തിരുവനന്തപുരം: തൊഴില്‍ വകുപ്പിന് കീഴിലെ 16 ക്ഷേമനിധി ബോര്‍ഡുകളിലൂടെ നല്‍കുന്ന എല്ലാ ആനുകൂല്യങ്ങള്‍ക്കും ആധാര്‍ നിര്‍ബന്ധമാക്കി സര്‍ക്കാര്‍. തൊഴില്‍ വകുപ്പ് നടപ്പാക്കുന്ന 'അഡ്വാന്‍സ്ഡ് ഇന്‍ഫര്‍മേഷന്‍ ഇന്റര്‍ഫേസ് സിസ്റ്റം' (എ.ഐ.ഐ.എസ്) സോഫ്റ്റ് വെയറിന്റെ രണ്ടാം ഘട്ടം നടപ്പാക്കുന്നതിന്റെ ഭാഗമായാണ് നടപടിയെന്ന് മന്ത്രി വി ശിവന്‍കുട്ടി വാര്‍ത്താ സമ്മേളനത്തില്‍ അറിയിച്ചു.

ആനുകൂല്യങ്ങള്‍ ഇനിമുതല്‍ ആധാറുമായി ബന്ധിപ്പിച്ച ബാങ്ക് അക്കൗണ്ടുകള്‍ വഴിയാണ് വിതരണം ചെയ്യുക. ഇത് ഇടനിലക്കാരുടെ ഇടപെടല്‍ ഒഴിക്കാന്‍ സഹായിക്കും. എ.ഐ.ഐ.എസ് സോഫ്റ്റ് വെയറില്‍ വിവരങ്ങള്‍ ശേഖരിച്ചിട്ടുള്ള 16 ക്ഷേമനിധി ബോര്‍ഡുകളിലെയും അംഗങ്ങള്‍ക്ക് ആധാര്‍ അധിഷ്ഠിത സവിശേഷ തിരിച്ചറിയല്‍ കാര്‍ഡ് നല്‍കും. 

ALSO READ: 2026ലും വന്‍ ഭൂരിപക്ഷത്തില്‍ ഡിഎംകെ അധികാരത്തിലെത്തും; കോണ്‍ഗ്രസുമായി ഭിന്നതയില്ല, തെരഞ്ഞെടുപ്പിനെ ഒന്നിച്ച് നേരിടും; എം.കെ സ്റ്റാലിന്‍  

തൊഴിലാളികള്‍ക്ക് സന്തമായോ അക്ഷയ കേന്ദ്രം, ക്ഷേമനിധി ബോര്‍ഡ് ഓഫീസുകള്‍ എന്നിവ വഴിയോ സോഫ്റ്റ് വെയറില്‍ വിവരങ്ങള്‍ പുതുക്കാനും തിരിച്ചറിയല്‍ കാര്‍ഡിന് അപേക്ഷിക്കാനും സാധിക്കും. തൊഴിലാളികളുടെ സാമൂഹിക സുരക്ഷ ഉറപ്പാക്കാനും സേവനങ്ങള്‍ ഡിജിറ്റല്‍ സംവിധാനത്തിലൂടെ വിരല്‍ത്തുമ്പില്‍ എത്തിക്കാനും പദ്ധതി സഹായകമാകുമെന്നും മന്ത്രി കൂട്ടിച്ചേര്‍ത്തു.