തിരുവനന്തപുരം: തൊഴിലാളി സംഘടനകളുടെ ദേശീയ പണിമുടക്ക് ദിനമായ വ്യാഴാഴ്ച്ച (നാളെ) സര്‍വീസ് നടത്തുമെന്ന് കെഎസ്ആര്‍ടിസി അറിയിച്ചു. എല്ലാ സര്‍വീസുകളും നടത്താന്‍ യൂണിറ്റുകള്‍ക്ക് കെഎസ്ആര്‍ടിസി ഓപ്പറേഷന്‍സ് വിഭാഗം എക്‌സിക്യൂട്ടീവ് ഡയറക്ടര്‍ നിര്‍ദേശം നല്‍കി. ബസ് തടഞ്ഞാല്‍ പൊലിസിന്റെ സഹായം തേടുമെന്നും അറിയിച്ചിട്ടുണ്ട്. 

ക്രമസമാധാന പ്രശ്‌നങ്ങളുള്ള സ്ഥലങ്ങളില്‍ മുന്‍കൂട്ടി പൊലിസ് സഹായം ആവശ്യമുണ്ടെങ്കില്‍ അറിയിക്കണമെന്നാണ് നിര്‍ദേശം. വിമാനത്താവളങ്ങള്‍, റെയില്‍വേ സ്റ്റേഷനുകള്‍, ബസ് സ്റ്റാന്‍ഡുകള്‍ എന്നിവിടങ്ങളിലേക്ക് കൂടുതല്‍ സര്‍വീസുകള്‍ ക്രമീകരിക്കണം. യാത്രക്കാര്‍ക്ക് ബുദ്ധിമുട്ട് വരാത്ത രീതിയില്‍ ആവശ്യമായ നടപടിക്രമങ്ങള്‍ പാലിക്കാനും, ക്രമീകരണങ്ങള്‍ നടത്താനും കെഎസ്ആര്‍ടിസി ജീവനക്കാര്‍ക്ക് നിര്‍ദേശം നല്‍കിയിട്ടുണ്ട്.

ALSO READ: ധനക്കമ്മി കുറച്ചുകാണിക്കാന്‍ നികുതി റീഫണ്ട് തടഞ്ഞുവെക്കുന്നു; കേന്ദ്ര ബജറ്റിനെതിരേ സഭയില്‍ ആഞ്ഞടിച്ച് ഹാരിസ് ബീരാന്‍ 

അതേസമയം കേന്ദ്ര സർക്കാരിന്റെ ജനവിരുദ്ധ നയങ്ങൾക്കും അവഗണന നിറഞ്ഞ ബജറ്റ് നിർദേശങ്ങൾക്കും എതിരേയും വിവിധ ആവശ്യങ്ങളുന്നയിച്ചും പത്ത് കേന്ദ്ര തൊഴിലാളി സംഘടനകൾ ആഹ്വാനം ചെയ്ത അഖിലേന്ത്യാ പണിമുടക്ക് ഇന്ന് അർധരാത്രി ആരംഭിക്കും.
കേരളത്തിൽ പണിമുടക്ക് പൂർണമായിരിക്കുമെന്ന് സമരസമിതി അറിയിച്ചു. വ്യവസായ - കാർഷിക - വാണിജ്യ - വ്യാപാര മേഖലകൾ 24 മണിക്കൂറും നിശ്ചലമാകും.  സംയുക്ത കർഷകമോർച്ചയും കർഷകത്തൊഴിലാളി സംഘടനകളും സി.പി.ഐ, സി.പി.എം അടക്കമുള്ള വിവിധ രാഷ്ട്രീയ പാർട്ടികളും പണിമുടക്കിന് പിന്തുണ പ്രഖ്യാപിച്ചിട്ടുണ്ട്.