ദുബൈ: റമദാൻ മാസത്തോടനുബന്ധിച്ച് യുഎഇയിലെ പൊതുമേഖലാ ജീവനക്കാരുടെ ഔദ്യോഗിക പ്രവൃത്തി സമയം പ്രഖ്യാപിച്ച് ഫെഡറൽ അതോറിറ്റി ഫോർ ഗവൺമെന്റ് ഹ്യൂമൻ റിസോഴ്‌സസ് (FAHR). പുതിയ ഉത്തരവ് പ്രകാരം ജീവനക്കാർക്ക് പ്രവൃത്തി സമയത്തിൽ ഇളവുകളും വീട്ടിലിരുന്ന് ജോലി ചെയ്യാനുള്ള (Remote Work) സൗകര്യവും ലഭിക്കും.

ഇതനുസരിച്ച് തിങ്കൾ മുതൽ വ്യാഴം വരെ രാവിലെ 9:00 മുതൽ ഉച്ചയ്ക്ക് 2:30 വരെയും, വെള്ളിയാഴ്ചകളിൽ രാവിലെ 9:00 മുതൽ ഉച്ചയ്ക്ക് 12:00 വരെയും ആയിരിക്കും ഔദ്യോഗിക പ്രവൃത്തി സമയം. സ്ഥാപനത്തിന്റെ പ്രവർത്തന സ്വഭാവമനുസരിച്ച് മാറ്റം ആവശ്യമുള്ളവർ ഒഴികെയുള്ള എല്ലാ ഫെഡറൽ മന്ത്രാലയങ്ങളിലെയും സ്ഥാപനങ്ങളിലെയും ജീവനക്കാർക്ക് ഈ സമയം ബാധകമായിരിക്കും.

ALSO READ: യുഎഇയിൽ സ്കൂൾ ബസ് യാത്രയ്ക്ക് സമയപരിധി നിശ്ചയിച്ചു; കുട്ടികളുടെ യാത്രാക്ലേശത്തിന് അറുതിയാകുന്നു

70% ജീവനക്കാർക്ക് വർക്ക് ഫ്രം ഹോം

റമദാനിലെ പ്രവൃത്തി ദിവസങ്ങളിൽ വഴക്കമുള്ള ജോലി സമയം (Flexible working hours) പിന്തുടരാൻ മന്ത്രാലയങ്ങൾക്ക് അനുമതിയുണ്ട്. കൂടാതെ, വെള്ളിയാഴ്ചകളിൽ ജീവനക്കാർക്ക് വീട്ടിലിരുന്ന് ജോലി ചെയ്യാനുള്ള സൗകര്യവും നൽകാം. എന്നാൽ, ഒരു സ്ഥാപനത്തിലെ മൊത്തം ജീവനക്കാരുടെ 70 ശതമാനത്തിൽ കൂടുതൽ ആളുകൾ ഒരേസമയം ഇത്തരത്തിൽ ജോലി ചെയ്യാൻ പാടില്ലെന്ന നിബന്ധനയുമുണ്ട്.

അബുദബി ആസ്ഥാനമായുള്ള ഇന്റർനാഷണൽ അസ്ട്രോണമിക്കൽ സെന്ററിന്റെ (IAC) കണക്കുകൂട്ടൽ പ്രകാരം യുഎഇയിൽ റമദാൻ ഫെബ്രുവരി 19 വ്യാഴാഴ്ച ആരംഭിക്കാൻ സാധ്യതയുണ്ട്. ഫെബ്രുവരി 17-ന് മാസപ്പിറവി ദൃശ്യമാകാൻ സാധ്യതയില്ലാത്തതിനാൽ ഷഅബാൻ മാസം 30 ദിവസം പൂർത്തിയാക്കുമെന്നാണ് നിഗമനം. എങ്കിലും, ഔദ്യോഗികമായ പ്രഖ്യാപനം ഷഅബാൻ 29-ന് ചേരുന്ന ചന്ദ്രദർശന സമിതിയുടേതായിരിക്കും.

സാധാരണ ദിവസങ്ങളിൽ യുഎഇ ഫെഡറൽ ഗവൺമെന്റ് ആഴ്ചയിൽ നാലര ദിവസത്തെ പ്രവൃത്തി സമയമാണ് പിന്തുടരുന്നത്. ശനി, ഞായർ ദിവസങ്ങളാണ് ഔദ്യോഗിക വാരാന്ത്യ അവധി. ഷാർജയിൽ മാത്രം ആഴ്ചയിൽ നാല് ദിവസത്തെ പ്രവൃത്തി സമയവും വെള്ളി, ശനി, ഞായർ ദിവസങ്ങളിൽ അവധിയുമാണ് നൽകുന്നത്. റമദാൻ മാസത്തിൽ ഈ സമയക്രമത്തിലാണ് കുറവ് വരുത്തിയിരിക്കുന്നത്.

the uae has set official public sector working hours for ramadan 2026: 9am–2:30pm mon–thu and shortened 9am–12pm fri, with remote work allowed for many employees to ease fasting and travel.