ബാഴ്‌സലോണ:ബാഴ്‌സലോണയുടെ ഗോൾമെഷീൻ റോബർട്ട് ലെവൻഡോവ്‌സ്‌കി ക്ലബ് വിടുമോ എന്ന ചർച്ചകൾ ഫുട്ബോൾ ലോകത്ത് സജീവമാകുന്നു. ഈ സീസൺ അവസാനത്തോടെ ബാഴ്‌സയുമായുള്ള കരാർ അവസാനിക്കുന്ന പോളിഷ് സൂപ്പർ താരത്തിന് മുന്നിൽ വമ്പൻ ഓഫറുകളുടെ നിരയാണുള്ളതെന്നാണ് റിപ്പോർട്ടുകൾ സൂചിപ്പിക്കുന്നത്. യൂറോപ്യൻ ഫുട്ബോളിലെ ഇതിഹാസ താരം റോബർട്ട് ലെവൻഡോവ്‌സ്‌കിയുടെ ഭാവി ഇപ്പോഴും ബാഴ്സയിലെ അനിശ്ചിതത്വത്തിലാണ്. ഈ വേനൽക്കാലത്ത് താരം ബാഴ്‌സലോണ വിടാൻ തീരുമാനിച്ചാൽ, അഞ്ച് പ്രമുഖ ക്ലബ്ബുകൾ താരത്തെ സ്വന്തമാക്കാൻ തയ്യാറായി രംഗത്തുണ്ടെന്നാണ് സ്പാനിഷ് മാധ്യമമായ 'മുണ്ടോ ഡിപോർട്ടീവോ' റിപ്പോർട്ട് ചെയ്യുന്നത്.

ലെവൻഡോവ്‌സ്‌കിക്കായുള്ള മത്സരത്തിൽ മുന്നിലുള്ളവർ:

അത്‌ലറ്റിക്കോ മാഡ്രിഡ്: ലാലിഗയിൽ തന്നെ തുടരാൻ ലെവയ്ക്ക് താൽപ്പര്യമുണ്ടെങ്കിൽ അത്‌ലറ്റിക്കോ മികച്ച ഓപ്ഷനാണ്. ജൂലിയൻ അൽവാരസിന് പകരക്കാരനായി ഒരു കരുത്തുറ്റ സ്ട്രൈക്കറെ തേടുന്ന അത്‌ലറ്റിക്കോയ്ക്ക് ലെവൻഡോവ്‌സ്‌കി തന്നെയാണ് മികച്ച ഓപ്ഷൻ.

എസി മിലാൻ: ഇറ്റാലിയൻ കരുത്തരായ മിലാനും താരത്തിന്റെ ഏജന്റുമായി ചർച്ചകൾക്ക് താൽപ്പര്യം പ്രകടിപ്പിച്ചിട്ടുണ്ട്.

ഫെനർബാഷെ: ടർക്കിഷ് ക്ലബ്ബായ ഫെനർബാഷെയും പോളിഷ് താരത്തിനായി രംഗത്തുണ്ട്.

സൗദി പ്രോ ലീഗ്: വമ്പൻ തുക വാഗ്ദാനം ചെയ്ത് സഊദി ക്ലബ്ബുകളും ലെവയെ തങ്ങളുടെ ലീഗിലെത്തിക്കാൻ ശ്രമിക്കുന്നു.

ചിക്കാഗോ ഫയർ (MLS): നിലവിൽ റിപ്പോർട്ടുകൾ പ്രകാരം അമേരിക്കൻ ക്ലബ്ബായ ചിക്കാഗോ ഫയറാണ് താരത്തെ സ്വന്തമാക്കാനുള്ള നീക്കങ്ങളിൽ മുന്നിൽ നിൽക്കുന്നത്. രണ്ട് വർഷത്തെ കരാറാണ് ഇവർ വാഗ്ദാനം ചെയ്തിരിക്കുന്നത്.

തീരുമാനമാകാതെ ലെവ:

തന്റെ ഭാവിയെക്കുറിച്ച് താരം ഇതുവരെയും മനസ്സ് തുറന്നിട്ടില്ല. സീസൺ അവസാനത്തിൽ മാത്രമേ തീരുമാനം എടുക്കൂ എന്നാണ് ലെവൻഡോവ്‌സ്‌കി പറയുന്നത്."എനിക്ക് ഇപ്പോഴും ഉത്തരമറിയില്ല. അതുകൊണ്ട് തന്നെ എനിക്ക് തിടുക്കവുമില്ല. ഇപ്പോൾ ഞാൻ ശാന്തനാണ്. സീസൺ കഴിയുമ്പോൾ എനിക്ക് എന്താണോ ശരിയെന്നു തോന്നുന്നത്, അതാകും എന്റെ തീരുമാനം." - റോബർട്ട് ലെവൻഡോവ്‌സ്‌കി പറഞ്ഞു.

അതേസമയം, ബാഴ്‌സലോണയിൽ തന്നെ തുടരാനാണ് താരത്തിന് കൂടുതൽ താല്പര്യമെന്നും റിപ്പോർട്ടുകൾ സൂചിപ്പിക്കുന്നു. ക്ലബ്ബിന്റെ സാമ്പത്തിക സാഹചര്യം കണക്കിലെടുത്ത് കുറഞ്ഞ ശമ്പളത്തിൽ കരാർ പുതുക്കാൻ താരം തയ്യാറായേക്കും. ബാഴ്‌സയുടെ മാനേജ്‌മെന്റ് ഇക്കാര്യത്തിൽ എന്ത് നിലപാട് എടുക്കുമെന്നതിനെ ആശ്രയിച്ചിരിക്കും താരത്തിന്റെ ഭാവി.