങാൻ ഓടുമ്പോൾ, പവൽ ചെയ്തത് മറ്റൊന്നാണ്. അദ്ദേഹം അമ്മയോട് കടങ്ങളുടെ പട്ടിക ആവശ്യപ്പെട്ടു. ടെലിവിഷൻ, ഫ്രിഡ്ജ്, സ്റ്റൗ എന്നിവയുടെ കുടിശ്ശികകളെല്ലാം അദ്ദേഹം വീട്ടി. തന്റെ തോളിലെ വലിയൊരു ഭാരം ഒഴിഞ്ഞുപോയ ആശ്വാസത്തോടെ അമ്മ സ്വതന്ത്രയായി നടക്കുന്നത് കണ്ടപ്പോഴാണ് താൻ വിജയിച്ചുവെന്ന് പവലിന് തോന്നിയത്.

ബാറ്റിംഗ് കരുത്ത്

പവൽ സിക്‌സറുകൾ അടിക്കുന്നത് കാണുമ്പോൾ പലരും അതിശയിക്കാറുണ്ട്. ആ കരുത്തിന് പിന്നിൽ കുട്ടിക്കാലത്ത് ചുമന്ന വെള്ളത്തിന്റേയും ഭാരങ്ങളുടേയും അധ്വാനമുണ്ടെന്ന് അദ്ദേഹം വിശ്വസിക്കുന്നു. "ചെറുപ്പം മുതലേ ആ ശാരീരിക അധ്വാനം എന്നിൽ ഒരു കരുത്ത് സൃഷ്ടിച്ചു. ഇന്ന് ബാറ്റ് ചെയ്യുമ്പോൾ പന്ത് ശക്തമായി അടിക്കാനുള്ള ആത്മവിശ്വാസം ആ  ഓർമ്മകളിൽ നിന്നാണ് വരുന്നത്," അദ്ദേഹം പറയുന്നു.

ഇന്ന് ഐപിഎൽ (IPL) കരാറുകളും ആഡംബര ജീവിതവും അദ്ദേഹത്തിന് മുന്നിലുണ്ട്. പക്ഷേ പവൽ ഇന്നും ആ നനഞ്ഞ രാത്രികളെ മറന്നിട്ടില്ല. ജമൈക്കയിലെ ആ പഴയ പണിതീരാത്ത വീടിന്റെ സ്ഥാനത്ത് ഇന്ന് ആധുനികമായ ഒരു വീടുണ്ട്. അതിന് വിള്ളലുകളില്ലാത്ത ശക്തമായ മേൽക്കൂരയുണ്ട്.

ബുധനാഴ്ച മുംബൈയിൽ നടക്കുന്ന ടി20 ലോകകപ്പ് മത്സരത്തിൽ റോവ്മാൻ പവൽ ക്രീസിലെത്തുമ്പോൾ, ലോകം കാണുന്നത് വെറുമൊരു ബാറ്റ്‌സ്മാനെയല്ല. മറിച്ച്, പതിനൊന്നാം വയസ്സിൽ അമ്മയ്ക്ക് നൽകിയ വാക്ക് പാലിച്ച, ദാരിദ്ര്യത്തിന്റെ ബൗൺസറുകളെ ധീരമായി നേരിട്ട് അതിജീവിച്ച ഒരു പോരാളിയെയാണ്.