ദുബൈ: യുഎഇയുടെ യാത്രാ സൗകര്യങ്ങളിൽ വിപ്ലവകരമായ മാറ്റം കുറിച്ചുകൊണ്ട് ഇത്തിഹാദ് റെയിൽ പാസഞ്ചർ സർവീസ് ഈ വർഷം പ്രവർത്തനമാരംഭിക്കുന്നു. രാജ്യത്തിന്റെ വിവിധ ഭാഗങ്ങളിലായി 900 കിലോമീറ്റർ നീളത്തിൽ വ്യാപിച്ചുകിടക്കുന്ന ഈ റെയിൽ ശൃംഖല, പ്രധാന നഗരങ്ങളെയും വിമാനത്താവളങ്ങളെയും വ്യാവസായിക കേന്ദ്രങ്ങളെയും തമ്മിൽ ബന്ധിപ്പിക്കും. ജനുവരിയിൽ പ്രഖ്യാപിച്ച പുതിയ ഏഴ് സ്റ്റേഷനുകൾ ഉൾപ്പെടെ ആകെ 11 പ്രധാന കേന്ദ്രങ്ങളിലാണ് പാസഞ്ചർ ട്രെയിൻ നിർത്തുക.

അബുദബിയിൽ നിന്ന് ദുബൈ വഴി ഫുജൈറയിലേക്കുള്ള റൂട്ടാണ് ആദ്യ ഘട്ടത്തിൽ സർവീസ് നടത്തുകയെന്ന് ഇത്തിഹാദ് റെയിൽ അറിയിച്ചിരുന്നു. രാജ്യത്തെ പ്രധാന സ്റ്റേഷനുകളും അവയുടെ പ്രത്യേകതകളും നോക്കാം.

ALSO READ: യുഎഇയിൽ അനധികൃത ഗാർഹിക തൊഴിലാളി റിക്രൂട്ട്‌മെന്റ്; 230 സോഷ്യൽ മീഡിയ അക്കൗണ്ടുകൾ പൂട്ടിച്ചു 

അബുദബി എമിറേറ്റിലെ സ്റ്റേഷനുകൾ

മുഹമ്മദ് ബിൻ സായിദ് സിറ്റി: അബുദബിയിലെ പ്രധാന സ്റ്റേഷനാണിത്. സായിദ് അന്താരാഷ്ട്ര വിമാനത്താവളത്തിൽ നിന്ന് 30 മിനിറ്റ് ദൂരമുള്ള ഈ കേന്ദ്രം മുസഫ, ബാനി യാസ് തുടങ്ങിയ മേഖലകളിലുള്ളവർക്ക് ഏറെ ഉപകരിക്കും.

അൽ സില: സഊദി അതിർത്തിയോട് ചേർന്നുള്ള പടിഞ്ഞാറൻ മേഖലയാണിത്. ഭാവിയിൽ ജിസിസി റെയിൽവേയുമായി ബന്ധിപ്പിക്കാൻ ഈ സ്റ്റേഷൻ നിർണ്ണായകമാകും.

അൽ ധന്ന (റുവൈസ്): എണ്ണ-വാതക മേഖലയിലെ പ്രധാന വ്യാവസായിക കേന്ദ്രമാണിത്.

അൽ മിർഫ: അൽ ദഫ്ര മേഖലയിലെ പ്രധാന തീരദേശ പട്ടണം.

മദീനത്ത് സായിദ്: അൽ ദഫ്രയിലെ ഭരണ-വ്യാവസായിക കേന്ദ്രം.

മെസൈറ: ലിവ ഒയാസിസിലെ ചരിത്ര പ്രസിദ്ധമായ പ്രദേശം.

അൽ ഫയ: അബുദബിക്കും അൽ ഐനിനും ഇടയിലുള്ള പ്രധാന ഗതാഗത കേന്ദ്രം.

ദുബൈ

ജുമൈറ ഗോൾഫ് എസ്റ്റേറ്റ്സ്: ദുബൈയിലെ ഏക ഇത്തിഹാദ് റെയിൽ സ്റ്റേഷനാണിത്. ദുബൈ മെട്രോയുമായി ബന്ധിപ്പിക്കപ്പെട്ടിട്ടുള്ള ഈ സ്റ്റേഷൻ അൽ മക്തൂം വിമാനത്താവളത്തിന് (DWC) സമീപമാണ് സ്ഥിതി ചെയ്യുന്നത്. എക്സ്പോ സിറ്റി, ദുബൈ ഇൻവെസ്റ്റ്മെന്റ് പാർക്ക് തുടങ്ങിയ കമ്മ്യൂണിറ്റികൾക്ക് ഇത് വലിയ ആശ്വാസമാകും.

ഷാർജ

യൂണിവേഴ്സിറ്റി സിറ്റി: ഷാർജയിലെ ആയിരക്കണക്കിന് വിദ്യാർത്ഥികൾക്കും അധ്യാപകർക്കും ഉപകാരപ്പെടുന്ന സ്റ്റേഷൻ. ഷാർജ വിമാനത്താവളത്തിൽ നിന്ന് 10 മിനിറ്റ് ദൂരം മാത്രമേ സ്റ്റേഷനിലേക്ക് ഉള്ളൂ.

അൽ ദൈദ്: ഷാർജയുടെ ഉൾപ്രദേശങ്ങളെയും കാർഷിക മേഖലകളെയും ബന്ധിപ്പിക്കുന്നു.

ഫുജൈറ

അൽ ഹിലാൽ സിറ്റി: ഇത്തിഹാദ് റെയിൽ ശൃംഖലയുടെ കിഴക്കേ അറ്റത്തുള്ള സ്റ്റേഷൻ. ഫുജൈറ നഗരത്തിലേക്കും കിഴക്കൻ തീരത്തേക്കും നേരിട്ടുള്ള റെയിൽ ബന്ധം ഇത് ഉറപ്പാക്കുന്നു.

യുഎഇയുടെ സുസ്ഥിര വികസനത്തിന് കരുത്തേകുന്ന ഇത്തിഹാദ് റെയിൽ, റോഡ് മാർഗമുള്ള തിരക്ക് കുറയ്ക്കാനും വേഗതയേറിയ യാത്ര ഒരുക്കാനും സഹായിക്കും. ഓരോ സ്റ്റേഷനുകളും അതത് നഗരങ്ങളിലെ മെട്രോ, ബസ് സർവീസുകളുമായി സംയോജിപ്പിക്കാനാണ് അധികൃതർ ലക്ഷ്യമിടുന്നത്.

etihad rail is preparing to transform travel across the uae with a royal journey through the desert, connecting eleven key cities. the ambitious railway project promises faster transport, economic growth and enhanced regional connectivity.