റാസൽഖൈമ: യുഎഇയിലെ ഏറ്റവും ഉയരം കൂടിയ കൊടുമുടിയായ ജബൽ ജെയ്‌സിലേക്ക് ഇനിമുതൽ സന്ദർശകർക്ക് യാതൊരുവിധ പ്രവേശന അനുമതിയും ഇല്ലാതെ കടന്നുചെല്ലാം. മലമുകളിലേക്കുള്ള പ്രവേശനം കൂടുതൽ സുഗമമാക്കുന്നതിന്റെ ഭാഗമായി എല്ലാത്തരം നിയന്ത്രണങ്ങളും അധികൃതർ നീക്കി. ഫെബ്രുവരി 11 മുതൽ മലമുകളിലെ മനോഹരമായ വ്യൂ പോയിന്റുകൾ, ഔട്ട്‌ഡോർ വിനോദങ്ങൾ, റെസ്റ്റോറന്റുകൾ എന്നിവ സന്ദർശകർക്ക് സ്വതന്ത്രമായി ആസ്വദിക്കാമെന്ന് റാസൽഖൈമ അധികൃതർ വ്യക്തമാക്കി.

കനത്ത മഴയെത്തുടർന്ന് റോഡിന്റെ ചില ഭാഗങ്ങൾ തകരുകയും സുരക്ഷാ പ്രശ്നങ്ങൾ ഉണ്ടാവുകയും ചെയ്തതിനെത്തുടർന്ന് ഈ സീസണിന്റെ തുടക്കത്തിൽ ജബൽ ജെയ്‌സ് താൽക്കാലികമായി അടച്ചിരുന്നു. പിന്നീട് ഭാഗികമായി തുറന്നുകൊടുത്തുവെങ്കിലും അറ്റകുറ്റപ്പണികൾ നടന്നിരുന്നതിനാൽ കർശനമായ നിയന്ത്രണങ്ങളോടെ മാത്രമായിരുന്നു പ്രവേശനം അനുവദിച്ചിരുന്നത്. എന്നാൽ പുനരുദ്ധാരണ പ്രവർത്തനങ്ങൾ പൂർണ്ണമായി പൂർത്തിയായതോടെയാണ് ഇപ്പോൾ സാധാരണ നിലയിലുള്ള സന്ദർശനത്തിന് അനുമതി നൽകിയിരിക്കുന്നത്.

യുഎഇയിലെ ഏറ്റവും ഉയരമുള്ള റെസ്റ്റോറന്റായ '1484 ബൈ പുറോ'യിൽ ഭക്ഷണം കഴിക്കാൻ എത്തുന്നവർ മുൻകൂട്ടി റിസർവേഷൻ നടത്തിയിരിക്കണം. അതേസമയം 'റെഡ് റോക്ക് ബാർബിക്യൂ' എല്ലാവിധ വിഭവങ്ങളുമായി സന്ദർശകരെ സ്വീകരിക്കാൻ പൂർണ്ണ സജ്ജമായിക്കഴിഞ്ഞു. സാഹസിക പ്രേമികൾ കാത്തിരിക്കുന്ന 'ജയ്‌സ് സ്കൈ ടൂർ' ഫെബ്രുവരി 18 മുതൽ പുനരാരംഭിക്കും. ബുധനാഴ്ച മുതൽ ഞായറാഴ്ച വരെയും പൊതു അവധി ദിവസങ്ങളിലും രാവിലെ 9.30 മുതൽ ഉച്ചയ്ക്ക് 2 മണി വരെയുള്ള വിവിധ സമയങ്ങളിൽ സിപ്‌ലൈൻ സാഹസികത ലഭ്യമാകും. പർവതനിരകളിലെ തണുത്ത കാലാവസ്ഥയും മനോഹരമായ കാഴ്ചകളും ആസ്വദിക്കാൻ എത്തുന്ന സഞ്ചാരികൾക്ക് പുതിയ തീരുമാനം വലിയ ആശ്വാസമാണ് പകരുന്നത്.

ras al khaimah authorities have announced that jebel jais is now fully open to visitors without prior permission. the move aims to boost tourism, ease access and attract adventure seekers to the uae’s highest peak.