ബെംഗളൂരു: റോഡരികിൽ പാർക്ക് ചെയ്തിരുന്ന ബൈക്കിലേക്ക് സ്കൂൾ ബസ് നിയന്ത്രണം വിട്ട് ഇടിച്ചുകയറി രണ്ട് പിഞ്ചുകുട്ടികൾ മരിച്ചു. ബെംഗളൂരു തനിസാന്ദ്ര മെയിൻ റോഡിൽ ഇന്ന് രാവിലെയാണ് നാടിനെ നടുക്കിയ അപകടമുണ്ടായത്. സി.എ.ആർ (City Armed Reserve) വിഭാഗത്തിലെ പൊലിസ് കോൺസ്റ്റബിൾ നാഗനഗൗഡയുടെ മകൾ വർഷ (2), സഹോദരന്റെ മകൾ ഭാനു (4) എന്നിവരാണ് മരിച്ചത്.

അപകടം സംഭവിച്ചത് ഇങ്ങനെ:

തനിസാന്ദ്ര പൊലിസ് ക്വാർട്ടേഴ്‌സിൽ താമസിക്കുന്ന നാഗനഗൗഡ കുട്ടികളുമായി പാൽ വാങ്ങാനായി ബൈക്കിൽ പുറപ്പെട്ടതായിരുന്നു. തനിസാന്ദ്ര മെയിൻ റോഡിലൂടെ പോകുമ്പോൾ എതിർദിശയിൽ നിന്ന് വന്ന അജ്മോനി സ്കൂളിന്റെ ബസ് നിയന്ത്രണം വിട്ട് ബൈക്കിലേക്ക് ഇടിച്ചുകയറുകയായിരുന്നു. ബൈക്ക് വെട്ടിച്ചൊഴിക്കാൻ ഡ്രൈവർ ശ്രമിച്ചെങ്കിലും ബസ് നിയന്ത്രണം വിട്ട് ബൈക്കിന് മുകളിലൂടെ കയറിയിറങ്ങി.

ഇടിയുടെ ആഘാതത്തിൽ റോഡിലേക്ക് തെറിച്ചുവീണ കുരുന്നുകൾ ബസിന്റെ ടയറിനടിയിൽപ്പെടുകയായിരുന്നു. തലയ്ക്ക് ഗുരുതരമായി പരിക്കേറ്റ കുട്ടികൾ സംഭവസ്ഥലത്ത് വെച്ച് തന്നെ മരിച്ചു.അപകടത്തിൽ നാഗനഗൗഡയ്ക്ക് പരിക്കേറ്റെങ്കിലും നില ഗുരുതരമല്ല.

അന്വേഷണം:

അപകടത്തിന് പിന്നാലെ നോർത്ത് ഡിവിഷൻ ട്രാഫിക് ഡിസിപി ഉൾപ്പെടെയുള്ള ഉന്നത ഉദ്യോഗസ്ഥർ സ്ഥലത്തെത്തി പരിശോധന നടത്തി. സ്കൂൾ ബസ് ഡ്രൈവറുടെ അശ്രദ്ധയാണ് അപകടത്തിന് കാരണമെന്നാണ് പ്രാഥമിക നിഗമനം. ഡ്രൈവറെയും ബസിനെയും ഹെന്നൂർ ട്രാഫിക് പൊലിസ് കസ്റ്റഡിയിലെടുത്തു. സംഭവത്തിൽ പൊലിസ് കേസെടുത്ത് വിശദമായ അന്വേഷണം ആരംഭിച്ചിട്ടുണ്ട്.